1 जेस मर्दो रे अण्ड-कोष कुचल़ी राखे ओ या गुप्तांग बाडीता रा ओ तेसरा यहोवे री धर्मसभा रे आऊणा वर्जित ए।

2 कोई कुकर्मो साथे जम्मेया रा यहोवे री सभा दे नि आओ, बल्कि दसा पीढ़िया तक तेसरे वंशो रा कोई बी यहोवे री सभा दे नि आओ।

3 कोई अम्मोनी या मोआबी लोक यहोवे री सभा रे नि आओ, तिना री दसा पीढ़िया तक कोई बी यहोवे रिया सभा रे कदी नि आओ। 4 इजी बजअ ते कि जेबे तुसे मिस्र प्रदेशो ते निकल़ी की आऊणे लगी रे थे, तेबे सेयो नज्ज पाणी लई की बाटा रे तुसा खे मिलणे नि आए ओर ये बी कि तिने अरम्नहरैम प्रदेशो रे पतोर शईरो वाल़े बोरो रे पाऊ बिलामो खे ताखे स्राप देणे खे दक्षणा दित्ती। 5 पर तेरे परमेशर यहोवा बिलामो री नि सुणी; पर तेरे परमेशर यहोवा तेरिया तँईं तेसरा स्राप आशीषा रे बदली ता, कऊँकि तेरा परमेशर यहोवा तां साथे प्यार राखोआ। 6 तैं पूरी जिन्दगी तिना रा कल्याण या पला करने रा कदी नि सोचणा।

7 केसी एदोमिये ते नफरत नि करनी, कऊँकि से तेरा पाई ए; केसी मिस्रो रे रणे वाल़ेया साथे बी नफरत नि करनी, कऊँकि तेसरे प्रदेशो रे तूँ परदेशी ऊई की रया था। 8 एदोमी ओर मिस्रिया रे जो पड़पोते पैदा ओ, सेयो यहोवे री सभा रे आओ।

9 जेबे तूँ आपणे दुश्मणा साथे लड़ने खे डेरे लगाए, तेबे सबी प्रकारा री बुरी गल्ला ते बचेया रा रया।

10 जे तां बीचे कोई एड़ा मर्द ओ जेसरे वीर्य राथिए खे कुदरती निकल़ी जाओ, तो से डेरे ते बारे जाओ ओर पीतरे नि आओ। 11 पर सांजका बखत ऊणे ते थोड़ी देर पईले से नाह्यी लो ओर जेबे सूरज डूबी जाओ तेबे डेरे ते पीतरे आई जाओ।

12 तूँ डेरे ते बारे एक शौचालय री जगा बणाया ओर शौच करने खे तेथी जाया करना। 13 तेरे अथियारा बीचा ते तांगे खणने खे गईंती बी ऊणी चाईयो ओर जेबे तूँ शौच करने खे बैठो, तेबे तिजी साथे खणी की गन्द टखी देणा। 14 कऊँकि तेरा परमेशर यहोवा तेरे दुश्मणा ते ताखे बचाणे ओर तेरे दुश्मणा खे तेरे वशो रे करने खे तेरे डेरे बीचे कूमेया करना, इजी री खातर तेरा डेरा पवित्र रणा चाईयो, एड़ा नि ओ कि से तां बीचे कोई अशुद्ध चीज देखी की वापस ऊई जाओ।

15 जो दास आपणे स्वामिए गे ते नठी की तांगे आओ, से तेसरे स्वामिए गे नि पकड़वाणा, 16 से तां बीचे जो शईर तेसखे अच्छा लगो तिदे ई तां साथे रओ ओर तैं तेस पाँदे अन्देर नि करना।

17 इस्राएली जवाणसा देवदासिया रे रूपो दे व्याभिचार नि करो ओर ना ई इस्राएली मर्दा बीचे कोई एड़ा बुरा काम करने वाल़ा ओ। 18 तैं वेश्यापनो री कमाई चाए मर्द ओ चाए जवाणस केसी मान्नता खे पूरी करने खे आपणे परमेशर यहोवे रे कअरे नि ल्याऊणी, कऊँकि तेरे परमेशर यहोवे रे नेड़े यो दोनो कमाईया नीच काम ए।

19 तैं आपणे केसी इस्राएली पाईए खे ब्याजो पाँदे कर्ज नि देणा, चाए पैसा ओ, चाए खाणे री चीज, चाए कोई एड़ी चीज ओ जो ब्याजो पाँदे देई जाओई, तेसखे ब्याजो पाँदे नि देणी। 20 तूँ परदेसिये खे तो ब्याजो पाँदे कर्ज दे, पर आपणे केसी इस्राएली पाईए साथे एड़ा नि करना, ताकि जेस प्रदेशो रा मालक ऊणे खे तूँ जाणे लगी रा, तेती जेस-जेस कामो रे आपणा आथ लगाए, तिना सबी रे तेरा परमेशर यहोवा ताखे आशीष देओ।

21 जेबे तूँ आपणे परमेशर यहोवे खे मान्नता माने, तो तिजी खे पूरी करने रे देर नि करनी, कऊँकि तेरे परमेशर यहोवे तांते से जरूर लणी ओर देरी करने ते तूँ पापी ठईरना।* 22 पर जे तूँ मान्नत नि माने, तो तां पाँदे कोई दोष निए। 23 जो बी मान्नता तेरे मुंओ ते निकल़ो तिजी खे पूरा करने रे चौकसी करनी, तूँ आपणे मुंओ ते वचन देई की आपणी इच्छा ते आपणे परमेशर यहोवे खे जेड़ी मान्नता माने, सेई आजादिया रे पूरी करनी।

24 जेबे तूँ केसी दूजे रे अंगूरा रे बगीचे दे जाए, तेबे पेट परी की मनमाने अंगूर खा तो खा, पर आपणे पांडे रे कुछ नि राखणा। 25 जेबे तूँ एकी दूजे री खड़िया फसला रे डोरूआ रे जाए, तेबे तूँ आथो ते सिल्ले तोड़ी सकेया, पर तैं केसी दूजे री खड़ी फसला रे दराटी नि लगाणी।*