1 जेबे तूँ आपणे दुश्मणा साथे युद्ध करने खे जाए ओर कोड़े, रथ ओर आपू ते जादा दुश्मणा री सेना खे देखोगा, तेबे तिना ते नि डरना, कऊँकि मिस्र प्रदेशो ते छुड़ाई की ल्याऊणे वाल़ा तेरा परमेशर यहोवा तां साथे ए। 2 ओर जेबे तुसे युद्ध करने खे दुश्मणा रे नेड़े जाओ, तेबे पुरोईत सेना गे आई की बोलो, 3 "ओ इस्राएलियो, सुणो, तुसे आज आपणे दुश्मणा साथे युद्ध करने खे आज एती आई रे, तुसा रा मन कबराओ नि, तिना रा सामणा करने ते तुसे डरना नि ओर ना थरथराओ ओर ना तिना सामणे डरो, 4 कऊँकि तुसा रा परमेशर यहोवा तुसा रे दुश्मणा रे खलाफ युद्ध करने रिया तँईं ओर तुसा खे बचाणे खे तुसा साथे-साथे चलोआ।"

5 तिजी ते बाद परदान सिपाईया खे ये बोलो, "तुसा बीचा ते एड़ा कुण ए, जिने नया कअर बणाई राखेया ओ पर तिने क्रवासणी नि करी राखी ओ? तो से आपणे कअरो खे वापस ऊई जाओ, केथी एड़ा नि ओ कि से युद्धो दे मरी जाओ ओर दूजा माणूं तिजी री क्रवासणी करो। 6 ओर एड़ा कुण माणूं ए जिने अंगूरा रा बगीचा लगाई राखेया ओ, पर तिने तेते बगीचे रे पईले फल़ो रा खाणे रा मजा नि लई राखेया ओ? से बी आपणे कअरो खे वापस ऊई जाओ, एड़ा नि ओ कि से युद्धो रे मरी जाओ ओर दूजा माणूं तिजी रे फल़ो रा खाणे रा मजा लओ। 7 फेर एड़ा माणूं कुण ए जिने केसी बेटिया साथे सगाई करी राखी ओ, पर तेसा साथे ब्या नि करी राखेया ओ? से बी आपणे कअरो खे वापस ऊई जाओ, एड़ा नि ओ कि से युद्धो रे मरी जाओ ओर दूजा माणूं तेसा बेटिया साथे ब्या करी लओ।"

8 इजी ते अलावा परदान सिपाईया ते ये बी बोलो, "एड़े कुण-कुण माणूं ए जो डरपोक ओर जिना रे मन कमजोर ए, सेयो बी आपणे कअरो खे वापस ऊई जाओ, एड़ा नि ओ कि तेसखे देखी-देखी की तेसरे पाईया रा याओ बी टूटी जाओ।" 9 ओर जेबे परदान सिपाईया खे ये बोली चुको, तेबे तिना सिपाईया पाँदे सेनापति ठराई देयो।

10 जेबे तूँ केसी शईरो पाँदे अमला करने खे तिजी रे नेड़े पऊँचो, तेबे पईले तेस शईरो रे लोका साथे शान्तिया री या समजौता करने री गल्ल राखणी 11 ओर जे तेस शईरो रे लोक तेरी शान्तिया री या समजौता करने री गल्ला खे मानी लओ ओर आपणी आर मानी लओ, तो तेते शईरो रे सब रणे वाल़े तेरे अधीन ऊई की तेरिया तँईं काम ओर तेरी सेवा करने वाल़े ठईरने। 12 पर जे सेयो तां साथे शान्ति या समजौते री गल्ल नि करो, पर तां साथे युद्ध करना चाओ, तो तैं से शईर केरी लणा ओर तिजी पाँदे अमला करी देणा। 13 ओर जेबे तेरा परमेशर यहोवा तेसखे तेरे आथो दे देई देओ, तेबे तेथो रे सारे मर्द तलवारी साथे काई देणे। 14 पर जवाणसा, बाल-बच्चे ओर डांगर बगैरा ओर शईरो रिया सब चीजा लूटी की सेयो आपू खे राखी लणियां। तैं आपणे दुश्मणा रिया लूटी रिया चीजा जो तेरा परमेशर यहोवा ताखे देओ सेयो इस्तेमाल करनिया।

15 तैं एड़ा ई तिना शईरा रे लोका साथे बी करना जो तांते बऊत दूर ए ओर जो एथो री जातिया रे लोका रे शईर निए। 16 पर जो शईर एथो रे लोका रे ए, जिना रा अक्कदार ऊणे खे तेरा परमेशर यहोवा ताखे ठराणे वाल़ा ए, तिना बीचा ते कोई बी प्राणी जिऊँदा नि छाडणा। 17 पर सेयो जरूर नाश करने, मतलब हित्ती, एमोरी, कनानी, परिज्जी, हिब्बी ओर यबूसी, जेड़ी की तेरे परमेशर यहोवा ताखे आज्ञा देई राखी। 18 एड़ा नि ओ कि जितणे नीच काम सेयो आपणे-आपणे देवतेया री सेवा रे करदे आई रे तेड़ा ई करना तुसा खे बी सिखाओ ओर तुसे आपणे परमेशर यहोवे रे खलाफ पाप करने लगो।

19 जेबे तूँ युद्ध करदे ऊए केसी शईरो खे जीतणे रिया तँईं बऊत दिना तक केरी की राखे, तेबे तेथो रे डाल़ा पाँदे क्वाड़ी चलाई की सेयो नाश नि करने, कऊँकि तिना रे फल तेरे खाणे रे कामे आऊणे, इजी री खातर सेयो नि बाडणे। मैदानो रे डाल़ माणूं निए इजी खे तूँ तिना खे केरी की अमला नि करेया। 20 पर जिना डाल़ा रे बारे दे ताखे पता लगी जाओ कि इना रे फल खाणे जोगे निए, तो सेयो बाडी की नाश करी देणे ओर तेस शईरो रे खलाफ तदुओ तक केराबन्दी करी की राखणी, जदुओ तक से तेरे वशो रे नि ऊई जाओ।