1 जे तूँ आपणे परमेशर यहोवे रिया सारी आज्ञा, जो आऊँ ताखे आज देऊँआ, चौकसिया साथे पूरी करने रे त्यान लगाई की सुणो, तो तेस तूँ तरतिया री सबी जातिया बीचे श्रेष्ठ करना। 2 फेर आपणे परमेशर यहोवे री सुणने रिया बजअ ते यो सारे आशीर्वाद तां पाँदे पूरे ऊणे।

3 तन्य ओ तूँ शईरो दे,

तन्य ओ तूँ डोरूआ दे।

4 तन्य ओ तेरी ल्वाद,

तेरी जमीना री फसल,

गाय, पेड, बाकरिया रे बच्चे।*

5 तन्य ओ तेरी टोकरी

ओर तेरी आटा गूनणे री परात।

6 तन्य ओ तूँ पीतरे

आऊँदे बखते ओर

तन्य ओ तूँ बारे जांदे बखते।

7 यहोवे एड़ा करना कि तेरे दुश्मण जिना तां पाँदे अमला करना, सेयो तां सामणे आरी जाणे, तिना एकी बाटा ते तां पाँदे अमला करना, पर तां सामणे ते साता बाटा रिये ऊई की नठी जाणे।

8 तेरे पण्डारा पाँदे ओर जितणे मईणती रे कामा खे करने दे तूँ आथ लगाएगा तिना सबी पाँदे यहोवे आशीष देणी; इजी री खातर जो प्रदेश तेरा परमेशर यहोवा ताखे देओआ, तिदे तेस ताखे आशीष देणी।

9 जे तूँ आपणे परमेशर यहोवे री आज्ञा मानी की तेसरी बताई री बाटा दे चले, तो तेस आपणी कसमा रे मुताबिक तूँ आपणी पवित्र प्रजा रे लोका रे रूपो दे बणाई की राखणा। 10 ओर तरतिया रे जगा-जगा रे लोक ये देखी की कि ताखे यहोवे रा बोलोए, तांते डरने।

11 जेस प्रदेशो खे देणे री कसम यहोवे तेरे बुजुर्गा ते खाई थी, तिदे तेस तेरी ल्वादा री, तेरी जमीना री फसला री ओर डांगर बढ़ाई की तेरी पलाई करनी।

12 यहोवे तेरिया तँईं सर्गो ते आपणे खरे पण्डार-कअर खोली की तेरी जमीना पाँदे बर्खा करेया करनी ओर तेरे सारे कामा दे आशीष देणी ओर तां बऊत जातिया रे लोका खे कर्ज देया करना, पर तां केसी ते कर्ज नि लणा। 13 यहोवे तूँ ऊच्चिया जगा रे बठयाल़ना थालली जगा रे नि ओर तेरी लगातार तरक्की ऊँदी जाणी पर नुकशाण नि ऊणा। पर ये आशीषा तेबे मिलणिया जेबे तूँ परमेशर यहोवे रिया आज्ञा खे सुणोगा ओर तिना खे मानणे रे मन लगाई की चौकसी करे 14 ओर जिना वचना री आज आऊँ ताखे आज्ञा देऊँआ तिना बीचा ते केसी ते बी ना दाँणे कनारे ना खूँजे कनारे मुड़ी की पराये देवतेया पीछे नि चलणा ओर ना ई तिना री सेवा करनी।

15 पर जे तूँ आपणे परमेशर यहोवे री गल्ल नि सुणे ओर तेसरी सारी आज्ञा ओर बिदिया खे मानणे रे जो आऊँ आज देऊँआ चौकसी नि करेगा, तो यो सारे स्राप तां पाँदे पड़ी जाणे।

16 मतलब स्रापित ओ तूँ शईरो दे,

स्रापित ओ तूँ डोरूआ दे।

17 स्रापित ओ तेरी टोकरी

ओर तेरी आटा गूनणे री परात।

18 स्रापित ओ तेरी ल्वाद,

तेरी जमीना री फसल ओर

गायी ओर पेडा-बाकरिया रे बच्चे।

19 स्रापित ओ तूँ

पीतरे आऊँदे बखते ओर

स्रापित ओ तूँ बारे जांदे बखते।

20 तेबे जेस-जेस मईणती रे कामो खे करने दे तूँ आथ लगाए, तिदे यहोवा ताखे तदुओ तक स्राप, डर ओर तमकी देंदे रणा, जदुओ तक तूँ खत्म नि ऊई जाए ओर चट ई नाश नि ऊई जाए। ये इजी बजअ ते ऊणा जे तूँ यहोवे खे छाडी की दुष्ट काम करेगा।

