1 एक दिन यहोवे सेमुएलो खे बोलेया, "मैं फैंसला करी ला दा ए कि आगो खे शाऊल इस्राएलो रा राजा नि रणा, तूँ कदुए तक तेसरे बारे दे दु:ख करदे रणा। एबे उठ आपणे सींगो दे तेल परी की चल, आऊँ ताखे बेतलेहमो दे रणे वाल़े यिशै गे पेजुँआ, कऊँकि मैं तेसरे पाऊआ बीचे एक राजा ऊणे खे चूणी राखेया।" 2 सेमुएले बोलेया, "आऊँ नि जाई सकदा, जे शाऊले सुणी ला तो तेस आऊँ काई देणा।" यहोवे बोलेया, "एक बाच्छी साथे लई जाई की बोलणा, आऊँ यहोवे खे बलिदान चढ़ाणे खे आई रा। 3 तेबे बलिदान चढ़ाणे खे यिशै खे आऊणे खे निऊँदा देणा, तेबे मां तांगे बताणा ओर जेसखे आऊँ ताखे बताऊँ तैं मेरिया तरफा ते तेसरा ई अभिषेक करना।" 4 तेबे सेमुएले यहोवे रे कईणे रे मुताबिक उठेया ओर बेतलेहम शईरो खे गया। तेस शईरो रे बुजुर्ग डरदे ऊए तेसखे मिलणे खे आए ओर बोलणे लगे, "क्या तूँ मेल-जोल करने रे नाते आई रा कि नई?" 5 तिने बोलेया, "आ, आऊँ मेल-जोल करने रे नाते आई रा, आऊँ यहोवे खे बलिदान चढ़ाणे खे आई रा; तुसे आपू-आपू खे पवित्र करी की मां साथे बलिदान चढ़ाणे खे आओ।" तेबे तिने यिशै ओर तेसरे पाऊआ खे बलिदानो दे आऊणे खे निऊँदा दित्तेया।

6 जेबे यिशै ओर तेसरे पाऊ आए, तेबे सेमुएले एलीआबो खे देखी की सोचेया, "पक्का जो यहोवे सामणे ए सेई चुणेया दा ऊणा।" 7 पर यहोवे सेमुएलो खे बोलेया, "ना तेसरी शक्ला खे देख ओर ना ई तेसरे कदो खे देख, कऊँकि मैं से नि चूणी राखेया, कऊँकि यहोवे रा देखणा माणूंआ जेड़ा नि ए, माणूं तो बारला रूप देखोआ, पर परमेशरो री नजर मनो पाँदे रओई।" 8 तेबे यिशै आपणे दूजे पाऊ अबीनादाब बुलाई की सेमुएलो सामणे पेजेया तेबे सेमुएले तेसखे बोलेया, "यहोवे ये पनि चूणी राखेया।" 9 तेबे यिशै आपणा तीजा पाऊ शम्मा सामणे पेजेया तेबे सेमुएले बोलेया, "यहोवे ये पनि चूणी राखेया।" 10 ईंयाँ ई यिशै आपणे सात पाऊ एक-एक करी की सेमुएलो सामणे पेजे पर सेमुएल यिशै खे बोलदा गया, "यहोवे यो नि ए चूणे दे।"

11 तेबे सेमुएले यिशै खे बोलेया, "क्या तेरे सारे माठे आईगे?" तिने बोलेया, "ना, छोटा पाऊ नि आई रा, से तो बणो दे पेडा-बाकरिया चराणे लगी रा।" सेमुएले यिशै खे बोलेया, "तेसखे बुलाई की ल्याओ, कऊँकि जदुओ तक से एती नि आओगा, आसा खाणा खाणे नि बैठणा।" 12 तेबे यिशै कोई माणूं बणो दे पेजी की आपणा सबी ते छोटा पाऊ दाऊद बुलाया। से देखणे दे सुन्दर ओर अट्टा-कट्टा था। तेबे यहोवे सेमुएलो खे बोलेया, "उठी की एसरा अभिषेक कर, ये सेईए।" 13 तेबे सेमुएले आपणा तेलो वाल़ा सींग लई की तेसरे पाईया रे सामणे तेसरा अभिषेक कित्तेया ओर तेस दिनो ते लई की यहोवे रा आत्मा दाऊदो पाँदे तागती ते उतरेया। तेबे सेमुएल उठी की रामा शईरो खे चली गा।

14 तेबे यहोवे रा आत्मा शाऊलो पाँदा ते उठीगा ओर यहोवे री तरफा ते एक दुष्टात्मा तेसखे डराणे लगी। 15 तेबे शाऊलो रे कर्माचारिये तेसखे बोलेया, "सुण, परमेशरो रिया तरफा ते एक दुष्टात्मा ताखे डराओआ। 16 ओ मेरे स्वामी! आपणे कर्मचारिया खे जो एती तां सामणे ए आज्ञा देयो कि सेयो केसी अच्छे बीणा बजाणे वाल़े खे टोल़ी की ली आओ ओर जेबे-जेबे परमेशरो रिया तरफा ते दुष्टात्मा तां पाँदे चढ़ो, तेबे-तेबे से बीणा बजाओ ओर तेबे तूँ ठीक ऊई जाणा।" 17 शाऊले आपणे कर्मचारिया खे बोलेया, "ठीक ए, एक अच्छा बीणा बजाणे वाल़ा देखो ओर तेसखे मांगे ली आओ।"

18 तेबे एकी जवाने ज्वाब दित्तेया, "सुण, आऊँ बेतलेहमो रे रणे वाल़े यिशै रे एकी पाऊए खे पछयाणूआ जो बीणा बजाणा जाणोआ ओर से तागतबर बीए ओर गल्ल बात करने दे अक्लमंद ओर सुन्दर बीए ओर यहोवा तेस साथे रओआ।" 19 तेबे शाऊले दूता रे आथो दे यिशै गे सन्देश पेजेया, "आपणे पाऊए दाऊदो खे जो पेडा-बाकरिया खे चरांदा रओआ मांगे पेजी दे।" 20 तेबे यिशै एक गह्दा लया ओर तेस पाँदे रोटिया लादिया, खलडु परी की दाखमधु ओर बाकरिया रा एक बच्चा लई की आपणे पाऊ दाऊदो रे आथो दे देई की शाऊलो गे पेजीता। 21 तेबे दाऊद शाऊलो गे जाई की तेस सामणे आजीर रणे लगेया। शाऊल तेसखे बऊत प्यार करने लगेया ओर से तेसरा अथियार टोणे वाल़ा ऊईगा।

22 तेबे शाऊले यिशै खे सन्देशा पेजेया, "दाऊदो खे मांगे ई रणी दे, कऊँकि आऊँ तेसते बऊत खुश ए।" 23 जेबे-जेबे परमेशरो रिया तरफा ते से दुष्टात्मा शाऊलो पाँदे आओ था, तेबे-तेबे दाऊद बीणा लई की बजाओ था ओर से दुष्टात्मा तेस पाँदा ते अटी जाओ था, तेबे शाऊल चैन पाई की ठीक ऊई जाओ था।