1 मूसे इस्राएली लोका खे बोलेया, "जो-जो आज्ञा आज आऊँ तुसा खे सुणाऊँआ तिना सबी पाँदे चलणे री चौकसी करनी, ताकि तुसे जिऊँदे रओ ओर बढ़दे जाओ ओर जेस प्रदेशो रे बारे दे यहोवे तुसा रे बुजुर्गा ते वादा करी राखेया, तिदे जाई की तेतेरे अक्कदार ऊई जाओ।"

2 याद राख कि तेरा परमेशर यहोवा तिना चाल़िया साला दे ताखे सारी सुनसाण जगा रिया बाटा ते इजी खे ल्याया, ताकि से ताखे दुख देई की ओर तेरी परीक्षा करी की ये जाणी लओ कि तेरे मनो दे क्या-क्या ए ओर तां तेसरी आज्ञा रा पालण करना कि नई।

3 तिने ताखे कष्ट दित्ते, ताखे पूख महसूस कराई। पर तिने ताखे मन्ना बी खुल़ाया, जेतेखे ना तो तूँ जाणो था ओर ना ई तेरे बुजुर्ग जाणो थे, ताकि तूँ जाणी लओ कि माणूं बस रोटिया साथे ई जिऊँदा नि रंदा, पर जो-जो वचन यहोवे रे मुंओ ते निकल़ोए, तिना तेई से जिऊँदा रओआ।* 4 इना चाल़िया साला रे तेरे टाल्ले फट्टी की तेरे शरीरो ते पनि छूटे ओर ना ई तेरे पैरा रे छाल्ले पड़े। 5 फेर बी आपणे मनो रे ये तो सोच कि जिंयाँ केसी रा बाओ आपणे माठे खे डांटोआ, तिंयाँ ई तेरा परमेशर यहोवा ताखे डांटोआ।*

6 इजी री खातर आपणे परमेशर यहोवे रिया आज्ञा रा पालण करदे ऊए तेसरी बताई री बाटा रे चलणा ओर तेसरा डर मानदे रणा। 7 कऊँकि तेरा परमेशर यहोवा ताखे एक बऊत ई खरे प्रदेशो रे लई चली रा, जो पाणिए रिया नदिया रा, काअटिया रा ओर पाह्ड़ो ते निकल़दे ऊए डूगी-डूगी सूबल़ा रा प्रदेश ए। 8 फेर से कणक, जौ, दाख, दाऊगल़े ओर अनारा रा प्रदेश ए ओर जैतून ओर सईतो रा बी प्रदेश ए। 9 तेते प्रदेशो रे ताखे ना तो नज्जो री ओर ना ई किजी बी चीजा री कमी ऊणी; तेस प्रदेशो रे पाह्ड़ा-चट्टानी रे लोआ ए ओर तेथो रे पाह्ड़ा ते तूँ तांबा खणी की निकयाल़ी सकेया। 10 तां पेट परी की खाणा जदुओ तक तूँ रज्जी नि जाए ओर तेस बऊत ई पजणे वाल़े प्रदेशो रिया बजअ ते जो तेरे परमेशर यहोवे ताखे देणा, तेसरा तन्यवाद करना।

11 इजी री खातर सावधान रणा, एड़ा नि ओ कि तूँ आपणे परमेशर यहोवे री आज्ञा, नियम ओर बिदिया खे पूली जाए, जिना री आज्ञा आज आऊँ ताखे देणे लगी रा ओर तूँ तिना खे मानणा छाडी दे; 12 केथी एड़ा नि ओ कि जेबे तूँ खाई पी की रज्जी जाए ओर अच्छे-अच्छे कअर बणाई की तिना दे रणे लगे 13 ओर जेबे तेरे गाय-बल़द ओर पेडा बाकरिया बऊत ऊई जाओ ओर तेरा सूईना-चाँदी बी बढ़ी जाओ ओर तांगे जो कुछ बी आये तिजी री बी बढ़ोतरी ऊई जाओ, 14 केथी एड़ा नि ओ कि तेरे मनो रे कमण्ड आई जाओ ओर तूँ आपणे परमेशर यहोवे खे पूली जाए, जो ताखे गुलामिया रे कअर मिस्र प्रदेशो ते निकयाल़ी की ल्याया, 15 ओर तेसा बड़ी ओर डराऊणी सुनसाण जगा बीचा ते ल्याया, जेती तेज विषो वाल़े साप ओर बिच्छु ए ओर जेती पाणी नि था तेती तिने तेरिया तँईं सख्त चट्टानी ते पाणी निकयाल़ेया। 16 तिने ताखे सुनसाण जगा रे मन्ना खुल़ाया जेतेखे तुसा रे बुजुर्ग जाणो पनि थे, तिने तूँ नम्र बणाया ताकि तेरी परीक्षा करी की अन्तो रे तेरा ई पला करो। 17 चौकस रओ! केथी एड़ा नि ओ कि तूँ आपणे दिलो रे सोचणे लगो, "मैं आपणी ई तागती ते ओर आपणी ई तागतबर बांयी साथे ये सम्पति कट्ठी करी राखी।"

18 पर तूँ आपणे परमेशर यहोवे खे याद राखेया, कऊँकि परमेशर यहोवा ईए जो ताखे सम्पत्ति कट्ठी करने खे तागत देओआ ताकि जो वाचा तिने तेरे बुजुर्गा साथे कसम खाई की बानी थी तिजी खे पूरा करो, जेड़ा आज बी ए। 19 जे तूँ आपणे परमेशर यहोवे खे पूली की दूजे देवतेया पीछे चलेगा ओर तिना री पूजा करेगा ओर तिना गे माथा टेकेगा, तो आऊँ आज तुसा खे चेतावणी देऊँआ कि तुसे जरूर नाश ऊई जाणे। 20 तिना देशा जेड़ा जो यहोवे तां सामणे नाश कित्ते तूँ बी नाश ऊई जाणा कऊँकि तैं आपणे परमेशर यहोवे रा वचन नि मानेया।