1 तेबे जे तेरा परमेशर यहोवा ताखे तेते प्रदेशो रे जेतेरा मालक ऊणे खे तूँ जाणे वाल़ा ए, पऊँचाओ ओर तां सामणे ते हित्ती, गिर्गाशी, एमोरी, कनानी, परिज्जी, हिब्बी ओर यबूसी नाओं रिया सातो जातिया खे जो तुसा ते बड़ी ओर सामर्थी ए निकयाल़ी देओ।* 2 ओर जेबे तेरा परमेशर यहोवा तिना खे तेरे आथो दे सम्बाल़ी देओ ओर तूँ तिना खे अराई दे, तेबे तैं सेयो पूरी तरअ ते नाश करी देणे; तिना साथे ना तो वाचा बानणी ओर ना तिना पाँदे दया करनी। 3 ओर ना ई तिना साथे ब्या करने, ना तो आपणी बेटी तिना खे ब्याणी ओर ना ई तिना री बेटिया रा आपणे माठे साथे ब्या करना। 4 कऊँकि तिना रिया बेटिया तेरे माठे यहोवे पीछे चलणे ते बईकाणे ओर तिना ते दूजेया देवतेया री पूजा करवाणी, इजी बजअ ते यहोवे रा गुस्सा तां पाँदे पड़कणा ओर तेस तूँ चट ई नाश करी देणा। 5 तैं तिना लोका साथे एड़ा बर्ताव करना कि तिना रिया बेदिया टाल़ी देणियां, तिना रे पात्थरो रे खम्बे तोड़ी देणे, तिना रिया अशेरा नाओं रिया मूर्तिया बाडी-बाडी की रूड़ाई देणियां ओर तिना रिया मूर्तिया खे आग लगाई देणी। 6 कऊँकि तूँ आपणे परमेशर यहोवे री पवित्र प्रजा ए; तेरे यहोवे तूँ आपणी प्रजा, आपणी निज सम्पत्ति बनाणे रिया तँईं तरतिया पाँदे रणे वाल़े सारेया लोका बीचा ते चूणी ला रा।

7 यहोवे तुसा साथे प्यार करी की तुसे चूणी ले, इजी री बजअ ये नि थी कि तुसे गिणतिया रे ओर सबी देशा रे लोका ते जादा थे, बल्कि तुसे तो सबी देशा रे लोका ते गिणतिया रे थोड़े थे। 8 यहोवा तुसा साथे प्यार करोआ इजी बजअ ते तिने तुसे चूणी ले। से तेसा कसमा खे बी पूरी करना चाओ था, जो तिने तुसा रे बुजुर्गा ते खाई थी। इजी री खातर यहोवे तुसे आपणे तागतबर आथो साथे मिस्र प्रदेशो ते बारे निकयाल़े। तिने तुसे गुलामिया रे कअरो ते ओर मिस्रो रे राजा फिरौनो रे वशो ते आजाद कित्ते। 9 इजी री खातर जाणी लओ कि तेरा परमेशर यहोवा ई सच्चा परमेशर ए, से विश्वास करने जोगा परमेशर ए; ओर जो लोक तेस साथे प्यार राखोए ओर तेसरी आज्ञा खे मानोए तिना साथे से ह्जार पीढ़िया तक आपणी वाचा रा पालण ओर तिना पाँदे दया करदा रओआ। 10 जो तेस साथे बैर राखोए, से तिना रे देखदे ई तिना ते बदला लई की तिना खे नाश करी देओआ; आपणे बैरिये रे बारे दे तेस देर नि करनी, तेसरे देखदे ई तेसखे कठोर सजा देणी। 11 इजी री खातर इना आज्ञा, बिदिया ओर नियमा खे, जो आज आऊँ ताखे देऊँआ, मानणे दे चौकसी करनी।

