1 जे तेते प्रदेशो रे डोरूआ दे जो तेरा परमेशर यहोवा ताखे मालक ऊणे खे देओआ केसी काये री लोथ मिलो ओर से किने काई राखेया ओ, इजी रा पता नि लगो, 2 तो तेरे बुजुर्ग ओर न्यायी निकल़ी की तेते लोथा रे चऊँ कनारे एकी-एकी शईरो री दूरी नापी लओ। 3 तेबे जो शईर तेसा लोथा ते सबी ते नेड़े ऊणे, तेथो रे बुजुर्ग एक एड़ी बाच्छी लई लओ, जेसा ते कोई सेवा रा काम नि लई राखेया ओ ओर जेसा पाँदे जूँगड़ा कदी नि राखी राखेया ओ। 4 तेबे तेस शईरो रे बुजुर्ग तेसा बाच्छिया खे एक बारामासी नदिया री एड़ी काअटिया रे जो ना कदी बायी राखी ओ ओर ना कदी बीजी राखी ओ लई जाओ ओर तेसा ई काअटिया रे तेसा बाच्छिया री क्याड़ी तोड़ी देओ। 5 तेबे लेवी पुरोईत बी नेड़े आओ, कऊँकि तेरे परमेशर यहोवा सेयो चूणी ले रे, ताकि तेसरी सेवा-टईल करो ओर तेसरे नाओं ते आशीर्वाद देया करो ओर तिना रे कईणे रे मुताबिक हर एक चगड़े ओर मारपीटा रे मकद्दमे रा फैंसला ओ।

6 तेबे जो शईर तेसा लोथा ते सबी ते नेड़े ओ, तेथो रे सारे बुजुर्ग तेसा बाच्छिया पाँदे जेसा री क्याड़ी काअटिया रे तोड़ी राखी ओ आपणे-आपणे आथ तोई की बोलो,* 7 "एस बेकसूर माणूंए रा खून आसे नि करी राखेया ओर ना ई आसे ये काम आपणी आखी साथे देखी राखेया। 8 इजी री खातर ओ यहोवा, आपणी गुलामिया ते छुड़ाई री इस्राएली प्रजा रा पाप टखी की निर्दोष माणूंए रे खूनो रा पाप आपणी इस्राएली प्रजा रे सिरो पाँदा ते त्वारी दे।" तेबे तेस खूनो रे दोषो ते तिना खे माफी मिली जाणी। 9 ईंयाँ से काम करी की जो यहोवे रिया नजरा दे ठीक ओ तैं निर्दोषो रे खूनो रा दोष आपू बीचा ते दूर करना।

10 जेबे तूँ आपणे दुश्मणा साथे युद्ध करने खे जाए ओर तेरा परमेशर यहोवा तिना खे तेरे वशो रे करी देओ ओर तूँ तिना खे बन्दी बणाई ले, 11 तेबे जे तूँ बन्दिया बीचे केसी बांकी जवाणसा खे देखी की तेसा पाँदे मोहित ऊई जाए ओर तेसा साथे ब्या करना चाए, 12 तो से जवाणस आपणे कअरे लई आऊणी ओर से आपणे बाल़ कटवाओ, नस कटाओ 13 ओर आपू पाँदा ते कैदिया रे टाल्ले त्वारी की तेरे कअरे मीन्ना परी रई की आपणे माया-बाओ खे शोग मनांदी रओ। तिजी ते बाद तैं तेसा गे जाणा ओर तूँ तेसा रा लाड़ा ओर से तेरी लाड़ी बणो। 14 तेबे जे से ताखे अच्छी नि लगो, तो जेती से जाणा चाओ तेती जाणे देणी, से पैसे लई की केथी नि बेचणी ओर तेरा तेसा साथे शारीरिक संबंध था, इजी बजअ ते तेसा साथे दासिया जेड़ा बर्ताव नि करना।

15 जे केसी मर्दो रे दो लाड़िया ओ ओर तेसखे एक प्यारी ओर दूजी प्यारी नि ओ ओर तिना दुँईं रे पाऊ ओ, पर जेठा तेसा रा ओ जो प्यारी निए, 16 तो जेबे से आपणे पाऊआ खे आपणी जायदाता रा बटवारा करो, तो जे तेसा रा पाऊ जो प्यारी निए सच्ची जेठा ओ ओर जे जिऊँदा ओ, तो से प्यारिया रे पाऊओ खे जेठा पाअग नि देई सकदा 17 से ये जाणी की कि जो प्यारी निए तेसा रा पाऊ मेरे पौरूषो रा पईला फल ए ओर जेठे रा अक्क तेसरा ईए, तेसखे ई आपणी सारी जायदाता बीचा ते दुगणा पाअग देई की जेठा मानो।

18 जे केसी रे टीठ ओर दंगा-फसाद करने वाल़ा पाऊ ओ, जो आपणे माया-बाओ री गल्ल नि मानो, बल्कि ताड़ना देई की बी तिना री नि सुणो, 19 तो तेसरे माये-बाओ तेसखे पकड़ी की आपणे शईरो ते बारे प्रवेश द्धारो रे नेड़े बुजुर्गा गे लई जाओ 20 ओर सेयो शईरो रे बुजुर्गा खे बोलो, "म्हारा ये पाऊ टीठ ओर दंगा-फसाद करने वाल़ा ए, ये म्हारी नि सुणदा; ये खर्चीला ओर शराबी ए।" 21 तेबे तेस शईरो रे सारे मर्द तेसखे पात्थर बाई की काई देओ, ईंयाँ तैं आपू बीचा ते एड़ी बुराई दूर करनी, तेबे सारे इस्राएली सुणी की डरी जाणे।

22 तेबे जे केसी ते मौता री सजा जोगा पाप ऊई रा ओ, जेते कि से काया जाओ ओर तूँ तेसखे डाल़ो पाँदे लटकाई दे, 23 तो से लोथ राथियो खे डाल़ो पाँदे लटकी री नि रओ, तेसखे जरूर तेस ई दिने माट्टी देणी, कऊँकि जो लटकेया रा ओआ, से यहोवे रिया तरफा रे स्रापित ठईरोआ। इजी री खातर जो देश तेरा परमेशर यहोवा तेरा पाअग करी की ताखे देओआ, तेतेरी जमीन अशुद्ध नि करनी।*