1 शाऊल जेबे तिया साला रा था तेबे से राज करने लगेया ओर तिने इस्राएली लोका पाँदे दो साल* राज कित्तेया। 2 तेबे शाऊले इस्राएली लोका बीचा ते 3,000 मर्द आपू खे चूणी ले ओर तिना बीचा ते 2,000 मर्द शाऊलो साथे मिकमाश शईरो दे या बेतेल शईरो रे पाह्ड़ी इलाके दे रओ थे, ओर बाकि 1,000 मर्द शाऊलो रे पाऊ योनातानो साथे बिन्यामीन गोत्रो रे इलाके रे गिबा शईरो दे रओ थे। कट्ठे ऊए दे लोका बीचा ते बाकी सारे लोक शाऊले आपणे-आपणे डेरे खे जाणे खे पेजी ते। 3 तेबे योनाताने पलिश्ती लोका री चौकिया पाँदे अमला कित्तेया जो गिबा शईरो दे थी, ओर इजी रा सन्देश पलिश्ती लोका खे मिलेया। तेबे शाऊले सारे इस्राएल देशो दे नरसिंगा बजाई की ये सन्देश पेजेया, "जो कुछ ऊआ तीजी खे इब्री लोक सुणो।" 4 तेबे सबी इस्राएली लोके ये सन्देश सुणेया कि शाऊले पलिश्तिया री चौकिया पाँदे अमला करी ता रा ए ओर ये बी कि पलिश्ती लोक इस्राएलो रे लोका ते नफरत करने लगी गे रे। तेबे लोक* शाऊलो री मताद करने खे गिलगाल जगा दे कट्ठे ऊए।

5 तेसी बखते पलिश्ती लोके इस्राएली लोका साथे युद्ध करने खे बेतावेन शईरो रे पूर्वा रिया तरफा खे जाई की मिकमाशो दे डेरे लगाए, तिना साथे 3,000 रथ, 6,000 कोड़ेया रे सवार ओर समुद्रो रे कनारे बालूए रिया कणियां जेड़े बऊत सारे लोक थे। 6 जेबे इस्राएली लोके देखेया कि आसे मुसीबता रे पड़ी रे (ओर सच्ची लोक मुसीबता दे पड़ी गे थे) तेबे सेयो लोक गुफा, जाड़, खड्डे, औद, चट्टानी दे जाई की लूकी गे। 7 कई इब्री लोक यरदन नदिया ते पार ऊई की गाद ओर गिलादो रे इलाकेया दे चली गे, पर शाऊल गिलगाल जगा देई रया ओर तेस साथे जो लोक रये सेयो बऊत डरे दे थे। 8 शाऊल तो सेमुएलो रे ठराए रे बखतो दे, मतलब साता दिना तक तेसखे न्याल़दा रया, पर सेमुएल गिलगाल जगा दे नि आया ओर तेबे जो लोक शाऊलो गे थे सेयो ओरे-पोरे ऊणे लगे। 9 आखरी दे शाऊले सेमुएलो रे ना आऊणे ते लोका खे बोलेया, "होमबलि ओर मेलबलि मांगे ल्यायो। तेबे तिने होमबलि चढ़ाई।"

10 जिंयाँ ई से होमबलि चढ़ाई चुकेया, तेबे तिने क्या देखेया कि सेमुएल आई की पऊँची गा ओर शाऊल तेस साथे मिलणे ओर तेसरा स्वागत करने खे निकल़ेया। 11 तेबे सेमुएले शाऊलो ते पूछेया, "तैं क्या कित्तेया?" शाऊले ज्वाब दित्तेया, "जेबे मैं देखेया कि लोक मांगा गे ते ओरे-पोरे जाणे लगी रे ओर तूँ ठराए रे दिना ते पीतरे नि आया ओर पलिश्ती सेना मिकमाशो दे कट्ठे ऊई रे, 12 तेबे मैं सोचेया कि पलिश्ती सिपाईया गिलगालो दे आसा पाँदे आई की अमला करी देणा, ओर मैं यहोवे ते बिनती पनि करी राखी, तो मैं आपणी इच्छा ना ऊँदे ऊए बी होमबलि चढ़ाई।"

13 सेमुएले शाऊलो खे बोलेया, "तैं मूर्खता रा काम करी राखेया, तैं आपणे परमेशर यहोवे री आज्ञा नि मानी, नई तो यहोवे तेरा राज्य इस्राएली लोका पाँदे सदा बणाया दा राखणा था। 14 पर एबे तुँ ओर तेरा कराणा इस्राएलो पाँदे राज नि करी सकणा, कऊँकि तैं यहोवे री आज्ञा नि मानी। पर एबे यहोवे एक एड़ा माणूं टोल़ी लणा जो तेसरे मनो रे मुताबिक ओ ओर यहोवे से ई आपणी प्रजा पाँदे राजा ऊणे खे ठराणा।"

15 तेबे सेमुएल गिलगालो ते बिन्यामीन गोत्रो रे गिबा शईरो खे चली गा। शाऊले आपू साथले लोक गिणे ओर सेयो कोई 600 थे। 16 तेबे शाऊल ओर तेसरा पाऊ योनातान ओर जो लोक तेस साथे थे तिने बिन्यामीन प्रदेशो रे गिबा शईरो दे डेरे लगाए ओर पलिश्ती सिपाईए मिकमाशो दे डेरे लगाए। 17 तेबे पलिश्तिया रे सिपाईए अमला करने खे तीन दल बणाई की डेरे ते बारे निकाल़े, एक दल उत्तर दिशा ते शूआल इलाके रे ओप्रा शईरो रिया तरफा खे गया। 18 दूजा दल मुड़ी की दक्खण-पूर्बा दे बेथोरोनो रिया बाटा दे गया ओर तीजा दल मुड़ी की पूर्बा दे तेस देशो रिया बाटा दे गया जो सबोईम नाओं री तराईया रिया तरफा खे जंगल़ो रे कनारे था।

19 इस्राएलो रे पूरे देशो दे ल्वार केथी नि मिलो थे, कऊँकि पलिश्ती सिपाई नि चाओ थे कि इब्री लोक तलवार या भाल़ा बणाई सको। 20 इजी री खातर इस्राएली आपणे-आपणे अल़ो रे फाल़े, भाल़े, क्वाड़ी ओर दाचिया पैनिया कराणे खे पलिश्तिया गे जाओ थे ओर तिना खे आठ ग्राम चाँदी देयो थे, 21 पर तिना री दाचिया, फाल़े, डोरूआ रे त्रिशूल ओर क्वाड़िया री ताअर ओर परैंठी तेज करने खे चार ग्राम चाँदी देयो थे। 22 इजी री खातर युद्धो रे दिने शाऊल ओर योनातानो खे छाडी की केसी ओरी गे ना तो तलवार थी ओर ना भाल़े थे। 23 तेबे पलिश्तिया री चौकिया रे सिपाई निकल़ी की मिकमाश शईरो री काट्टिया गे गये।