12 ओर तुसे जो इना नियमा सुणी की मानोगे ओर इना पाँदे चलोगे, तो तेरे परमेशर यहोवे बी तेसा करूणामय वाचा रा पालण करना जो तिने तेरे बुजुर्गा साथे कसम खाई की बानी थी; 13 ओर तेस तां साथे प्यार राखणा ओर ताखे आशीष देणी ओर गिणतिया रे बढ़ाणे ओर जो देश तिने तेरे बुजुर्गा खे वादा करी की ताखे देणे खे बोलेया था, तिदे तेस तेरी ल्वादा पाँदे, नज्ज, नया अंगूरा रा रस, शुद्ध तेल ओर जमीना री उपजा पाँदे आशीष देया करनी ओर तेरिया गायी-बल़द ओर पेडा-बाकरिया बढ़ाणिया। 14 तूँ सारे देशा रे लोका बीचे जादा आशीषित ऊणा, तां बीचे ना तो कोई जवाणस, ना कोई मर्द बिना वंशो ते ऊणे ओर तेरे डांगरा बीचे बी एड़ा कोई नि ऊणा। 15 यहोवे तांते सारे रोग दूर करने ओर मिस्रो रिया बुरी-बुरी महामारिया जिना खे तूँ जाणेया, तिना बीचा ते कोई बी ताखे लगणे नि देणी, यो सब तेरे बैरिया खेई लगणियां।

16 प्रदेशो-प्रदेशो रे जितणे लोका खे तेरा परमेशर यहोवा तेरे वशो रे करी देओगा, तैं सेयो सारे नाश करी देणे, तिना पाँदे कोई दया नि करनी ओर ना ई तिना रे देवतेया री पूजा करनी, नई तो तूँ फन्दे रे फसी जाणा। 17 जे तूँ मनो रे सोचे कि सेयो देश जो मांते जादा ए, तो मां सेयो किंयाँ प्रदेशो ते निकयाल़निया? 18 तेबे बी तिना ते नि डरना, जो कुछ तेरे यहोवे फिरौनो साथे ओर सारे मिस्रो रे कित्तेया, से ठीक-टंगो रे याद राखणा। 19 जो बड़े-बड़े दु:खो रे काम तुसा रे बुजुर्गे आपू देखे ओर जो चिह्न, चमत्कार, सामर्थ ओर बढ़ाई रिया बांयी साथे तेरा परमेशर यहोवा ताखे निकयाल़ी की ल्याया, तिंयाँ ई तेरे परमेशर यहोवे, तिना सबी लोका साथे बी जिना ते तूँ डरेया, करना। 20 इजी ते जादा तेरे परमेशर यहोवे तिना बीचे पँऊरो पेजणी, एथो तक कि तिना बीचा ते जो कोई बची की लूकी जाणे, सेयो बी तेरे सामणे ते नाश ऊई जाणे।

21 तिना ते डरना नि; कऊँकि तेरा परमेशर यहोवा तां बीचे ए ओर से महान् ओर डर मानणे जोगा परमेशर ए। 22 तेरे परमेशर यहोवे सेयो देश तेरे आगे ते थोड़े-थोड़े निकयाल़ने; तो तूँ एकदम तिना रा अन्त नि करी सकदा, नई तो बणो रे डांगरा बढ़ी की तेरा नुकशाण करना। 23 तेबे बी तेरे परमेशर यहोवे सेयो तांते अराणे ओर जदुओ तक सेयो नाश नि ऊई जाओ, तदुओ तक सेयो बऊत बेचैन करने। 24 तेस तिना रा राजा तेरे आथो रे करी देणा ओर तां तिना रा बी नाओं तरतिया ते मिटाई देणा, तिना बीचा ते कोई बी तेरे सामणे खड़ा नि रई सकणा ओर आखरी रे तां सेयो नाश करी देणे।

25 तिना रिया कअड़ी रिया मूर्तिया तुसे आगी दे फूकी देणियां, जो चाँदी या सूईना तिना पाँदे मढ़ेया रा ओ तिजी रा लाल़च करी की नि लई लणा, नई तो तूँ तिजी रिया बजअ ते जंजाल़ो दे फसणा, कऊँकि एड़िया चीजा तुसा रे परमेशर यहोवे रिया नजरा दे नीच काम ए। 26 कोई घृणित चीज आपणे कअरे नि ल्याऊणी, नई तो तूँ बी तिजी जेड़ा नाश ऊणे री चीज ठईरना; से नाशो री चीज जाणी की तिजी ते नफरत करनी ओर से कदी नि चाणी, कऊँकि से अशुद्ध चीज ए।