1 तेबे आसे मुड़ी की बाशान प्रदेशो री बाटा रे चढ़ी की चले ओर बाशानो रा ओग नाओं रा राजा आपणी सारी सेना समेत आसा रे खलाफ निकल़ी की आया ताकि एद्रेई रे युद्ध करो।

2 तेबे यहोवे माखे बोलेया, "तेसते नि डर; कऊँकि मां से तेसरी सारी सेना समेत ओर जगा समेत तेरे वशो रे करी देणा ओर जेड़ा तैं हेशबोनो रे रणे वाल़े एमोरिया रे राजा सिहोनो साथे कित्तेया, तेड़ा ई तेस साथे बी कर।"

3 ईंयाँ म्हारे परमेशर यहोवा सारी सेना समेत बाशानो रा राजा ओग बी म्हारे वशो रे करिता ओर आसे तिना खे तदुओ तक मारदे रए कि तिना बीचा ते कोई बी जिऊँदा नि बचेया। 4 तेसी बखते आसे तिना रे सारे शईर लई लये, कोई एड़ा शईर नि बचेया जो आसे तिना ते नि लया, ईंयाँ ई अर्गोबो रा सारा देश, जो बाशानो रे ओगो रे राज्य रे था ओर तिदे 60 शईर थे, से म्हारे वशो रे आईगा। 5 यो सारे शईर गढ़वाल़े थे ओर तिना री ऊच्चिया-ऊच्चिया दवाला थिया, फाटक ओर शलाखा थिया ओर इना खे छाडी की बिना दवाला रे बी बऊत शईर थे। 6 जेड़ा आसे हेशबोनो रे राजा सिहोनो रे शईरो साथे कित्तेया था, तेड़ा ई आसे इना शईरा साथे बी कित्तेया, मतलब सारे बसे रे शईर जवाणसा ओर बाल-बच्चेया समेत सत्यानाश करीते। 7 पर सारे करेलू डांगर ओर शईरो री लूट आसे आपणी करी ली।

8 ईंयाँ आसे तेस बखते यरदनो ते पार रणे वाल़े एमोरिया रे दोनो राजेया रे आथो ते अर्नोन नदिया ते लई की हेर्मोन पाह्ड़ो तको री सारी जमीन लई ली। 9 हेर्मोनो खे सिदोनी लोक सिर्योन ओर एमोरी लोक सनीर बोलोए। 10 सवें प्रदेशो रे सारे शईर, सारा गिलाद, सल्का ओर एद्रेई तक जो ओगो रे राज्य रे शईर थे, सारा बाशान म्हारे वशो रे आईगा। 11 जो रपाई जातिया रे लोक लाम्बे-लाम्बे ओर तागतबर रईगे थे, तिना बीचा ते बस बाशानो रा राजा ओग रईगा था, तेसरा माँजा जो लोए राए, से तो अम्मोनिया रे रब्बा शईरो रे पड़ी रा था, आम माणूंए रे आथो रे साअबो ते तिजी री लम्बाई 13 फुट ओर चौड़ाई 6 फुट थी।

12 जो देश आसे तेस बखते आपणे अक्को रे लई ले, सेयो यो ए, मतलब अर्नोन नदिया कनारले अरोएर शईरो ते लई की सारे शईरा समेत गिलादो रे पाह्ड़ी प्रदेशो रा आदा पाअग, जो मैं रूबेन वंशो खे ओर गाद वंशो खे देईता। 13 गिलादो रा बचेया रा पाअग ओर सारा बाशान, मतलब अर्गोबो रा सारा देश जो ओगो रे राज्य रे था, ये मैं मनश्शे रे आदे गोत्रो खे देईता। सारे बाशानो खे रपाईया री जमीन बोलोए। 14 ओर मनश्शे गोत्रो रे याईर नाओं रे माणूंए गशूरियो ओर माकावासिया रे बन्ने तक अर्गोबो रा सारा देश लई ला ओर बाशानो रे शईरो रा नाओं आपणे नाओं पाँदे हब्बोत्याईर* राखेया ओर सेई नाओं आजो तक बणेया राए। 15 मैं गिलाद प्रदेश माकीरो खे देईता। 16 रूबेनिया ओर गादिया खे मैं गिलादो ते लई की अर्नोन नदिया तको रा प्रदेश देईता, मतलब तेसा नदिया बीचे तिना रा बन्ना ठराया ओर यब्बोक नदिया तक जो अम्मोनिया रा बन्ना ए; 17 ओर किन्नेरेतो ते लई की पिसगा री टलाना ते थालले अराबो रे तालो तक, जेतेखे खारा समुद्र बी बोलोए, अराब ओर यरदन नदिया रे पूर्वो रिया तरफा रा सारा देश बी मैं तिना खेई देईता।

