1 सेमुएल 30

दाऊदो रा अमालेकिया पाँदे जीतणा

1 दो दिन बाद जेबे दाऊद आपणे माणूंआ समेत सिकलग शईरो दे पऊँचेया, तेबे तिने क्या देखेया कि अमालेकिये दक्खण देश ओर सिकलग शईरो पाँदे अमला करिता रा ए ओर सिकलग शईर आग लगाई की फूकी ता रा ए। 2 तेथो रिया जवाणसा, छोटे-बड़े जितणे लोक थे सबी खे गुलामिया दे लईगे, तिने कोई काया नि, पर सबी खे लई की आपणी बाटा दे चली गे। 3 इजी री खातर जेबे दाऊद आपणे माणूंआ समेत तेस सिकलग शईरो दे पऊँचेया, तेबे शईर तो फूखी गा था ओर जवाणसा ओर माठे-बेटिया गुलामिया दे चली गे थे। 4 दाऊदो रिया दोनो लाड़िया, यिज्रेल अहीनोअम ओर कर्मेलो रे नाबालो री लाड़ी अबीगैल, गुलामिया दे चली गी थी। 5 तेबे दाऊद ओर सेयो लोक जो तेस साथे थे जोरे की इतणे रोए कि बादो ते तिना दे रोणे री तागत नि रयी। 6 तेबे दाऊद बड़ी मुसीबता दे पड़ीगा, कऊँकि लोक आपणे माठे-बेटिया रिया बजा ते तेस पाँदे पत्थराव करने री चर्चा करने लगी रे थे। पर दाऊदे आपणे परमेशर यहोवे खे याद करी की तागत पाई।

7 तेबे दाऊदे अहीमेलेको रे पाऊ एब्यातार पुरोईतो खे बोलेया, "एपोदो खे मांगे ली आओ।" तेबे से तेसखे दाऊदो गे ली आया। 8 दाऊदे यहोवे ते पूछेया, "क्या आऊँ आपणे दुश्मणा रा पीछा करुँ? क्या से जाई की पकड़ी लणा?" यहोवे तेसखे बोलेया, "पीछा कर, कऊँकि तां से पक्का पकड़ना ओर बिना शक सब कुछ छुड़ाई लणा।" 9 तेबे दाऊद आपणे 600 माणूंआ खे लई की बसोर नाओं रे नाल़े तक पऊँचेया। तेती कुछ लोक पीछे रयी गे। 10 तेबे दाऊद 400 माणूंआ समेत पीछा करने खे चली गा, पर 200 जो एड़े थकी गे थे कि बसोर नदिया ते पार नि जाई सके, तेथी रये।

11 जेबे दाऊद आपणे 400 माणूंआ साथे गया तेबे तिना खे एक मिस्री मर्द मैदानो दे मिलेया, तिने दाऊदो गे लई जाई तेसखे रोटी दित्ती ओर तिने से खाई, तेबे तेसखे पाणी पल़्याया, 12 तेबे तिने तेसखे दाऊगल़े री एक टिक्किया रा टुकड़ा ओर दो गुच्छे अंगूरा रे दित्ते। जेबे तिने से खाया तेबे तेसरिया आखी दे चमक आई, कऊँकि तिने तीन दिन ओर तिऊँ राती ते ना तो रोटी खाई राखी थी ओर ना ई पाणी पी राखेया ता। 13 तेबे दाऊदे तेसते पूछेया, "तूँ केसरा माणूं ए? ओर केथो राए?" तिने बोलेया, "आऊँ तो मिस्री जवान ओर एक अमालेकी माणूंए रा दास ए ओर तीऊँ दिना ते पईले ते बमार ए ओर मेरे स्वामिए आऊँ छाडीता दा ए। 14 आसे लोके करेतिया रे दक्खण दिशा दे, यहूदा रे देशो दे ओर कालेबो री दक्खण दिशा दे अमला कित्तेया ओर सिकलग शईर आग लगाई की फूकी ता था।" 15 दाऊदे तेसते पूछेया, "क्या तूँ माखे तेस दलो तक पऊँचाई सकोआ?" तिने बोलेया, "मांते पईले परमेशरो री कसम खा कि तां ना तो आऊँ जानी ते मारना ओर ना ई मेरे स्वामिए रे आथो दे करना, तेबे मां तूँ तेस दलो गे पऊँचाई देणा।" 16 ओर दाऊदे तेसरी गल्ल मानी ली, जेबे तिने सेयो पऊँचाए, तेबे देखणे दे आया कि सेयो सारे जमीना दे बैठी की खाओ-पियोए ओर तेसा बड़ी लूटा रिया बजा ते, जो सेयो पलिश्तिया रे देश ओर यहूदा रे देशो ते ल्याये थे, नाचणे लगी रे।

