1 सेमुएल 9

सेमुएलो रा शाऊलो खे अभिषेक करना

1 बिन्यामीनो रे गोत्रो दे कीश नाओं रा एक मर्द था, जो बड़ा ई तनवान ओर जाणेया माणेया दा माणूं था। से अपीहो रे पाऊ बकोरतो रा पड़पोता था, से सरोरो रा पोता था, ओर से अबीएलो रा पाऊ था, इना रा मूलमर्द बिन्यामीन ई था। 2 कीशो रा एक जवान पाऊ था जेसरा नाओं शाऊल था से सारे इस्राएलो दे सबी ते सुन्दर था। शाऊल इतणा लाम्बा था कि दूजे लोक तेसरे फरकुए तक ई आओ थे।

3 एकी दिने शाऊलो रे बाओ कीशो रिया गह्दिया राची गिया, तेबे कीशे आपणे पाऊ शाऊलो खे बोलेया, "एकी सेवको खे आपू साथे लई जा ओर गह्दिया खे टोल़ी की ली आओ।" 4 तेबे शाऊल आपणे एकी सेवको खे लई की एप्रैमो रे पाह्ड़ी इलाके ते ऊँदे ऊए शलीशा इलाके रिये गये, पर तिना खे सेयो गह्दिया नि मिलिया। फेर सेयो शालीम नाओं रे इलाके दे बी गये ओर तेती बी तिना खे सेयो गह्दिया नि मिलिया। तेबे सेयो बिन्यामीन गोत्रो रे इलाके दे गये, पर तेती बी गह्दिया नि मिलिया। 5 जेबे सेयो बादो ते सूफ नाओं रे इलाके दे आए, तेबे शाऊले आपणे सेवको खे बोलेया, "आओ आसे वापस आपणे कअरो खे चलिए, एड़ा नि ओ कि मेरा बाओ गह्दिया री फिकर करने रे बजाये आसा री फिकर करने लगो!" 6 पर तेसरे सेवके बोलेया, "ओ मेरे मालक! सुणो, एते शईरो दे यहोवे रा एक नबी रओआ, ओर लोक तेसरा बऊत आदरमान करोए कऊँकि से जो कुछ बी बोलोआ से सब पूरा ओआ। आओ एबे आसे तेती चलूँए, शायद से आसा खे ये बताई देयो कि म्हारिया गह्दिया केयी मिलणिया।"

7 शाऊले आपणे सेवको खे ज्वाब दित्तेया, "सुण, जे आसे तेस नबीए गे जाऊँगे तो तेसखे देणे खे क्या निणा? देख, म्हारी थैलिया रिया रोटिया बी खत्म ऊई गी रिया, जो आसे यहोवे रे तेस नबीए खे देईए, ओर एबे पेंटा जोगी कोई चीज नि ए।" 8 सेवके फेर शाऊलो खे बोलेया, "मांगे तो चाँदिए रा एक छोटा जा सिक्का ए*9:8 चाँदिए रा एक छोटा जा सिक्का ए शेकेलो खे बोलोए जो लगभग तीन ग्राम ए , मां सेई यहोवे रे नबीए खे देणा, ताकि से आसा खे बताओ कि आसे केयी जाईए!" 9 पईलके जमाने दे तो इस्राएलो दे जेबे कोई परमेशरो ते कुछ जाणना चाओ था तेबे से एड़ा बोलो था, "चलो आसे दर्शिये गे चलूँए", कऊँकि जेसखे आजकाल नबी बोलोए, तेसखे पईलके जमाने दे दर्शी*9:9 दर्शी ऊणे वाल़िया गल्ला खे जाणने वाल़ा ओर बताणे वाल़ा बोलो थे। 10 तेबे शाऊले आपणे सेवको खे बोलेया, "तैं ठीक बोलेया, आओ आसे तेती चलूँए।" तेबे सेयो सूफ शईरो दे गये जेती यहोवे रा दर्शी था। 11 तेस शईरो री चढ़ाई चढ़दे बखते तिना खे कुछ जवान बेटिया मिलिया जो पाणी परने आईया थिया, तिने तिना बेटिया ते पूछेया, "क्या दर्शी एती ए?" 12 तिने ज्वाब दित्तेया, "आ, से एथी ई अया, से तुसा ते आगे ई जाई रा, जे तुसे छोड़ करोगे तो से तुसा खे मिली जाणा, कऊँकि से आज ई शईरो दे आई रा, से एबु पाह्ड़ो पाँदे आराधना रिया जगा दे ईसा लणे खे जाणा जेती लोका आपणी पेंट चढ़ाणी। 13 जिंयाँ ई तुसे शईरो दे जाणे, से तेथी तुसा खे मिली जाणा, इजी ते पईले कि से खाणा खाणे खे ऊबे आराधना रिया जगा दे जाओ। कऊँकि तेसरे आऊणे ते पईले लोका खाणा नि खाणा, कऊँकि तेस बलिदानो पाँदे आशीष देणी, तेबे लोका खाणा खाणा। एबे तुसे ऊबे जाओ, से तुसा खे तेती मिली जाणा।" 14 जेबे शाऊल ओर तेसरा सेवक चढ़ी की शईरो दे पऊँचे तिंयाँ ई सेमुएल तिना रे सामणे आया, कऊँकि से आराधना करने रिया जगा खे ऊबे जाणे खे निकल़ेया था।

