1 एक दिन शाऊलो रे पाऊए योनाताने आपणे बाओ ते बिना बोले आपणे अथियार टोणे वाल़े जवानो खे बोलेया, "आओ, आसे तेथी पलिश्तिया री चौकिया गे चलूँए।" 2 तेस बखते शाऊल तो गिबा शईरो रे कनारे पाँदे मिग्रोन जगा रे दाड़नी रे डाल़ो निठे रूकी रा था ओर तेस साथे 600 लोक थे। 3 अहिय्याह पुरोईत शाऊलो साथे तेथी था, तिने मलमलो रा चोगा पईनी राखेया था। अहिय्याह अहीतूबो रा पाऊ था, अहीतूब ईकाबोदो रा पाई था, यो दोनों पीनहासो रे पाऊ थे, से एली पुरोईतो रा पाऊ था जो शीलो दे यहोवे रे मन्दरो दे पुरोईतो रा काम करो था।* पर तिना लोका खे पता नि था कि योनातान तिना बीचा ते बारे चली गा दा ए।

4 तिना काट्टिया बीचे, जिना रिये ऊई की योनातान पलिश्तिया री चौकिया गे जाणा चाओ था, दुँईं तरफा खे एक-एक पैनी चट्टान थी, एकी चट्टानी रा नाओं बोसेस ओर दूजिया रा नाओं सेने था। 5 एक चट्टान उत्तरो रिया तरफा खे मिकमाशो सामणे ओर दूजी दक्खणो रिया तरफा खे गेबा सामणे खड़ी थी। 6 तेबे योनाताने आपणे अथियार टोणे वाल़े जवानो खे बोलेया, "आओ, आसे तिना बिना खतना कित्ते रे लोका* रिया चौकिया गे चलूँए, क्या पता यहोवा म्हारी मताद करो, कऊँकि आसा खे जीत दलाणे रिया तँईं यहोवे खे कोई रोकी नि सकदा, तेबे तेथी चाए बऊत लोक ओ चाए थोड़े ओ।" 7 तेसरे अथियार टोणे वाल़े तेसखे ज्वाब दित्तेया, "जो कुछ तेरे मनो दे ए, सेई कर, तेती चल, मां तेरी इच्छा रे मुताबिक तां साथे रणा।" 8 फेर योनाताने तेसखे बोलेया, "सुण, आसे तिना सिपाईया रे सामणे काट्टिया ते पार जाऊँए ताकि सेयो आसा खे देखी सको। 9 जे सेयो आसा ते ईंयाँ बोलो, म्हारे आऊणे तक तेथी ठईरे दे रओ, तेबे तो आसा एथी थाले एते जगा देई खड़े दे रणा ओर तिना गे ऊबे नि जाणा। 10 पर जे सेयो आसा खे ईंयाँ बोलो कि एथी ऊबे चढ़ी की आसा गे आओ, तो आसा ये जाणी की ऊबे जाणा कि यहोवे तिना खे अराणे दे म्हारी मताद करनी।"

11 जेबे सेयो दोनो जणे पलिश्ती सिपाईया री चौकिया गे तिना रे सामणे चलीगे, तेबे पलिश्ती सिपाई बोलणे लगे, "देखो, इब्री लोक तिना बिला ते जेती सेयो लूकी रे थे निकल़ी की आऊणे लगी रे।" 12 जेबे चौकिया रे सिपाईए योनातान ओर तेसरे अथियार टोणे वाल़े खे बोलेया, "आसा गे ऊबे चढ़ी की आओ, तेबे आसे तुसा खे बताऊँए।" तेबे योनाताने आपणे अथियार टोणे वाल़े खे बोलेया, "मां पीछे-पीछे चढ़ी की आओ, कऊँकि यहोवे यो आज इस्राएलिया रे कब्जे दे करी देणे।" 13 तेबे योनातान आपणे आथा-पैरा रे पारे ऊबे चढ़ीगा ओर तेसरा अथियार टोणे वाल़ा बी तेस पीछे-पीछे चढ़ीगा। जेबे योनाताने पलिश्ती सिपाईया पाँदे अमला कित्तेया ओर सेयो थाले रूड़दे गये ओर तेसरा अथियार टोणे वाल़ा तेस पीछे-पीछे तिना खे कांदा गया। 14 ये पईला खून-खराबा था जो योनातान ओर तेसरे अथियार टोणे वाल़े ते ऊआ, तिने आदा बीगा जमीना दे कोई बीइ पलिश्तिया रे सिपाई काईते। 15 तेबे सारे पलिश्ती सिपाई जो डेरे दे, मैदानो दे, चौकिया वाल़े ओर अमला करने वाल़े थे थरथराणे लगे। तेबे परमेशरे बड़ा भूकम्प कित्तेया ओर सेयो ओर बी जादा थरथराणे लगे।