17 इजी री खातर दाऊद आपणे साथिया साथे मिली की तिना खे राती रे पईले पईरो ते लई की दूजे दिनो री साँजा तक कांदा रया, एथो तक कि 400 जवाना खे छाडी की, जो ऊँटा पाँदे चढ़ी की नठीगे, तिना बीचा ते एक बी माणूं नि बचेया। 18 जो कुछ अमालेकी लूटी की लईगे थे से सब दाऊद ओर तेसरे साथिये छुड़ाई ता ओर दाऊदे आपणी दोनो जवाणसा बी छुड़ाई तिया। 19 बल्कि तिना रे क्या छोटे, क्या बड़े, क्या माठे, क्या बेटिया, क्या लूटा रा माल, सब कुछ जो अमालेकी लईगे थे, तिना बीचा ते कोई चीज नि रयी जो तिना खे नि मिली ओ। कऊँकि दाऊद सारा का सारा सिकलग शईरो खे वापस ली आया। 20 तेबे दाऊदे अमालेकिया री सारी पेडा-बाकरिया ओर गायी-बल़द बी लूटी ले ओर लोक जानवरा खे आगे खेददे गये ओर बोलदे गये कि ये दाऊदो री लूट ए। 21 तेबे दाऊद आपणे साथिया समेत तिना 200 मर्दा गे आया, जो एड़े थकी गे थे कि दाऊदो पीछे-पीछे नि जाई सके थे ओर बसोर नाल़े गे छाडी ते थे ओर सेयो दाऊद ओर तेस साथले लोका खे मिलणे खे चले। दाऊदे तिना गे पऊँची की तिना रा सुख-साँद पूछेया। 22 तेबे तिना लोका बीचा ते जो दाऊदो साथे गये थे सबी दुष्ट ओर ओछे लोके बोलेया, "ये लोक आसा साथे नि गये थे, इजी बजा ते आसा इना खे आपणे छुड़ाए रे लूटा रे मालो बीचा ते कुछ नि देणा, बस एक-एक माणूंए खे तेसरी लाड़ी ओर बाल-बच्चे देणे, ताकि सेयो तिना खे लई की चली जाओ।" 23 पर दाऊदे बोलेया, "ओ मेरे पाईयो, तुसे तेस मालो साथे एड़ा नि करी सकदे जो यहोवे आसा खे देई राखेया ओर तिने म्हारी रक्षा कित्ती ओर से दल जिने आसा पाँदे अमला कित्तेया था आसा रे आथो दे करी ता। 24 इजी रे बारे दे तुसा री केस सुणनी? लड़ाईया दे जाणे वाल़े रा जेड़ा इस्सा ओ, समानो गे बैठे रे माणूंआ रा बी तेड़ा ई ऊणा, दुँईं खे एकी जेड़ा इस्सा मिलणा।" 25 दाऊदे इस्राएली लोका खे एड़ी ई बिधि ओर नियम ठराया ओर से तेस दिनो ते लई की आगो तक मशाल बणी रा। 26 सिकलग शईरो दे पऊँची की दाऊदे यहूदी बुजुर्गा गे जो तेसरे दोस्त थे लूटा रे मालो बीचा ते कुछ-कुछ पेजेया ओर ये सन्देशा पेजेया, "यहोवे रे दुश्मणा ते लई री लूटा बीचा ते तुसा खे ये पेंट ए।" 27 दाऊदे इना शईरा रे बुजुर्गा खे लूटा रा समान पेजेया: मतलब बेतेल नेगेब जगा दे रामोत, यत्तीर, 28 अरोएर, सिपमोत, एशतमो, 29 राकाल, यरहमेलिया रे शईर, केनिया रे शईर, 30 होर्मा, कोराशान, अताक, 31 हेब्रोन बगैरा जितणी जगा दे दाऊद आपणे माणूंआ साथे लूकदा फिरेया करो था, तिना सबी जगा रे बुजुर्गा गे तिने कुछ-कुछ पेजेया।