बिधान 13

मूर्तिपूजा रे खलाफ चेतावणी

1 जे कोई भविष्यवक्ता या सुफने रे जरीये दर्शण देखणे वाल़ा सामणे आई की ताखे कोई चिह्न या चमत्कार दखाओ,*13:1 मत्ती 24:24, मरक 13:22 2 ओर तिना खे चिह्न ठराई की से ताखे बोलो, "आओ आसे पराये देवतेया पीछे चली की, जिना ते तुसे एबुए तक अणजाण रये, तिना री पूजा करूँए।" 3 तेबे तैं भविष्यवक्ता या सुफना देखणे वाल़े रिया गल्ला पाँदे कोई त्यान नि देणा, कऊँकि तेरे परमेशर यहोवे ये जाणने रिया तँईं तेरी परीक्षा लणी कि यो मां साथे आपणे सारे मन, सारे प्राणो साथे प्यार राखोए कि नई?*13:3 बिध. 13:3, 1 कुरिन्थ 11:19 4 तुसे आपणे परमेशर यहोवे पीछे चलणा, तेसरा डर मानणा, तेसरी आज्ञा मानणी, तेसरी आज्ञा पाँदे चलणा, तेसरा वचन मानणा, तेसरी आराधना करनी ओर तेस साथे ई विश्वासो दे बणे दे रणा। 5 ओर एड़ा भविष्यवक्ता या सुफने देखणे वाल़ा जो तुसा खे तुसा रे यहोवे ते फेरी की, जिने तुसे मिस्रो ते निकयाल़े ओर गुलामिया रे कअरो ते छुड़ाए, तेरे परमेशर यहोवे रिया बाटा ते बईकाणे वाल़ी गल्ल बोलणे वाल़ा ठईरना, इजी बजअ ते से काया जाणा। ईंयाँ तैं आपू बीचा ते एड़ी बुराई दूर करी देणी।

6 जे तेरा सक्का पाई या माठा, बेटी, लाड़ी या प्राणो ते प्यारा दोस्त चोरिए जे ये बोली की ताखे सकेल़ने लगो, "आओ आसे दूजे देवतेया री पूजा करूँए", जिना खे ना तो तूँ ओर ना तेरे बुजुर्ग जाणो थे।*13:6 बिध. 17:2, उत्प. 16:5 7 चाए सेयो तुसा रे नेड़े रणे वाल़े नेड़े-तेड़े रे लोका रे, चाए तरतिया रे एकी कूणे ते लई की दूजे कूणे तक दूरो-दूरो तक रणे वाल़ेया रे देवता ओ, 8 तैं तेसरी नि मानणी, ना तो तेसरी गल्ल सुणनी, ना तेस पाँदे तरस खाणा, ना ई नरमाई दखाणी ओर ना ई से लकोणा; 9 से जरूर काणा, तेसखे काणे खे पईले तेरा ई आथ उठो, बादो ते सबी लोका रे आथ उठो।*13:9 लेवी. 24:14 10 तेस पाँदे एड़ा पत्थराव करना कि से मरी जाओ, कऊँकि तिने ताखे तेरे तेस परमेशर यहोवे ते, जो ताखे गुलामिया रे कअरो ते, मतलब मिस्र प्रदेशो ते निकयाल़ी की ल्याया ओर परमेशरो री आज्ञा ते बईकाणे री कोशिश कित्ती। 11 सब इस्राएली लोक सुणी की डरी जाणे ओर एड़ा बुरा काम फेर कदी तुसा बीचे नि ऊणा।

12 जे तेरे केसी शईरो रे बारे दे, जेतेखे तेरा परमेशर यहोवा ताखे रणे खे देओआ, एड़ी गल्ल तेरे सुणने रे आओ 13 कि कितणे दुष्ट मर्दे तां ई बीचा ते निकल़ी की आपणे शईरो रे रणे वाल़े ये बोली की बईकाईते, "आओ आसे ओरी देवतेया री जिना ते एबुए तक अणजाण थे, पूजा करूँए", 14 तो पूछताछ करनी ओर टोल़ना ओर ठीक-टंगो रे पता लगाणा, जे से गल्ल सच्ची ओ ओर कोई बी शक नि रओ कि तुसा बीचे एड़ा नीच काम करेया जाओआ, 15 तो पक्का तेते शईरो रे रणे वाल़े आपणी तलवारी साथे काई देणे ओर डांगर बगैरा तिना सबी समेत जो तिदे ओ सेयो तलवारी साथे नाश करी देणे। 16 तेथो री सारी लूट चौको बीचे कट्ठी करी की से शईर लूटा समेत आपणे परमेशर यहोवे खे मानो पूरी होमबलि करी की फूकणा ओर से सदा खे उजाड़ रओ, से फेर कदी नि बसाया जाओ। 17 कोई बी नाशो री चीज तेरे आथो रे नि लगणी चाईयो, जेते कि यहोवा आपणे पड़के रे कोपो ते शान्त ऊई की जेड़ा तिने तेरे बुजुर्गा ते वादा कित्तेया था तेड़ा ई तां साथे दया रा बर्ताव करो ओर दया करी की ताखे गिणतिया रे बढ़ाओ।

18 ये तेबे ऊणा जेबे तूँ आपणे परमेशर यहोवे रिया जितणी आज्ञा आऊँ आज ताखे देऊँआ तिना सबी खे मानेगा ओर जो तेसरी नजरा दे ठीक ओ सेई करेगा।