1 मूसे इस्राएलिया खे बोलेया, "ओ इस्राएल! फेर जेबे आशीष ओर स्रापो रिया यो सब गल्ला जो मैं ताखे सुणाईयां तां पाँदे गुजरो ओर तूँ तिना सबी जातिया बीचे रई की, जेती तेरे परमेशर यहोवे तूँ मजबूरिया साथे पऊँचाणा, इना गल्ला खे याद करो 2 ओर आपणी ल्वादा समेत आपणे सारे मन ओर सारे प्राणो साथे आपणे परमेशर यहोवे री तरफा खे फिरी की तेसगे वापस आई जाओ ओर इना सबी आज्ञा रे मुताबिक जो आऊँ आज ताखे देऊँआ, तेसरी गल्ला माने। 3 तेबे तेरे परमेशर यहोवे तूँ कैदा ते छुड़ाई लणा ओर तां पाँदे दया करी की तिना सबी प्रदेशो रे लोका बीचा ते जिना बीचे तूँ तित्तर-बित्तर करी राखेया, तेथा ते फेर कट्ठा करना। 4 चाए तेरे लोका खे तरतिया रे कूणे तक ताखे जबरदस्ती पऊँचाओ, तेबे बी तेरे परमेशर यहोवे तूँ तेथा ते वापस ल्याऊणा।* 5 ओर तेरे परमेशर यहोवे तूँ तेते ई प्रदेशो दे पऊँचाणा, जेतेरे तेरे बुजुर्ग मालक ऊए थे ओर तूँ फेर तेथो रा मालक ऊणा ओर तेस तेरी पलाई करनी ओर तेस तूँ तेरे बुजुर्गा री गिणतिया ते बी जादा बढ़ाणा।"

6 ओर तेरे परमेशर यहोवे तेरे लोका रा ओर तिना रे वंशो रे दिलो रा खतना* करना, ताकि तूँ आपणे परमेशर यहोवे साथे आपणे सारे मन ओर सारे प्राणो साथे प्यार करे, जेते कि तूँ जिऊँदा रये।* 7 तेरे परमेशर यहोवे यो सब स्रापो रिया गल्ला तेरे दुश्मणा पाँदे पाणिया जिने तां साथे बैर राखी की तूँ सताया था। 8 तेबे तूँ यहोवे री तरफा खे फिरना ओर तां तेसरी वाणी सुणनी ओर यो सब आज्ञा मानणियां जो आऊँ आज ताखे देऊँआ।

9 ओर यहोवे तेरी पलाईया री खातर तेरे सबी कामो रे, तेरी ल्वादा रे, तेरे डांगरा रे बच्चेया रे ओर तेरी जमीना री फसला रे तेरी बढ़ोतरी करनी; कऊँकि यहोवे खे फेर तां पाँदे पलाई करने रे तेड़ी ई खुशी ऊणी, जेड़ी तेसखे तेरे बुजुर्गा री तरक्की करने ते ऊई थी, 10 कऊँकि तां आपणे परमेशर यहोवे री वाणी सुणी की तेसरी आज्ञा ओर बिदिया जो एते व्यवस्था री कताबा रे लिखी राखिया मानेया करनिया ओर आपणे परमेशर यहोवे रिया तरफा खे आपणे सारे मन ओर सारे प्राणो ते मन फिराणा।

11 देखो, ये जो आज्ञा आऊँ आज ताखे देऊँआ, से ना तो ताखे कठण ओर ना ई तेरी पऊँचा ते दूर ए।* 12 ओर ना ये आज्ञा सर्गो रे ए कि तूँ बोले कि कुण माणूं आसा खे सर्गो पाँदे चढ़ना कि तेसा खे आसा गे त्वारी की लई आओ ओर आसा खे सुणाओ कि आसे तिजी रे मुताबिक काम करुँ? 13 ओर ये आज्ञा ना ई समुद्रो ते पार ए कि तूँ बोले, "कुण आसा रिया तँईं समुद्रो ते पार जाणा ओर तिजी खे आसा गे लई आओ ओर आसा खे सुणाओ कि आसे तिजी रे मुताबिक काम करुँ?" 14 पर यो यहोवे रे वचन तेरे बऊत ई नेड़े ए, बल्कि से तुसा रे मुंए रे ओर तुसा रे दिलो रे ए, ताकि तूँ तिना रे मुताबिक काम करी सके।*

15 देख, आज मैं ताखे जिन्दगी ओर मौत, नुकशाण ओर फायदा दखाई राखेया। 16 कऊँकि आऊँ आज ताखे आज्ञा देऊँआ कि आपणे परमेशर यहोवे साथे प्यार राखणा ओर तेसरी बताई री बाटा दे चलणा ओर तेसरी आज्ञा, बिदिया ओर नियम मानणे, जेते कि तूँ जिऊँदा रई सके ओर बढ़दा जाए ओर तेरा परमेशर यहोवा तेते प्रदेशो रे जेथो रा मालक ऊणे खे तूँ जाणे लगी रा, ताखे आशीष देओ।

17 पर जे तेरा मन यहोवे री तरफा ते बदली जाओ ओर तूँ तेसरी वाणी नि सुणे ओर पटकी की पराये देवतेया गे माथा टेके ओर तिना री आराधना करने लगे, 18 तो आऊँ ताखे आज ये चेतावणी देऊँआ कि तूँ जरूर नाश ऊई जाणा ओर जेते प्रदेशो रा मालक ऊणे खे तूँ यरदन नदिया ते पार जाणे लगी रा, तेते प्रदेशो रे तुसे बऊत दिना तक जिऊँदा नि रणा।

19 आऊँ आज सर्ग ओर तरती दुँईं खे तुसा सामणे एते गल्ला रा गवाह् बणाऊँआ कि मैं जिन्दगी ओर मौत, आशीष ओर स्राप तुसा सामणे राखी राखे; इजी खे तूँ जिन्दगिया खेई अपनाई लो, ताकि तूँ ओर तेरा वंश दोनो जिऊँदे रओ। 20 इजी खे आपणे परमेशर यहोवे साथे प्यार करो, तेसरी गल्ला मानो ओर तेस साथे चिपके रे रओ; येई तेरी जिन्दगिया रा मतलब ए। इजी पाँदे तेरी लाम्बी उम्र टीकी री ए ओर एड़ा करने ते जेसा जमीना खे यहोवे अब्राहम, इसहाक ओर याकूब तेरे बुजुर्गा खे देणे री कसम खाई थी तेते प्रदेशो रे तूँ बसेया रा रणा।