1 तेबे सेमुएले सारे इस्राएली लोका गे यहोवे रिया सारिया गल्ला बताईया। तेस बखते इस्राएली सिपाई पलिश्तिया साथे युद्ध करने खे निकल़े। तेबे इस्राएली सिपाईए तो एबेनेजेर जगा दे डेरे लगाए ओर पलिश्तिये अपेक जगा दे डेरे लगाए। 2 तेबे पलिश्तिये इस्राएली लोका रिया सेना पाँदे अमला कित्तेया ओर सेयो अराईते, तिने कोई 4,000 इस्राएली सिपाई लड़ाईया दे मैदानो देई काईते। 3 जेबे इस्राएली सिपाई छावणिया दे वापस आए, तेबे इस्राएलो रे स्याणे लोक बोलणे लगे, "यहोवे आज आसे पलिश्तिया रे आथो ते कऊँ अराए? एबे आओ, आसे यहोवे रे वादे रा सन्दूक शीलो जगा ते मांगी की लई आऊँए, ताकि से आसा बीचे आई की आसा खे दुश्मणा रे आथो ते बचाओ।" 4 तेबे तिने कुछ लोक शीलो दे पेजी की तेथा ते यहोवे रे वादे रा सन्दूक मुंगाईता जेते पाँदे करूब ए ओर जेती यहोवे री उपस्थिती बणी दी रओ थी ओर यहोवे रे वादे रे सन्दूको साथे एलीए रे दोनो पाऊ, होप्नी ओर पीनहास बी तेती आए।

5 जेबे इस्राएली लोक यहोवे रे वादे रा सन्दूक डेरे दे लई की आए, तेबे सारे इस्राएली इतणे जोरे की ललकारने लगे कि तेथो री जमीन इल्ली गी। 6 एते ललकारा री आवाज सुणी की पलिश्तिये पूछेया, "इब्री लोक इतणे जोरे की कऊँ ललकारने लगी रे?" तेबे तिना खे पता लगी गा कि इस्राएली लोका रे डेरे दे यहोवे रे वादे रा सन्दूक आई रा। 7 तेबे पलिश्ती डरी की बोलणे लगे, "तेती डेरे दे तिना रा देवता आई गा रा।" तेबे तिने बोलेया, "हाय! आसा साथे एड़ी गल्ल पईले कदी नि ऊई थी। 8 हाय! एड़े तागतबर देवते रे आथो ते आसे केस बचाणे? ये तो सेई देवता ए जिने मिस्री लोका पाँदे उजाड़ जगा दे सबी प्रकारा रिया मुसीबता पाईया थिया। 9 इजी री खातर ओ पलिश्तियो, मजबूत ऊई जाओ ओर एक योद्धा जेड़े लड़ो, जे तुसे आज इना ते नि लड़े तो आसे इब्री लोका रे गुलाम ऊई जाणे जेड़े सेयो पईले म्हारी सेवा करो थे। एबे डरो नि पर उठो ओर लड़ो।" 10 तेबे पलिश्ती पूरे जोरे की लड़े ओर इस्राएली फेर अरीगे। ओर इतणा जादा खून खराबा ऊआ कि 30,000 इस्राएली सैनिक मरीगे। ओर बचे दे इस्राएली लोक मुड़ी की आपणेया डेरेया खे नठीगे। 11 तेबे पलिश्तिए यहोवे रे वादे रा सन्दूक इस्राएली लोका ते छीनी ला ओर एलीए रे दोनो पाऊ होप्नी ओर पीनहास बी काईते।

12 तेबे बिन्यामीन गोत्रो रा एक सैनिक लड़ाईया वाल़िया जगा ते दौड़ेया ओर दु:खो रिया बजा ते आपणे टाल्ले फाड़ी की ओर सिरो पाँदे माट्टी सेटी की तेस ई दिने शीलो जगा दे पऊँचेया।* 13 जेबे से शीलो जगा दे पऊँचेया तेस बखते एली पुरोईत, जेसरा मन यहोवे रे वादे रे सन्दूको री फिकरा दे कबराणे लगी रा था, से आपणिया गद्दिया पाँदे बैठी की बाटा खे देखदे ऊए न्याल़ने लगी रा था ओर जिंयाँ ई तिने माणूंए शईरो दे पऊँची की से सन्देश दित्तेया तिंयाँ ई सारे शईरो रे लोक रोणे लगेया। 14 लोका रे रोणे री आवाज सुणी की एलीए पूछेया, "एड़ा आल्ला ओर रोणा पीटणा कऊँ ऊणे लगी रा?" तेबे तिने सिपाईए फटाफट जाई की एलीए गे लड़ाईया रा सारा आल सुणाया। 15 तेस बखते एली तो 98 साला रा था ओर से लगभग अन्दा ई ऊईगा दा था ओर तेसखे कुछ नि दिशो था। 16 तिने सिपाईए एली पुरोईतो खे बोलेया, "आऊँ आज तेती सेना बीचे लड़ाईया दे था ओर तेथा ते दौड़ी की आई रा।" एलीए तेसते पूछेया, "ओ मेरे पाऊ तेती लड़ाईया दे क्या ऊआ ए?" 17 तिने सिपाईए ज्वाब दित्तेया, "इस्राएली पलिश्तिया रे सामणे ते नठीगे दे ओर लोका रा बड़ा खून-खराबा बी ऊई रा ओर तेरे दोनो पाऊ होप्नी ओर पीनहास बी मरीगे ओर यहोवे रे वादे रा सन्दूक बी छीनी ला रा ए।" 18 जिंयाँ ई तिने यहोवे रे वादे रे सन्दूको रा नाओं लया तिंयाँ ई एली बड़े द्वारो गे गद्दिया पाँदा ते धड़ाम करी की पिछलिया तरफा खे रूड़ी गा ओर स्याणा ओर पारी ऊणे रिया बजा ते तेसरी क्याड़ी टुटी गी ओर से मरीगा। तिने इस्राएली लोका रा न्याय चाल़िया साला तक कित्तेया था।

19 एलीए री बऊ, पीनहासो री लाड़ी गर्भवती थी ओर तेसा रे बच्चा पैदा ऊणे रा बखत नेड़े था। जेबे तेसे यहोवे रे वादे रा सन्दूक छीनणे ओर आपणे सऊरे ओर आपणे लाड़े रे मरने रा सन्देश सुणेया, तेबे तेसा खे एकदम बच्चा जमणे रिया पीड़ा ऊणे लगिया, तेबे तेसा रे सूत्तक ऊईगा ओर तेसा रे एक पाऊ जम्मेया। 20 जेबे से मरने वाल़ी थी तिने जवाणसे जो तेसा रे नेड़े-तेड़े खड़ी री थिया तेसा खे बोलेया, "डर नि, कऊँकि तेरे एक पाऊ ऊई रा।" पर तेसे तिना खे कोई ज्वाब नि दित्तेया ओर ना कोई त्यान दित्तेया। 21 तेसे ये बोली की तेस बच्चे रा नाओं ईकाबोद राखेया, जेते रा मतलब ए "इस्राएलो ते महिमा उठी गी री" तेसे ये इजी खे बोलेया कऊँकि यहोवे रे वादे रा सन्दूक छीनी ला रा था ओर तेसा रा सऊरा ओर लाड़ा बी मरीगे दे थे। 22 तेबे तेसे बोलेया, "इस्राएलो ते परमेशरो री महिमा उठी गी री, कऊँकि यहोवे रे वादे रा सन्दूक छीनी ला रा ए।"