बिधान 18

लेविया ओर पुरोईता रा इस्सा

1 लेवी पुरोईता रा, बल्कि सारे लेवी गोत्रिया रा, इस्राएलिया साथे कोई पाअग या इस्सा नि ओ; सेयो यहोवे री होमबलिया बीचा ते खाओगे ओर सेई तिना रा आपणा इस्सा ऊणा। 2 तिना रा आपणे पाईया बीचे कोई पाअग नि ओ, कऊँकि आपणे वादे रे मुताबिक यहोवा तिना रा आपणा इस्सा ठईरी रा।

3 चाए गाय-बल़द, चाए पेडा-बाकरिया रा मेलबलि ओ, तिजी खे बलि करने वाल़े लोका रिया तरफा ते पुरोईता रा अक्क ए कि सेयो तेसरी कान्द, दोनो खाखा ओर पेट पुरोईतो खे देओ।*18:3 1 कुरिन्थ 9:13 4 तैं तेसखे आपणी पईली फसला रा नज्ज, अंगूरा रा पईला रस, शुद्ध जैतूनो रा तेल ओर आपणी पेडा री से ऊन देणी जो पईली बार सऊँल़ी राखी ओ, 5 कऊँकि तेरे परमेशर यहोवा तेरे सब गोत्रो बीचा ते लेवी छाँटी ले रे, ताकि लेवी ओर तेसरे वंश सदा तेसरे नाओं ते सेवा-टईल करने खे आजीर ओया करो।

6 तेबे जे कोई लेवी इस्राएलिया रे शईरो रे केसी ते, जेती से परदेशिए जेड़ा रओआ, आपणे मनो री बड़ी इच्छा ते तेते जगा रे जाओ जो यहोवे छाँटी लणी, 7 तो आपणे सबी लेवी पाईया जेड़ा, जो तेती आपणे परमेशर यहोवे सामणे आजीर ऊणे, से पुरोईतो रे रूपो रे परमेशरो री सेवा-टईल करो। 8 ओर आपणे बुजुर्गा रे पाअगो री कीमता खे छाडी की तेसखे रोटिया रा पाअग बी तिना जेड़ा मिलेया करना।

मूर्तिपूजा करने वाल़ेया ते सावधान

9 जेबे तूँ तेते प्रदेशो दे पऊँचो जेतेखे तेरा परमेशर यहोवा ताखे देओआ, तेबे तेथो री जातिया जेड़े नीच काम नि करने। 10 तां बीचे एड़ा कोई नि ओ जो आपणे माठे या बेटिया खे आगी रे होम करी की चढ़ाणे वाल़ा या चूठी भविष्यबाणी बोलणे वाल़ा, शुभ-अशुभ मुर्ह्त मानणे वाल़ा, टोणा-टोटका या तान्त्रिक, 11 डाऊआ ते पूछणे वाल़ा, जो पूत-प्रेता खे बुलाओआ, या पितरा खे जगाणे वाल़ा ओ।

12 कऊँकि जितणे एड़े-एड़े काम करोए सेयो सारे यहोवे सामणे नीच काम ए ओर इना कामा रिया बजअ ते से तिना खे तेरे सामणे ते निकयाल़ने वाल़ा ए। 13 तूँ आपणे परमेशर यहोवे सामणे निर्दोष बणेया रा रओ।*18:13 मत्ती 5:48

चूठे ओर सच्चे भविष्यवक्ता

14 सेयो जातिया जिना खे तूँ निकयाल़ने वाल़ा ए, जो शुभ-अशुभ मुर्ह्त मानणे वाल़े ओर चूठी भविष्यबाणी बोलणे वाल़ेया री सुणेया करोए, पर ताखे तेरे परमेशर यहोवा एड़ा करने नि दित्तेया।

15 तेरा परमेशर यहोवा तां बीचे ए, मतलब तेस तेरे साथी इस्राएलिया पाईया बीचा ते, तुसा रिया तँईं मां जेड़ा एक भविष्यवक्ता पेजणा, जो कुछ से तुसा खे बोलो, से करना।*18:15 मत्ती 17:5, मरक 9:7, लूक 9:35 16 ये तेरी तेसा बिनतिया रे मुताबिक ऊणा, जो तैं होरेब पाह्ड़ो रे नेड़े सभा रे दिने आपणे परमेशर यहोवे ते कित्ती थी कि मां ना तो आपणे परमेशर यहोवे री आवाज फेर सुणनी ओर ना से आग फेर देखणी, केथी एड़ा नि ओ कि मरी जाऊँ।

17 तेबे यहोवे माखे बोलेया, "यो जो बोलोए से ठीक ई बोलोए। 18 इजी री खातर मां तिना रिया तँईं तिना रे पाईया बीचा ते तां जेड़ा एक भविष्यवक्ता खड़ा करना ओर जेसा-जेसा गल्ला री आज्ञा मां तेसखे देया करनी, सेई तेस तिना खे सुणाया करनी। 19 ओर जो माणूं तेस भविष्यवक्ते री नि सुणोगा, तो मां तेतेरा साअब तेसते लणा।*18:19 प्रेरित 3:23 20 पर जो भविष्यवक्ता कमण्ड करी की मेरे नाओं ते एड़ा कोई वचन बोलो जेतेरी आज्ञा मैं तेसखे नि देई राखी ओ या पराये देवतेया रे नाओं ते कुछ बोलो, से भविष्यवक्ता काई देणा।"

21 जे तूँ आपणे मनो रे एड़ा सोचे, "जो वचन यहोवे नि बोलेया तेस आसे किंयाँ पछयाणूँ?" 22 तो पछयाण ये कि जेबे कोई भविष्यवक्ता यहोवे रे नाओं ते कुछ बोलो, तेबे जे से वचन कुछ नि कटो ओर पूरा नि ऊई जाओ, तो से वचन यहोवे रा बोलेया रा निए; बल्कि तिने भविष्यवक्ते ये गल्ल कमण्ड करी की बोली राखी, तैं तेसते डरना नि।