21 ओर यहोवे एड़ा करना कि महामारी तांदे फैली की तेस बखतो तक फैली री रणी, जदुओ तक जेते जमीना रा मालक ऊणे खे तूँ जाणे लगी रा, तेते पाँदा ते तेरा अन्त नि ऊई जाओ।

22 यहोवे तूँ क्षयरोगो ते, बुखार, दाह, जल़न, तलवारी साथे, झुलस ओर पूर्वी अवा ते मारी देणा ओर इना सबी तेस बखतो तक तेरा पीछा करदे रणा, जदुओ तक तूँ सत्यानाश नि ऊई जाए। 23 तेरे सिरो पाँदला सर्ग पीतल़ी जेड़ा सख्त ओर तेरे पैरा निठली जमीन लोए जेड़ी काठी ऊई जाणी। 24 यहोवे तेरे प्रदेशो रे ऊणे वाल़ी बरखा रे बदले रेत ओर तूड़ पेजणी। जदुए तक तूँ नाश नि ऊई जाए तदुए तक से सर्गो ते बरसदी रणी।

25 यहोवे तूँ तेरे दुश्मणा रे जरीये अरवाणा ओर तां एकी बाटा ते तिना पाँदे अमला करने खे जाणा, पर साता बाटा रिये ऊई की तिना सामणे ते नठी जाणा ओर तरतिया रे सबी राज्य दे मारा-मारा फिरना। 26 तेरी लोथ सर्गो रे कई प्रकारा रे पंछिया रा ओर तरतिया रे बणो रे जानवरा रा खाणा ऊणी ओर तिना खे डराई की नठाणे वाल़ा कोई नि ऊणा।

27 यहोवे तूँ मिस्रो जेड़े फोड़े, बवासीर, जाज ओर खाजिया साथे एड़ा दु:खी करना कि तूँ तिना ते ठीक नि ऊई सकणा। 28 यहोवे तूँ पागल ओर अन्दा करी देणा ओर तेरा मन बऊत जादा कबराई देणा। 29 ओर जिंयाँ अन्दा माणूं न्हेरे रे तोपोआ, तिंयाँ ई तां दिन-दपईरे तोपदे रणा। तूँ आपणे केसी बी कामा रे सफल नि ऊणा ओरी तां पाँदे सदा अन्देर करदे रणा ओर ताखे लुटदे रणे ओर ताखे कोई छुड़ाणे वाल़ा नि ऊणा।

30 तां कँवारी बेटिया साथे सगाई करनी, पर दूजे माणूंए से प्रष्ट करी देणी, कअर तां बनाणा, पर आपू तिदे बसी नि सकणा, अंगूरा रा बगीचा तां लगाणा, पर तिजी रे फल़ खाई नि सकणा। 31 तेरा बल़द तेरी आखी सामणे बाडेया जाणा पर तूँ तेसरा मास नि खाई सकणा, तेरा गह्दा तां सामणे लूटेया जाणा ओर ताखे दुबारा नि मिलणा, तेरी पेडा-बाकरिया तेरे दुश्मणा खे दित्तिया जाणिया ओर तेरी तरफा ते तिना खे छुड़ाणे वाल़ा कोई नि ऊणा। 32 तेरे माठे-बेटिया दूजे प्रदेशो रे लोका रे आथो दे गुलामिया खे सम्बाल़े जाणे ओर तेरिया आखी सारा दिन तिना खे न्याल़दे-न्याल़दे थकी जाणिया ओर तेरा कोई बस नि चलणा।

33 तेरी जमीना री फसल ओर तेरी सारी कमाई एक अणजाणे प्रदेशो रे लोका खाई जाणी, तां सदा अन्देर सयींदे रणा ओर पीसदा जाणा। 34 एथो तक कि तूँ तिना गल्ला रिया बजअ ते जो आपणी आखी साथे देखणियां पागल ऊई जाणा। 35 यहोवा तेरे जानूआ ओर खुटिया रे, बल्कि पैरो रे तल़ुए ते लई की सिरो री चोटिया तक फोड़े निकयाल़ी की ताखे तकलीफ देणी।*

