बिधान 19

शरण लणे वाल़ेया खे शईर

1 जेबे तेरा परमेशर यहोवा तिना जातिया खे काडी की नाश करो जिना रा प्रदेश से ताखे देओआ ओर तूँ तिना रे प्रदेशो रा अक्कदार ऊई की तिना रे शईरो दे ओर कअरो दे रणे लगे, 2 तेबे आपणे प्रदेशो बीचे जेतेरा मालक तेरा परमेशर यहोवा ताखे करी देओआ तीन शईर आपू खे चूणी लणे। 3 ओर तैं आपू खे बाटा बी बनाणियां ओर आपणे प्रदेशो रे जो तेरा यहोवा ताखे देओआ तीन पाअग करी देणे, ताकि हर एक खूनी तेथी नठी जाओ।

4 जो खूनी तेथो खे नठी की आपणे प्राण बचाओ, से एड़ा ओ, मतलब से केसी साथे पईले तेई बैर राखो या से जाणी-बूजी की नि काई राखेया ओ 5 जिंयाँ कोई केसी पाईए साथे जंगल़ो रे लकड़ू बाडणे खे जाओ ओर डाल़ बाडणे खे क्वाड़ी आथो रे चको ओर क्वाड़ी थरे ते निकल़ी की तेस पाईए खे एड़ी लगो कि से मरी जाओ तो से तिना शईरा बीचा ते केसी रे बी नठी की शरण लई सकोआ ओर आपणे प्राण बचाई की जिऊँदा रई सकोआ।

6 एड़ा नि ओ कि से शरण शईर दूर ऊणे रिया बजअ ते खूनो रा बदला लणे वाल़ा जो काई राखेया तेसरा नेड़ो रा रिश्तेदार आपणे गुस्से री जल़ना रे तेसरा पीछा करी की तेसखे बाटा रेई पकड़ी की काई देओ, हालाँकि से मौता री सजा जोगा निए, कऊँकि से तेस पाईए साथे बैर नि राखो था। 7 इजी री खातर ताखे आऊँ ये आज्ञा देऊँआ कि आपू खे तीन शईर लग करी की राखणे।

8 जे तेरा परमेशर यहोवा तेसा कसमा रे मुताबिक जो तिने तेरे बुजुर्गा ते खाई थी तेरा बन्ना बढ़ाई की से सारा प्रदेश ताखे देई देओ, जेतेखे देणे रा वादा तिने तेरे बुजुर्गा साथे कित्तेया था, 9 जे तूँ इना सबी आज्ञा खे मानणे दे जो आज आऊँ ताखे देऊँआ चौकसी करे ओर आपणे परमेशर यहोवे साथे प्यार राखे ओर सदा तेसरी आज्ञा खे मानदा रओ, तो इना तिंऊँ शईरा ते जादा ओर बी तीन शरण शईर लग करी देणे, 10 ताकि तेरे तेते प्रदेशो रे जो तेरा परमेशर यहोवा ताखे तेरा निज पाअग करी की देओआ केसी निर्दोषो रा खून नि बाह्या जाओ ओर तेसरे खूनो रा दोष तां पाँदे नि लगो।

11 पर जे कोई आपणे केसी पड़ोसिये साथे बैर राखी की केसी खे काणे रिया ताका दे रओ ओर तेस पाँदे चाफ बाई की तेसखे एड़ी बाओ कि से मरी जाओ ओर तेबे तिना शईरो बीचा ते केसी खे नठी जाओ, 12 तो तेसरे शईरो रे बुजुर्ग केसी खे पेजी की तेसखे तेथा ते वापस ल्याई की खूनो रा बदला लणे वाल़े पाईए रे आथो रे सम्बाल़ी देओ, ताकि से काया जाओ। 13 तेस पाँदे तरस नि खाणा, पर निर्दोषो रे खूनो रा दोष इस्राएलो ते दूर करना, जेते कि तुसा रा पला ओ।

पुराणे बन्ने

14 जो प्रदेश तेरा परमेशर यहोवा ताखे मालक बणने खे देओआ, तेतेरा पाअग जो ताखे मिलणा, तिदे केसी रा बन्ना जो पईलके लोके ठराई राखेया ओ, से टाणा नि।

15 केसी माणूंए रे खलाफ कोई बुरा काम या पापो रे बारे दे, चाए तेसरा पाप केड़ा ई कऊँ नि ओ, एकी ई माणूंए री गवाई नि सुणनी, बल्कि दो या तिंऊँ जणेया री गवाई बोलणे ते गल्ल पक्की ठईरो।*19:15 मत्ती 18:16

16 जे कोई चूठी गवाई देणे वाल़ा केसी रे खलाफ यहोवे ते फिरने री गवाई देणे खे खड़ा ऊई जाओ, 17 तो सेयो दोनो माणूं, जिना बीचे एड़ा मकद्दमा उठी रा ओ, यहोवे रे सामणे, मतलब तेसी दिने पुरोईत ओर न्यायिया रे सामणे खड़े कित्ते जाओ; 18 तेबे न्यायी ठीक-टंगो रे पूछताछ करो, जे से फैंसला पाओ कि से चूठा गवाह् ए ओर आपणे पाईए रे खलाफ चूठी गवाई देई राखी, 19 तो आपणे पाईए रा जेड़ा बी नुकशाण करवाणे री साजिश तिने करी राखी ओ, तेड़ा ई तुसे बी तेसरा करना, ईंयाँ आपू बीचा ते एड़ी बुराई दूर करनी। 20 तेबे दूजे लोक सुणी की डरने ओर आगो खे तां बीचे फेर एड़ा बुरा काम नि करना। 21 तैं बिल्कुल बी तरस नि खाणा; प्राणो रे बदले प्राणो रा, आखी रे बदले आखी रा, दाँदो रे बदले दाँदो रा, आथो रे बदले आथो रा ओर पैरो रे बदले पैरो री सजा देणी।*19:21 मत्ती 5:38