15 शाऊलो रे आऊणे ते एक दिन पईले यहोवे सेमुएल सावधान करी राखेया था कि, 16 "काल मां एस ई बखते तांगे बिन्यामीनो रे इलाके ते एक मर्द पेजणा, तेसरा ई तैं मेरी इस्राएली प्रजा पाँदे परदान ऊणे खे अभिषेक करना। तेस मेरी प्रजा पलिश्ती लोका ते छुड़ाणी, कऊँकि तिना रा चींगणा मांगे पऊँची रा, इजी खे मैं आपणी प्रजा पाँदे कृपा दृष्टि करी राखी।"

17 तेबे जेबे सेमुएलो खे शाऊल दिशेया, तेबे यहोवे तेसखे बोलेया, "जेस माणूंए रे बारे दे मैं तांगे दशेया था से येईए; मेरी प्रजा पाँदे एस ई राज करना।"

18 तेबे शाऊल शईरो रे द्वारो गे सेमुएलो रे नेड़े जाई की बोलणे लगेया, "माखे बता कि दर्शीए रा कअर केई आ।" 19 तिने ज्वाब दित्तेया, "दर्शी तो आऊँ ई आ, मांते आगे-आगे आराधना रिया जगा दे ऊबे चढ़ी जा, कऊँकि आज आसा कट्ठे खाणा खाणा ओर प्यागा जो कुछ तेरे मनो दे प्रश्न ए तिना रे बारे दे बताई की मां तूँ पेजी देणा। 20 ओर तेरी गह्दिया जिना खे तीन दिन राचे दे ऊईगे दे, तिना री कोई फिकर नि कर, कऊँकि सेयो मिलीगिया रिया ए। ओर आऊँ एती ताखे ये बताणे खे आई रा कि इस्राएलो रे लोका री सारी उम्मीद तां पाँदे ओर तेरे बाओ रे कराणे पाँदे ए।" 21 शाऊले ज्वाब दित्तेया, "आऊँ बिन्यामीन गोत्रो रा ए, जो इस्राएलो रा सबी ते छोटा गोत्र आ, ओर मेरा कराना तेते गोत्रो दे बी सबी ते छोटा ए! तो तूँ मां साथे एड़िया गल्ला कऊँ बोलणे लगी रा?"

22 तेबे सेमुएल शाऊल ओर तेसरे सेवको खे आराधना रिया जगा दे लईगा ओर तेती कमरे*9:22 कमरे तेती ऊच्चिया जगा दे एक बड़ा कमरा था जेती लोक बलिया रा खाणा खाओ थे। दे पऊँचाई की निऊँदे वाल़े जो तकरीबन 30 माणूं थे, तिना साथे खास जगा दे बठयाल़ी ते। 23 तेबे सेमुएले बोटिये खे बोलेया, "जो टुकड़ा मैं तांगे देई की, आपू गे राखणे खे बोलेया था, तेस लई आओ।" 24 बोटिये खुटी मासो✝9:24 खुटी मासो लेवी. 10:14-15 समेत चकी की शाऊलो सामणे खाणे खे राखी ती। तेबे सेमुएले बोलेया, "जो मेरिया तरफा ते तेरिया तँईं राखी राखेया था से तां सामणे राखी राखेया, तेस खा। कऊँकि से तेरिया तँईं एस ठराए रे बखतो तक राखी राखेया था, जेतेरिया तँईं मैं लोका खे निऊँदा दित्तेया था।" शाऊले तेस दिने सेमुएलो साथे रोटी खाई। 25 तेबे सेयो पाह्ड़ो पाँदे आराधना रिया जगा ते उतरी की शईरो दे आए ओर तिने कअरो रे छतो पाँदे शाऊलो साथे गल्ला कित्तिया।

26 प्यागा सेयो तड़के उठे ओर प्यागा प्रयासा ऊँदे ई सेमुएले शाऊलो खे छतो पाँदे बुलाई की बोलेया, "उठ, मां तूँ बिदा करना।" तेबे शाऊल उठेया ओर से ओर सेमुएल दोनो तेस कअरो ते बारे निकल़ी गे। 27 जेबे सेयो ऊँदे उतरदे ऊए शईरो रे कनारे पाँदे पऊँचणे वाल़े थे तेबे सेमुएले शाऊलो खे बोलेया, "आपणे सेवको खे आसा ते आगे जाणे खे बोल।" ओर तूँ आपू एथी रूकी जा, कऊँकि मांगे यहोवे रिया तरफा ते तेरिया तँईं एक खास संदेश पऊँची रा। तेबे तेसरा सेवक तेथा ते आगे निकल़ी गा।