बिधान 9

लोके परमेशरो री आज्ञा नि मानी

1 मूसे इस्राएलिया खे बोलेया, "ओ इस्राएल सुण, आज तूँ यरदन नदिया ते पार इजी खे जाणे वाल़ा ए, ताकि एड़ी जातिया खे जो तांते बड़ी ओर सामर्थी ए ओर एड़े बड़े शईरा खे, जिना रिया दवाला बऊत ई ऊच्चिया ए तिना खे आपणे अक्को रे लई लओ।" 2 तिना रे बड़े-बड़े ओर लाम्बे-लाम्बे कदो रे लोक, मतलब अनाकवंशी रओए, जिना रा आल तूँ जाणेया ओर तिना रे बारे दे तैं ये सुणी राखेया कि तिना रा सामणा कुण करी सकोआ?

3 इजी री खातर आज तूँ ये जाणी लओ कि तेरा परमेशर यहोवा तांते आगे-आगे स्वा करने वाल़ी आगी रे रूपो दे जाणा। तेस तिना रा नाश करी देणा ओर तेस सेयो तेरे वशो रे करी देणे ओर तां सेयो यहोवे रे वादे रे मुताबिक तेते प्रदेशो ते निकयाल़ी की चट ई नाश करी देणे।*9:3 इब्रानी 12:29

4 जेबे तेरा परमेशर यहोवा तिना खे तेरे सामणे ते निकयाल़ी देओगा, तेबे तैं आपणे मनो दे ये नि बोलणा, "मेरी तार्मिकता री बजअ ते एते प्रदेशो पाँदे मालक ऊणे खे यहोवा माखे ल्याई राखेया।" ना, इना लोका री दुष्टता रिया बजअ ते यहोवा इना खे तेरे सामणे ते निकयाल़ने लगी रा।*9:4 रोमी 10:6 5 तूँ जो तिना रे प्रदेशो रा अक्कदार ऊणे खे जाणे लगी रा, इजी री बजअ तेरी तार्मिकता या दिलो री निष्कपटता निए; तेरा परमेशर यहोवा जो तिना लोका खे तेरे सामणे ते निकयाल़ोआ, तिजी री बजअ तिना री दुष्टता ए ओर ये बी कि जो वादा तिने तेरे बुजुर्ग अब्राहम, इसहाक याकूबो, खे कसम खाई की कित्तेया था, तिजी खे पूरा करो। 6 तूँ ये गल्ल जाणी लओ कि तेरी तार्मिकता रिया बजअ ते परमेशर यहोवा तेरे अक्को रे ये खरा देश ताखे नि देणे लगी रा, कऊँकि तूँ तो एक टीठ जाति ए।

सूईने रा बाच्छू याद राखणा

7 ये गल्ल याद राखणी ओर कदी नि पूलणी कि सुनसाण जगा दे तैं किंयाँ-किंयाँ आपणे परमेशर यहोवे खे गुस्सा दलाया ओर जेस दिनो ते तूँ मिस्र प्रदेशो ते निकल़ी रा, जदुओ तक तुसे एते जगा दे नि पऊँचे, तदुओ तक तुसे यहोवे साथे तोखा ई तोखा करदे आई रे। 8 फेर होरेब पाह्ड़ो गे बी तुसे यहोवे खे गुस्सा दलाया ओर से गुस्से रे आई की तुसा खे नाश करना चाओ था। 9 जेबे आऊँ तिना वाचा री लिखी रिया पात्थरो री आज्ञा रिया फटिया खे जो यहोवे तुसा ते बानी थी, लणे खे पाह्ड़ो पाँदे चढ़ेया, तेबे चाल़ी दिन ओर चाल़ी रात पाह्ड़ो ई पाँदे रया इजी खे मैं ना तो रोटी खाई ओर ना पाणी पिया। 10 यहोवे माखे आपणी ई गूठिया साथे लिखी रिया पात्थरो रिया दो फटिया दित्तिया। तिना पाँदे यहोवे रे सेयो सब वचन लिखी राखे थे जो तिने सभा रे दिने पाह्ड़ो पाँदा ते आगी बीचा ते तुसा ते बोले थे।*9:10 प्रेरित 7:38, 2 कुरिन्थ 3:3 11 यहोवे चाल़ी दिन ओर चाल़ी रात बीतणे ते बाद आपणे आथो ते लिखिया रिया पात्थरो रिया सेयो वाचा रिया फटिया मांगे देईतिया।

12 तेबे यहोवे माखे बोलेया, "उठ, एथा ते फटाफट थाले चली जा, कऊँकि तेरी प्रजा रे लोक जिना खे तूँ मिस्र प्रदेशो ते निकयाल़ी की ल्याई राखेया सेयो प्रष्ट ऊईगे रे; जेते बाटा रे चलणे री आज्ञा मैं तिना खे दित्ती थी, सेयो तेते बाटा ते पटकी गे रे; तिने चट ई आपू खे एक मूर्ति बणाई ती री।"