18 तेस बखते मैं तुसा खे ये आज्ञा दित्ती, "तुसा रे परमेशर यहोवा तुसा खे ये प्रदेश देई राखेया ताकि तिजी खे आपणे अक्को रे राखो; तुसे सारे योद्धा अथियार लई की आपणे संगी साथी इस्राएलिया ते आगे-आगे चलो। 19 पर तुसा रिया जवाणसा, बाल-बच्चे ओर डांगर, जिना खे आऊँ जाणूंआ कि बऊत ए, सेयो सारे तुसा रे शईरो रे जो मैं तुसा खे देई राखे, तेथी रई जाओ। 20 जेबे यहोवा तुसा रे पाईया खे युद्धो ते राम देओ जेड़ा तिने तुसा खे देई राखेया ओर सेयो तेस प्रदेशो रे अधिकारी ऊई जाओ, जो तुसा रा परमेशर यहोवा तिना खे यरदन नदिया ते पार देओआ, तेबे तुसे बी आपणे-आपणे अक्को री जमीना पाँदे जो मैं तुसा खे देई राखी, वापस ऊणे।"

21 तेबे मैं तेस ई बखते यहोशूए खे आज्ञा देई की बोलेया, "तैं आपू देखी राखेया कि तेरे परमेशर यहोवा इना दुँईं राजेया रा क्या आल कित्तेया; तेड़ा ई यहोवे तिना सबी राज्या साथे करना, जिना रे तूँ पार ऊई की जाणा। 22 तिना ते नि डरना, कऊँकि तुसा री तरफा ते लड़ने वाल़ा ए तुसा रा परमेशर यहोवा ए।"

23 तेस ई बखते मैं यहोवे ते गिड़गिड़ाई की बिनती कित्ती, 24 "ओ परमेशर यहोवा, तूँ आपणे दासो खे आपणी महिमा ओर सामर्थ दखाणे लगी रा; स्वर्गो रे ओर तरतिया पाँदे एड़ा कुण देवता ए, जो तां जेड़े पराक्रमो रे काम करी सकोआ? 25 इजी री खातर माखे पार जाणे दे ताकि यरदनो ते पार तेस खरा प्रदेशो खे, मतलब तेस खरा पाह्ड़ ओर लबानोन खे बी देखी सकूँ।" 26 पर यहोवा तुसा रिया बजअ ते मांते रूष्ट ऊईगा ओर मेरी नि सुणी; पर यहोवे माखे बोलेया, "बस कर, इजी रे बारे दे फेर कदी मां साथे गल्ल नि करनी। 27 पिसगा पाह्ड़ो रिया चूँडिया पाँदे चढ़ी जा ओर पूर्व, पच्छम, उत्तर, दक्खण, चऊँ कनारे नजर कुमाई की तेस प्रदेशो खे देखी लो, कऊँकि तूँ यरदनो ते पार नि जाई सकणा। 28 ओर यहोशूए खे आज्ञा दे ओर तेसखे याओ देई की मजबूत कर; कऊँकि इना लोका ते आगे-आगे सेई जाणा ओर जो देश तूँ एबु देखणे लगी रा तेस ई तिना रा निज पाअग करना।" 29 तेबे आसे बेतपोरो री सामणे रिया काअटिया रे ठईरे रे रये।