16 तेबे बिन्यामीन गोत्रो रे गिबा शईरो ते शाऊलो रे सिपाईए* देखेया कि पलिश्ती सैनिका री पीड़ कटणे ई लगी री ओर सेयो लोक ओरे-पोरे नठणे लगी रे। 17 तेबे शाऊले आपू साथले लोका खे बोलेया, "आपणी गिणती करी की देखो कि आसा बीचा एती कुण नि आ।" तिने गिणी की देखेया कि योनातान ओर तेसरा अथियार टोणे वाल़ा एती नि ए। 18 तेबे शाऊले अहिय्याह पुरोईतो खे बोलेया, "परमेशरो रा सन्दूक ओरे ल्याओ कि आसे पता करी ए कि तेती क्या ऊणे लगी रा।" तेस बखते परमेशरो रा सन्दूक इस्राएली लोका गे था। 19 शाऊल पुरोईतो साथे गल्ला करने लगी रा था कि पलिश्तिया रे डेरे दे आल्ला-गोल्ला जादा ऊणे लगेया, तेबे शाऊले पुरोईतो खे बोलेया, "रूकी जा, एबे आसा गे प्रभुए ते सला लणे रा बखत नि आ।"

20 तेबे शाऊल ओर तेस साथले सारे लोक कट्ठे ऊई की पलिश्तिया साथे लड़ाई करने खे गये, तेती तिने क्या देखेया कि तिना री सेना पज़ल ऊई की एक-एक सिपाईए री तलवार आपणे-आपणे साथिये पाँदे चलणे लगी री ओर तेतेरिया बजा ते तेती बऊत शोर-शराबा ऊणे लगी रा। 21 जो इब्री लोक पईले चऊँ कनारा ते आई की पलिश्ती सेना दे थे, सेयो बी शाऊल ओर योनातानो साथे गये दे इस्राएली लोका साथे मिली गे। 22 जितणे इस्राएली लोक एप्रैमो रे पाह्ड़ी इलाके दे लूकी गे थे, सेयो बी ये सुणी की कि पलिश्ती नठणे लगी रे, लड़ाईया दे आई की तिना रा पीछा करने लगे।

23 इस्राएली लोके बेतावेन शईरो रिया पोरलिया तरफा तक आपणे दुश्मणा रा पीछा कित्तेया। तेबे यहोवे तेस दिने इस्राएली लोका खे पलिश्ती सिपाईया खे अराणे दे तिना री मताद कित्ती। 24 पर इस्राएली लोक तेस दिने बऊत थके दे ओर पूखे थे, कऊँकि तिने सारा दिन कुछ पनि खाई राखेया था। कऊँकि शाऊले तिना खे कसम खुल़ाई की बोलेया था, "स्रापित ओ से, जो साँजा ते पईले कुछ खाओ, ईंयाँ मां आपणे दुश्मणा ते बदला लई सकणा।"