13 तेबे यहोवे माखे ये बी बोलेया, "मैं सेयो लोक देखी ले रे, सेयो टीठ जातिया रे लोक ए; 14 इजी खे तूँ एबे माखे नि रोक ताकि आऊँ तिना खे नाश करी देऊँ ओर तरतिया पाँदा ते तिना रा नाओं-नशाण ई मिटाई देऊँ, ओर मां तांते तिना ते बढ़ी की एक ओर सामर्थी ओर महान देश बनाणा।"

15 तेबे आऊँ उल्टे पैर पाह्ड़ो ते थाले उतरी की आया ओर पाह्ड़ आगी साथे बल़ने लगी रा था ओर मेरे दुँईं आथो रे वाचा रिया दो फटिया थिया। 16 तेबे मैं देखेया कि तुसे आपणे परमेशर यहोवे रे खलाफ महापाप कित्तेया ओर आपू खे एक सूईने रे बाच्छूए री मूर्ति बणाई ती ओर यहोवे री बाट चट ई जेते पाँदे चलणे री आज्ञा यहोवे तुसा खे दित्ती थी, तिजी ते तुसे पटकी गे। 17 तेबे मैं सेयो दोनो फटिया आपणे दोनो आथो ते सेटी तिया ओर तुसा रे सामणे सेयो तोड़ी तिया।

18 तेबे तुसा रे तेस महापापो रिया बजअ ते जेतेखे करी की तुसे यहोवे रिया नजरा रे बुराई कित्ती ओर तेसखे गुस्सा चढ़ाया, मैं यहोवे रे सामणे चूकी की माथा तेकेया ओर पईले जेड़ा, मतलब चाल़ी दिन ओर चाल़ी राती तक, ना तो रोटी खाई ओर ना पाणी पिया। 19 आऊँ तो यहोवे रे तेस कोप ओर जल़ना ते डरने लगी रा था, कऊँकि से तुसा ते गुस्से ऊई की तुसा रा सत्यानाश करने वाल़ा था, पर यहोवे एस बार बी मेरी बिनती सुणी ली।*9:19 इब्रानी 12:21 20 तेबे यहोवा हारूनो ते इतणा गुस्से ऊआ कि से बी नाश करना चाया, पर तेस ई बखते मैं हारूणो खे बी प्रार्थना कित्ती। 21 तेबे मैं से सूईने रे बाच्छूए री मूर्ति जेतेखे बणाई की तुसे पापी ऊईगे थे, लई की आगी रे फूकी ती ओर तेबे से पीसी-पीसी की तेतेरा एड़ा चूरा बणाईता कि से तूड़ा जेड़ा बरीक ऊईगा ओर मैं से चूरा पाह्ड़ो ते थाले बह्णे वाल़ी नदिया रे सेटी ता।

22 फेर तबेरा, मस्सा ओर किब्रोतहत्तावा रे बी तुसे यहोवे खे गुस्सा दलाया। 23 जेबे यहोवे तुसे कादेशबर्ने ते ये बोली की पेजे कि जाई की तेते प्रदेशो रे जो देश मैं तुसा खे देई राखेया, अक्कदार ऊई जाओ, तेबे बी तुसे आपणे परमेशर यहोवे री आज्ञा रे खलाफ छल कित्तेया ओर ना तो तेसरा विश्वास कित्तेया ओर ना ई तेसरी गल्ल मानी। 24 जेस दिनो ते आऊँ तुसा खे जाणूंआ तेस दिनो ते तुसे यहोवे रे खलाफ छल ई करदे आई रे।

25 आऊँ यहोवे रे सामणे चाल़ी दिन ओर चाल़ी रात मुंओ रे पारे पड़ेया रा रया, कऊँकि यहोवे बोली ता था कि तेस तुसा रा नाश करी देणा। 26 तेबे मैं यहोवे ते ये प्रार्थना कित्ती, "ओ परमेशर यहोवा, आपणी प्रजा रूपी निज पाअग, जो तैं आपणे महान् प्रतापो ते छुड़ाई ला रा ओर जो तैं आपणे तागतबर आथो साथे मिस्र प्रदेशो ते निकयाल़े, तिना खे नाश नि कर। 27 आपणे दास अब्राहम, इसहाक ओर याकूबो खे याद कर ओर इना लोका रे अठो, दुष्टता ओर पापो पाँदे त्यान नि दे, 28 जेते कि एड़ा नि ओ कि जेते मिस्र प्रदेशो ते तूँ आसा खे निकयाल़ी की ल्याई राखेया, तेथो रे लोक बोलणे लगो कि यहोवा तिना खे तेते प्रदेशो दे जेतेखे देणे रा वादा तिना ते करी राखेया था, पऊँचाई नि सकेया ओर तिना साथे बैर बी राखो था, इजी बजअ ते तिने सेयो सुनसाण जगा ते निकयाल़ी की काईते। 29 यो लोक तेरी प्रजा ओर निज पाअग ए, जो तैं आपणी बड़ी शक्ति ओर सामर्था साथे निकयाल़ी की ल्याये।"