1 सेमुएल 11

राजा शाऊलो रे जरीये गिलाद याबेशो री जीत

1 लगभग एकी मीन्ने बाद अम्मोन देशो रा राजा नाहाश आपणिया सेना साथे आई की इस्राएलो रे गिलाद प्रदेशो रे याबेश शईरो पाँदे अमला करने खे आया। पर याबेशो रे सबी लोके नाहाशो खे शान्तिया रिया तँईं बोलेया। याबेशो रे लोके बोलेया, "जे तुँ आसा साथे शान्तिया रा वादा करे, तो तेबे आसा तेरी सेवा करनी।" 2 अम्मोन देशो रे राजा नाहाशे तिना खे बोलेया, "मां तुसा साथे वाचा एते शर्ता पाँदे बानणी कि मां तुसा सबी रिया दाँणियां आखी फोड़ी की एस सारे इस्राएलो री बेज्जती नि करी देऊँ।"

3 याबेशो रे बुजुर्ग लोके तेसखे ज्वाब दित्तेया, "आसा खे सात दिना रा बखत दे, तदुओ तक आसा इस्राएलो रे सारे देशो दे दूत पेजणे ओर जे आसा खे कोई बचाणे वाल़ा नि मिलोगा, तो आसा तांगे ई निकल़ी की आई जाणा।" 4 दूत गिबा शईरो दे आए जेती शाऊल रओ था, तिने आई की तिना लोका खे से सन्देशा सुणाया, जेते रे बारे दे सुणी की सारे लोक जोरे-जोरे की रोणे लगे। 5 शाऊल बल़दा पीछे-पीछे मैदानो ते चली की आऊणे लगी रा था, तेबे शाऊले पूछेया, "इना लोका खे क्या ऊई रा कि यो रोणे लगी रे?" तिने शाऊलो खे याबेशो रे लोका रा सन्देश सुणाया। 6 ये सुणदे ई शाऊलो पाँदे यहोवे रा आत्मा तागती साथे उतरेया ओर तेसरा रोष बऊत पड़की गा। 7 तिने एक जोड़ी बल़दा री लई की तिना रे टुकड़े-टुकड़े करीते ओर ये बोली की सेयो टुकड़े दूता रे आथो दे देई की सारे इस्राएल देशो दे ये सन्देश पेजेया, "जो कोई आई की शाऊल ओर सेमुएलो साथे अम्मोनी लोका ते लड़ने खे नि आओगे, तेसरे बल़दा साथे एड़ा ई करेया जाणा।" तेबे यहोवे रा डर लोका दे एड़ा ऊईगा कि सेयो एक मन ऊई की निकल़ी की आए। 8 तेबे तिने सेयो बेजेक शईरो दे गिणी ले ओर इस्राएलो रे 300,000 लोक ओर यहूदा रे गोत्रो रे 30,000 लोक ऊए। 9 शाऊले तिना दूता खे जो आए थे बोलेया, "तुसे गिलादो दे याबेशो रे लोका खे ईंयाँ बोलो कि काल जेबे तूप तेज ऊणी तेस बखते आसा तुसे बचाई लणे।" तेबे दूते जाई की याबेशो रे लोका खे सन्देश दित्तेया ओर सेयो खुश ऊए। 10 तेबे याबेशो रे लोके नाहाशो खे बोलेया, "काल आसा तुसा गे निकल़ी की आऊणा ओर जो कुछ तुसा खे अच्छा लगो से ई तुसे आसा साथे करेयो।"

11 दूजे दिने तड़के ई शाऊले लोका रे तीन दल बणाए ओर सेयो प्यागा तड़के ई अम्मोनिया रे डेरे बीचे आई की तिना खे काणे लगे ओर तूपा रे तेज ऊणे रे बखतो तक एड़े कांदे रये कि जो बची की निकल़े सेयो एथो तक तित्तर-बित्तर ऊए कि दो जणे बी एकी जगा दे कट्ठे नि रये। 12 तेबे लोक सेमुएलो खे बोलणे लगे, "जिने माणूंए बोलेया था कि क्या शाऊलो आसा पाँदे राज करना? तिना खे ल्याओ ताकि आसे तिना खे काई देऊँ।" 13 शाऊले बोलेया, "आजके दिने कोई नि काया जाणा, कऊँकि आजके दिन यहोवे इस्राएली लोका खे छुटकारा देई राखेया।"

14 तेबे सेमुएले इस्राएली लोका खे बोलेया, "आओ, आसे गिलगाल प्रदेशो खे चलूँए ओर तेथी फेर ये एलान करूँए कि शाऊल ई म्हारा राजा ए।" 15 तेबे सारे लोक गिलगालो खे चले, तेबे तिने तेथी यहोवे रे सामणे शाऊल राजा बणाया ओर तिने तेथी यहोवे खे मेलबलि चढ़ाए ओर तेथी शाऊल ओर सबी इस्राएली लोके बऊत खुशी मनाई।