36 यहोवे तूँ तेस राजे समेत, जो तां आपू पाँदे ठराणा, तूँ ओर तेरे बुजुर्ग एड़े प्रदेशो रे पऊँचाई देणे जिना खे तुसे नि जाणो थे ओर तिना बीचे रई की तां लकड़ी ओर पात्थरा रे दूजे देवतेया री पूजा करेया करनी। 37 ओर तिना सबी लोका बीचे जिना बीचे यहोवे तूँ पऊँचाणा, तेथो रे लोका खे तूँ हऊआ, कआवत ओर मजाको री बजअ समजेया जाणा।

38 तां डोरूआ रे बेजा तो बऊत बाणा, पर फसल थोड़ी जी कट्ठी करनी, कऊँकि टिड्डिया से चट करी जाणी। 39 तां अंगूरा रे बगीचे लगाई की तिदे मईणत तो करनी, पर ना तो तूँ अंगूरा रा रस पी सकणा, ओर ना ई अंगूर तोड़ी सकणा, कऊँकि सेयो कीड़ेया खाई देणे। 40 तेरे सारे प्रदेशो रे जैतूनो रे डाल़ तो ऊणे, पर तूँ जैतूनो रे तेलो रा इस्तेमाल नि करी सकणा, कऊँकि सेयो अल़ी जाणे। 41 तेरे माठे-बेटिया तो पैदा ऊणे, पर सेयो तेरे नि रणे, कऊँकि सेयो युद्धो रे कैदी ऊई की चली जाणे।

42 तेरे सारे डाल़ ओर तेरी जमीना री फसल जेते रा तूँ मालक ए टिड्डिया खाई देणी।

43 जो परदेशी तां बीचे रणा, से तांते जादा तागतबर ऊई जाणे ओर तूँ कमजोर ऊँदा जाणा। 44 तां तेसखे त्वार नि देणा तेस ताखे त्वार देणा, से ऊच्चिया जगा पाँदे विराजमान ऊणा।

45 तूँ जो आपणे परमेशर यहोवे री दित्ती री आज्ञा ओर बिदिया मानणे खे तेसरी नि सुणोगा, इजी बजअ ते यो सारे स्राप तां पाँदे पड़ी जाणे ओर तां पीछे पड़े रे रणे, ताखे पकड़ी की रणे ओर अन्तो रे तूँ नाश ऊई जाणा। 46 ओर यो स्राप चिह्न ओर चमत्कार कामा रे रूपो रे तां पाँदे ओर तेरे वंशो पाँदे सदा बणे रे रणे।

47 बऊत जादा आशीष ऊणे ते बाद बी तां खुशी ओर खरे दिलो ते आपणे परमेशर यहोवे री सेवा नि करनी, 48 तो इजी बजअ ते ताखे पूखा, त्याया, नांगा ओर सबी चीजा ते बिना आपणे तिना दुश्मणा री सेवा करनी पड़नी, जो यहोवे तेरे खलाफ पेजणे ओर जदुओ तक तूँ नाश नि ऊई जाए तदुओ तक तिना तेरी क्याड़िया पाँदे लोए रा जूँगड़ा राखेया रा राखणा।

49 यहोवे तेरे खलाफ दूरो ते, बल्कि तरतिया रे कूणे ते तेज उड़ने वाल़े उकाबो जेड़ी एक जाति चढ़ाई की ल्याऊणी, जिना री पाषा ताखे समज नि आऊणी, 50 तेसा जातिया रे लोका रा बर्ताव क्रूर ऊणा, तिना ना तो स्याणेया रा आदर करना ओर ना ई बाल़का पाँदे दया करनी। 51 ओर तिना तेरे डांगरा रे बच्चे ओर तेरी जमीना री फसल एथो तक खाई जाणी कि तूँ नाश ऊई जाणा ओर तिना ताखे ना नज्ज, ना अंगूरा रा रस, ना जैतूनो रा तेल, ना बाच्छू ना मिन्टू छाडणे, एथो तक कि तूँ नाश ऊई जाणा। 52 तिना तेरे परमेशर यहोवे रे दित्ते रे सारे प्रदेशो रे सबी प्रवेश द्धारो ते पीतरे तूँ केरी की राखणा, तिना तूँ तेरे सबी फाटका रे पीतरे तदुओ तक केरी की राखणा, जदुओ तक तेरे सारे प्रदेशो रे तेरी ऊच्ची-ऊच्ची ओर मजबूत दवाला जिना पाँदे तां परोसा करना, टल़ी नि जाओगिया।