25 तेबे सारे इस्राएली लोक केसी बणो दे पऊँचे, जेती जमीना दे सयीत चूड़ने लगी रा था। 26 पर सेयो तेसा कसमा रे डरो रिया बजा ते सयीतो खे खाई नि सके। 27 पर योनाताने आपणे बाओ खे कसम देंदे ऊए नि सुणेया था, तेबे तिने आपणे आथो रे डण्डे रा मूरा आगे करी की सयीतो रे छते दे डबोया ओर सयीत निकाल़ी की खाया, तेबे तेसरे शरीरो दे जान आईगी। 28 तेबे लोका बीचा ते एकी माणूंए बोलेया, "तेरे बाओए लोका खे सख्ताईया दे कसम देई की बोलेया कि स्रापित ए से जो आजके दिन कुछ खाओ। लोक बऊत जादा थकी गे थे।" 29 योनाताने ज्वाब दित्तेया, "मेरे बाओ रिये कसमें लोका खे बऊत कष्ट देई राखेया, देखो, मैं एती सयीतो बीचा ते थोड़ा जा चाखी राखेया ओर मेरे शरीरो दे जान आईगी।" 30 जे आज लोक आपणे दुश्मणा री लूटा ते जो तिना खे मिली तेते ते मनमाना खांदे, तो कितणा अच्छा ऊँदा; तो आसा बऊत पलिश्ती काई देणे थे।

31 तेस दिने इस्राएली लोक मिकमाशो ते लई की अय्यालोनो तक पलिश्तिया खे कांदे गये ओर लोक बऊत जादा पूखे ओर थके दे थे। 32 इजी री खातर सेयो लूटा रे समानो पाँदे टुटी की पड़े ओर पेडा-बाकरिया, गाय-बल़द ओर बाच्छू लई की जमीना दे काई की तिना रा मास खूनो समेत खाणे लगे। 33 जेबे किनी माणूंए इजी रे बारे दे शाऊलो खे दशेया कि सेयो लोक खूनो समेत मास खाई की यहोवे रे खलाफ पाप करने लगी रे, तेबे शाऊले तिना खे बोलेया, "तुसे तो विश्वासघात करी राखेया, यबु एक बड़ा पात्थर मांगे खसकेयी की ल्याओ।" 34 तेबे शाऊले बोलेया, "लोका बीचे ओरे-पोरे फिरी की तिना खे बोलो कि आपणा-आपणा डांगर शाऊलो गे लई जाओ। तेथी बाडी की खाओ पर खूनो समेत खाई की यहोवे रे खलाफ पाप नि करो।" तेबे सबी लोके तेसा राती आपणे जानवर शाऊलो गे ल्याई की बाड़े ओर खाए। 35 तेबे शाऊले यहोवे खे एक बेदी बणाई, से तो पईली बेदी थी जो तिने यहोवे खे बणाई थी।

36 तेबे शाऊले लोका खे बोलेया, "आसा एसा ई राती पलिश्तिया रा पीछा करी की सेयो प्यागा तक लुटणे ओर तिना बीचा ते एक बी माणूं जिऊँदा नि छाडणा।" इस्राएली लोके ज्वाब दित्तेया, "जो कुछ ताखे ठीक लगो सेई कर।" पर पुरोईते बोलेया, "पईले आसे एती यहोवे ते पूछी लऊँए।" 37 तेबे शाऊले यहोवे ते पूछेया, "क्या आऊँ पलिश्तिया रा पीछा करुँ? क्या तां सेयो इस्राएलो रे कब्जे दे करी देणे?" पर तेसखे तेस दिने कोई ज्वाब नि मिलेया। 38 तेबे शाऊले बोलेया, "ओ प्रजा रे खास लोको, एती आई की जाणो ओर देखो कि आज पाप किंयाँ ऊई रा। 39 कऊँकि इस्राएलो खे छुड़ाणे वाल़े यहोवे री जिन्दगिया री कसम, जे से पाप मेरे पाऊ योनातानो ते बी ऊई रा ओ, तेबे बी से पक्का काया जाणा।" पर लोका बीचा ते किने बी तेसखे ज्वाब नि दित्तेया।

