बिधान 15

सातुआ साल : छुटकारे रा साल

1 मूसे इस्राएली लोका खे बोलेया, "तैं सातुए सालो रे आखरी रे आपणे कर्जदारा रे कर्जे माफ करी देणे, 2 मतलब जिने कर्ज देणे वाल़ेया आपणे पड़ोसिये खे कुछ त्वार देई राखेया ओ, तो से तिजी खे छाडी देओ ओर आपणे पड़ोसी या पाईए ते से जबरदस्ती नि पराणा, कऊँकि यहोवे रे नाओं ते एते कर्जे रे छुटकारे री घोषणा ऊई चूकी री। 3 परदेशी माणूंए ते तूँ जबरदस्ती पराई सकेया, पर जो कुछ तेरे पाईए गे तेरा ओ तिजी खे तूँ बिना परवाये छाडी देया।"

4 तुसा बीचे कोई गरीब नि रणा, कऊँकि जेस प्रदेशो खे तेरा परमेशर यहोवा तेरा पाअग करी की ताखे देओआ कि तूँ तेतेरा मालक ओ, तिदे तेस ताखे बऊत सारी आशीष देणी। 5 इतणा जरूरी ए कि तूँ आपणे परमेशर यहोवे री गल्ल मन लगाई की सुणे ओर इना सारिया आज्ञा खे मानणे दे जिना खे ताखे आज आऊँ देऊँआ चौकसी कर। 6 तेबे तेरे परमेशर यहोवे आपणे वचनो रे मुताबिक ताखे आशीष देणी ओर तां बऊत जातिया खे त्वार देणा, पर ताखे त्वार नि लणा पड़ना ओर तां बऊत जातिया पाँदे राज करना, पर तिना तां पाँदे राज नि करी सकणा।

7 जो प्रदेश परमेशर यहोवा ताखे देओआ तेसरे केसी डेरे ते पीतरे जे तेरे पाईया बीचा ते गरीब ऊई जाओ, तो आपणे तेस गरीब पाईए खे ना तो आपणा मन काठा करना ओर ना ई तेसखे देणे ते ना करनी।*15:7 यूह. 3:17 8 जेते चीजा री तेसखे कमी ओ, तेसखे जितणी जरूरत ओ, जरूर तिथणा ई तेसखे खुशिया साथे त्वार देणा। 9 चतन्न रओ कि तेरे मनो रे एड़ी बेकार चिन्ता नि समाओ कि सातुआ साल जो छुटकारे रा साल ए से नेड़े ए ओर आपणी टेडी नजर करी की तूँ आपणे तेस पाईए खे कटीया समजी की कुछ नि दे ओर से तेरे खलाफ यहोवे री दुहाई देओ, तो ये ताखे पाप ठईरना। 10 तैं तेसखे जरूर देणा ओर तेसखे देंदे बखते तेरे मनो खे बुरा नि लगो, कऊँकि इजी गल्ला रिया बजअ ते तेरे परमेशर यहोवे तेरे मईणती रे सबी कामा रे जिना रे तां आपणे आथ लगाणे ताखे आशीष देणी। 11 तेरे प्रदेशो दे गरीब तो सदा ऊणे, इजी री खातर आऊँ ताखे ये आज्ञा देऊँआ कि तैं आपणे प्रदेशो रे गरीब-कंगाल़ पाईया खे खुशिया साथे जरूर दान देणा।*15:11 मत्ती 26:11, मरक 14:7, यूह. 12:8

इब्री गुलामा साथे बर्ताव

12 जे तेरा कोई पाई-बन्दु, मतलब इब्रानी मर्द या जवाणस, ताखे बेचेया जाओ ओर से छे साला तक तेरी सेवा करी चुको, तो सातुए साले से तेथा ते आजाद करी की जाणे देणे।

13 जेबे तूँ तिना खे तेथा ते आजाद करी की जाणे दे, तेबे सेयो खाली आथ नि जाणे देणे। 14 बल्कि आपणी पेडा-बाकरिया ओर खल्याण ओर अंगूरा रे रसकुण्डो बीचा ते खुशिया ते देणा, तेरे परमेशर यहोवा ताखे जेड़ी आशीष देई राखी ओ, तिजी रेई मुताबिक तेसखे देणा। 15 ओर ये गल्ल याद राखणी कि तुसे लोक बी मिस्र प्रदेशो रे गुलाम थे ओर तेरे परमेशर यहोवा तुसे छुड़ाई लये; इजी बजअ ते आज आऊँ ताखे एसा गल्ला री आज्ञा देऊँआ।

16 ओर जे से तां साथे ओर तेरे कराने साथे प्यार राखोआ ओर तां साथे मजे रे रओआ ओर इजी बजअ ते ताखे बोलणे लगो कि मां तांगे ई रणा, 17 तो सूआ लई की तेसरा कान फल़े पाँदे लगाई की तिजी साथे बिनणा, तेबे से सदा तेरा दास बणेया रा रणा ओर आपणी दासिया साथे बी एड़ा ई करना। 18 जेबे तूँ तेसखे आपू गे ते आजाद करी की जाणे दे, तेबे से छाडणा ताखे कठण नि लगो, कऊँकि तिने छे साला तक तो मजदूरा जेड़ी तेरी सेवा करी राखी ओर तेरे परमेशर यहोवे ताखे तेरे मईणती रे सारे कामो दे आशीष देणी।

जेठे डांगरा री बलि

19 तेरे गाय-बल़द ओर पेडा-बाकरिया बीचे जितणे जेठे नर ओ सेयो सारे आपणे परमेशर यहोवे खे चढ़ाणे, आपणी गायी रे जेठे बच्चे ते कोई काम नि करवाणा ओर ना आपणी पेडा-बाकरिया रे जेठेया बच्चेया री ऊन कापणी। 20 तेते जगा पाँदे जो तेरा परमेशर यहोवा चूणी लओगा तैं यहोवे री मौजुदगिया रे आपणे-आपणे कराने समेत हर साल तेसरा मास खाणा। 21 पर जे तेसरे कोई दोष ओ, मतलब से लंगड़ा, अन्दा या तेसरे कोई ओर ई बुराईया रा दोष ओ, तो से आपणे परमेशर यहोवे खे बलि नि करना। 22 से आपणे शईरो ते पीतरे खाणा; शुद्ध ओर अशुद्ध दोनो माणूं जिंयाँ बारासींगे ओर ईरणो रा मास खाओए तिंयाँ ई तेसरा बी खाई सकोए। 23 पर तेसरा खून नि खाणा; से पाणिए जेड़ा जमीना पाँदे लटी देणा।