1 फेर मूसा मोआबो रे अराबा ते नबो पाह्ड़ो पाँदे, जो पिसगा री एक चूँडिया पाँदे ओर यरीहो शईरो रे सामणे ए, चढ़ीगा ओर यहोवे तेसखे दानो तको रा गिलाद नाओं रा सारा प्रदेश, 2 नप्तालीए रा सारा प्रदेश, एप्रैम ओर मनश्शे रे वंशिया रे लोका रा प्रदेश ओर पच्छमा रे समुद्रो तको रा यहूदा रा सारा प्रदेश, 3 ओर नेगेब प्रदेश, यरीहो मतलब खजूरो रे डाल़ा रे शईरो री काअटिया ते सोअर शईरो तको सारा प्रदेश दखाया। 4 तेबे यहोवे तेसखे बोलेया, "जेस प्रदेशो रे बारे दे मैं अब्राहम, इसहाक ओर याकूबो साथे कसम खाई की बोलेया था कि मां तेरे वंशो खे देणा से येई ए। मैं ताखे साक्षात दखाई ता रा, पर तूँ पार ऊई की तेती नि जाई सकणा।"

5 तेबे यहोवे रे कईणे रे मुताबिक तेसरा दास मूसा तेथी मोआब प्रदेशो दे मरीगा 6 ओर यहोवे से मोआबो रे प्रदेशो रे बेतपोरो रे सामणे एकी काअटिया रे, दबाईता। पर आजो तक कोई नि जाणदा कि तेसरी कब्र केई ए। 7 जेबे मूसे री मौत ऊई तेबे तेसरी उम्र 120 साला री थी, पर ना तो तेसरी आखी तुँदल़िया पड़िया ओर ना ई तेसरी तागत कटी। 8 इस्राएली समाजो रे लोके मोआबो रे मैदानो रे मूसे रिया तँईं 30 दिना तक शोग मनाया, तिजी ते बाद मूसे रिया तँईं रोणे रे दिन ओर मौता रा शोग करने रे दिन पूरे ऊए।

9 मूसे मरने ते पईले नूनो रे पाऊ यहोशूए रे सिरो पाँदे आपणे आथ राखे थे, इजी खे से अक्लमंदो री आत्मा साथे परिपूर्ण था। इस्राएली लोके तेसा आज्ञा रे मुताबिक जो यहोवे मूसे खे दित्ती थी तेसरी मानदे रये।

10 मूसे जेड़ा इस्राएलो रे एड़ा कोई नबी नि ऊआ, जेस साथे यहोवे आमणे-सामणे गल्ला कित्तिया। 11 ओर यहोवे से मिस्रो रे फिरौन ओर तेसरे सारे काम करने वाल़ेया रे सामणे ओर तेसरे सारे प्रदेशो रे, सब चिह्न ओर चमत्कार करने खे पेजेया था। 12 मूसे सारे इस्राएली लोका री नजरा रे सामणे तागतबर आथ ओर बड़े डराऊने काम दखाए।