40 तेबे शाऊले सारे इस्राएली लोका खे बोलेया, "तुसे एकी तरफा खे ऊई जाओ ओर आऊँ ओर मेरा पाऊ दूजी तरफा खे ऊणे।" लोके शाऊलो खे ज्वाब दित्तेया, "जो कुछ ताखे अच्छा लगो सेई कर।" 41 तेबे शाऊले यहोवे खे बोलेया, "ओ इस्राएलो रे परमेशर, सच्च गल्ल बता कि पाप किने करी राखेया।" अगर जे मैं ओर मेरे पाऊए पाप करी राखेया ओ तो ऊरीम दे, पर जे इस्राएली लोके पाप करी राखेया ओ तो तुम्मीम दे।* तेबे शाऊल ओर योनातान दोषी ऊईगे पर बाकि सारे इस्राएली लोक निर्दोष निकल़े। 42 फेर शाऊले बोलेया, "मेरे ओर मेरे पाऊ योनातानो रे नाओं पाँदे पर्ची पाओ।" तेबे पर्ची योनातानो रे नाओं पाँदे निकल़ी।

43 तेबे शाऊले योनातानो के बोलेया, "मांगे बता कि तैं क्या करी राखेया।" योनाताने तेसखे बोलेया, "मैं आपणे आथो रे डण्डे साथे थोड़ा जा सयीत चाखी तो लया दा ए ओर देख, एबे इजी बजा ते माखे तो मरना ई ए।" 44 शाऊले बोलेया, "यहोवा मां साथे एड़ा ई करो, बल्कि इजी ते बी जादा करो; जे आऊँ से नि करुँ जेते रे बारे दे मैं कसम खाई राखी ए। ओ योनातान, तूँ पक्का काया जाणा।" 45 पर लोके शाऊलो खे बोलेया, "योनातान नि काया जाणा, क्ऊँकि परमेशरे तेसरे जरीये इस्राएली लोका रा एड़ा बड़ा छुटकारा करी राखेया। एड़ा नि ऊणा! यहोवे री जिन्दगिया री कसम, तेसरा कोई बी कुछ नि बगाड़ी सकदा, कऊँकि ये सब काम करने रिया तँईं आजके दिने यहोवे तेसरी मताद करी राखी।" तेबे प्रजा रे लोके योनातान बचाई ला ओर से नि काया।

46 तेबे शाऊल पलिश्ती सिपाईया रा पीछा करना छाडी की वापस ऊईगा ओर पलिश्ती सिपाई बी आपणिया जगा खे चली गे।

47 जेबे शाऊले इस्राएल देशो दे आपणा राज्य पक्का कित्तेया, तेबे से आपणे चऊँ कनारले दुश्मणा साथे लड़ेया। से मोआबी, अम्मोनी, एदोमी, पलिश्ती लोका साथे लड़ेया ओर सोबा शईरो रे राजेया साथे बी लड़ेया ओर जेती-जेती से जाओ था तेथी तेसरी जीत ओ थी। 48 तेबे तिने युद्ध करी की अमालेकी लोक अराए ओर ईंयाँ तिने इस्राएली लोक तिना खे लुटणे वाल़ेया ते बचाए।

49 शाऊलो रे तीन पाऊ योनातान, यिशबी ओर मलकीश थे। ओर तेसरिया दूई बेटिया रे नाओं यो थे, बडिया रा नाओं मेरब ओर छोटिया रा नाओं मीकल था। 50 शाऊलो री लाड़िया रा नाओं अहीनोअम था जो अहीमासो री बेटी थी। शाऊलो रे परदान सेनापतिये रा नाओं अब्नेर था जो शाऊलो रे चाचे नेरो रा पाऊ था। 51 शाऊलो रा बाओ कीश ओर अब्नेरो रा बाओ नेर, ये दोनो अबीएलो रे पाऊ थे। 52 शाऊल पूरी जिन्दगी पलिश्तिया साथे युद्ध करदा रया, जेबे-जेबे शाऊलो खे कोई वीर ओर अच्छा योद्धा मिलो था, तेबे-तेबे से तेसखे आपू गे राखी लो था।