बिधान 16

फसह ओर बिना सजेड़े री रोटिया रा त्योआर

1 तैं आबीब मीन्ना*16:1 आबीब मीन्ना मतलब चैत्र मीन्ना याद करी की आपणे परमेशर यहोवे रिया तँईं फसह रा त्योआर मनाणा, कऊँकि आबीब मीन्ने दे तुसा रा परमेशर यहोवा राती तुसा खे मिस्र प्रदेशो ते निकयाल़ी की ल्याया। 2 इजी री खातर जो जगा यहोवा आपणे नाओं री रणे रिया जगा ठईराणे खे छाँटी लओगा, तेथी आपणे परमेशर यहोवे खे पेडा-बाकरिया ओर गाय-बल़द फसह रे डांगर बलि करने। 3 तेते साथे कोई सजेड़ी रोटी नि खाणी, साता दिना तक बिना सजेड़े रिया रोटिया जो दु:खो री रोटी ए खाया करनी; कऊँकि तूँ मिस्र प्रदेशो ते जल्दबाजी करी की निकल़ेया था, ईंयाँ ताखे मिस्र प्रदेशो ते निकल़ने रा दिन पूरी जिन्दगी याद रणा।*16:3 1 कुरिन्थ 5:8 4 साता दिना तक तेरे सारे प्रदेशो दे तांगे केथी बी सजेड़ा देखणे दे पनि आओ ओर जो डांगर तूँ पईलके दिने साँजके बखते बलि करो तेतेरे मासो बीचा ते कुछ बी प्यागा खे नि बचणा चाईयो।

5 तैं फसह रा डांगर आपणे केसी बी शईरो रे पीतरे, जो ताखे तेरा परमेशर यहोवा देओ बलि नि करना। 6 जो जगा तेरा परमेशर यहोवा आपणे नाओं री रणे रिया जगा करने खे छाँटी लओ बस तेथी, सालो रे तेसी बखते जिदे तूँ मिस्र प्रदेशो ते निकल़ेया था, मतलब सूरज डूबणे रे बखते साँजा खे, फसह रा डांगर बलि करना। 7 तेबे तेसरा मास तेसी जगा दे जेतेखे तेरा परमेशर यहोवा छाँटी लओ, पूजी की खाणा, तेबे प्यागा उठी की आपणे-आपणे डेरे खे चली जाणा। 8 छे दिना तक बिना सजेड़े रिया रोटिया खाया करनिया ओर सातुए दिने तेरे परमेशर यहोवे खे पवित्र महासभा ओ; तेस दिने कोई बी मईणती रा काम काज नि करना।*16:8 लूक 2: 41

फसला री बडाईया रा त्योआर

9 जेबे तूँ खड़िया फसला रे बाडणे खे दराटी लगाणे जाए, तेस दिनो ते शुरू करी की सात अफ़्ते गिणने। 10 तेबे आपणे परमेशर यहोवे री आशीषा रे मुताबिक तेसखे आपणी इच्छा ते फसला री पेंट चढ़ाई की अफ़्ते रा त्योआर मनाणा; 11 ओर तेते जगा रे जो तेरा परमेशर यहोवा आपणे नाओं री रणे रिया जगा खे छाँटी लओ आपणे-आपणे माठे-बेटिया, दास-दासिया समेत तूँ ओर तेरे शईरो रे पीतरे जो लेवी ओ, जो-जो परदेशी, अनाथ ओर बिदुआ तुसा बीचे ओ, सेयो सब आपणे परमेशर यहोवे सामणे खुशी मनाओ। 12 ओर याद राखणा कि तूँ बी मिस्र प्रदेशो रे गुलाम था; इजी खे इना बिदिया खे मानणे रे चौकसी करनी।

चूँगड़िया रा त्योआर

13 जेबे तूँ आपणे खल्याणो ते ओर अंगूरा रे रसकुण्डो ते सब कुछ कट्ठा करी चुको, तेबे चूँगड़िया रा त्योआर साता दिन तक मानदे रणा 14 ओर आपणे एस त्योआरो रे आपणे-आपणे माठे-बेटिया ओर दास-दासिया समेत तूँ ओर जो लेवी, परदेशी, अनाथ ओर बिदुआ तेरे शईरो रे पीतरे ओ सेयो बी खुशी मनाओ। 15 जो जगा यहोवा छाँटी लओ, तिदे तैं आपणे परमेशर यहोवे खे साता दिना तक त्योआर मनांदे रणा, कऊँकि तेरे परमेशर यहोवे तेरी सारी फसला रे ओर तेरे सारे मईणती रे कामा रे ताखे आशीष देणी, जेते कि तूँ खुशिया साथे मग्न ऊई जाणा।

16 सालो दे तीन बार, मतलब बिना सजेड़े रिया रोटिया रा त्योआर, अफ़्तेया रा त्योआर ओर चूँगड़िया रा त्योआर, इना तिंऊँ त्योआरा दे तुसा रे सारे मर्द आपणे परमेशर यहोवे सामणे तेते जगा रे खड़े ऊई जाओ जेतेखे से छाँटी लओ, देखो, तुसे यहोवे रे सामणे कुछ ना कुछ लई की जाओ। 17 तेरे परिवारो रा हर मर्द आपणी-आपणी गुंजाईश ओर तेसा आशीषा रे मुताबिक जो तेरे परमेशर यहोवा ताखे देई राखी, पेंट देया करो।

लोका रिया तँईं न्याय करने वाल़ेया री नियुक्ति

18 तैं आपणे एकी-एकी गोत्रो बीचा ते, आपणे शईरो रे पीतरे जिना खे तेरा परमेशर यहोवा ताखे देओआ, न्यायी ओर सरदार नियुक्त करी लणे, जो लोका रा न्याय सई टंगो रे करेया करो। 19 तुसे न्याय नि बिगाड़ना, तैं ना तो पक्षपात करना ओर ना ई रिश्वत लणी, कऊँकि रिश्वत अक्लमंद माणूंए रिया आखी बन्द करी देओई ओर तर्मिया री न्याय रिया गल्ला बदलाई देओई। 20 तैं न्याय सिर्फ न्याय रा अनुशरण करदे रणा ताकि तूँ बऊत बखतो तक जिऊँदा रई सके ओर जो देश तेरा परमेशर यहोवा ताखे देओआ, तेतेरा अक्कदार बणेया रा रओ।

दूजे देवतेया री पूजा नि करनी

21 तूँ आपणे परमेशर यहोवे री जो बेदी बणाएगा, तेतेरे नेड़े केसी बी किस्मा री लकड़िया री बणी री अशेरा नाओं रिया मूर्तिया री स्थापना नि करनी। 22 तैं पूजा खे कोई पात्थर खड़ा नि करना, कऊँकि तिजी ते तेरा परमेशर यहोवा कृणा करोआ।