53 तेसा केरा बन्दिया री बड़ी मुसीबता रे जो तेरे दुश्मणा तां पाँदे पाणी, तां आपणे जमाए रे माठे-बेटिया रा मास, जो तेरे परमेशर यहोवे ताखे देणे, खाणा। 54 तुसा बीचे जो मर्द नरम ओर नाजुक ऊणा, तेस बी आपणे पाई, आपणी लाड़ी ओर आपणे बचे रे बाल़क क्रूर नजरा ते देखणे। 55 ओर तेस तिना बीचा ते केसी खे बी आपणे बाल़का रे मासो बीचा ते जो तेस आपू खाणा कुछ नि देणा, कऊँकि तेसा केरा बन्दिया री बड़ी मुसीबता रे जो तेरे दुश्मणा तेरे सारे शईरा रे तां पाँदे पाणी तेसगे कुछ पनि रणा। 56 तुसा बीचे जो जवाणस नरम ओर नाजुक ओ कि आपणे नाजुक ओर नरमाईया रे मारे जमीना पाँदे पैर राखणे ते बी डरदी ओ, तेसा बी आपणे प्राणो ते प्यारे लाड़े, माठे ओर बेटिया खे, 57 आपणे निज बल्कि आपणे जमाए रेया बच्चेया खे क्रूर नजरा ते देखणा, कऊँकि दुश्मणा रे केरने ओर तेसा मुसीबता रे बखते जिदे तेरे दुश्मणा तूँ तेरे प्रवेश द्धारो ते पीतरे केरी की राखणी, तेसा सबी चीजा रिया कमिया रे मारे सेयो लूकी की खाई जाणे। 58 जे तूँ इना बिधानो रे सारे वचन मानणे दे, जो एते कताबा रे लिखी राखे, चौकसी करी की तेस महिमा ओर डरने जोगे नाओं रा, जो यहोवा तेरे परमेशरो राए डर नि माने, 59 तो यहोवे ताखे ओर तेरे वंशो खे डराऊणे-डराऊणे दण्ड देणे, सेयो दुष्ट ओर बऊत दिना तक रणे वाल़े रोग ओर पारी-पारी दण्ड ऊणे। 60 ओर तेस मिस्रो रे सेयो सारे रोग फेर तां पाँदे लगाई देणे, जिना ते तूँ डरे था ओर सेयो तांदे लगे रे रणे। 61 जितणे रोग ओर दण्ड एते बिधानो री कताबा रे नि लिखी राखे, सेयो सारे बी यहोवे तां पाँदे एथो तक लगाई देणे कि तेरा नाश ऊई जाणा। 62 तूँ जो आपणे परमेशर यहोवे री नि मानेगा, तो इजी बजअ ते सर्गो रे तारेया जेड़े अणगिणत ऊणे रे बदले तुसा बीचे थोड़े ई माणूं रई जाणे।

63 ओर जेड़ा एबे यहोवे खे तुसा री पलाई ओर बढ़ोतरी करने रे खुशी ओई, तेड़ा ई तेबे तेसखे तुसा खे नाश करने रे खुशी ऊणी ओर जेते जमीना रे मालक ऊणे खे तुसे जाणे लगी रे, तेते पाँदा ते तुसे पट्टी देणे।

64 यहोवे तूँ तरतिया रे एस कूणे ते लई की तेस कूणे तक सबी प्रदेशो रे लोका बीचे तित्तर-बित्तर करी देणा ओर तेती रई की तां आपणे ओर आपणे बुजुर्गा रे अणजाणे पात्थर ओर लकड़िया रे दूजे देवतेया री पूजा करनी। 65 तिना लोका बीचे ताखे कदी चैन नि मिलणा ओर ना तेरे पैरा खे ठकाणा मिलणा; कऊँकि तेती यहोवे एड़ा करना कि तेरा दिल थरथराई जाणा ओर तेरी आखी तुँदल़िया पड़ी जाणिया ओर तेरा मन बेचैन रणा। 66 ताखे जिन्दगिया रा सदा शक रणा ओर तूँ रात-दिन थरथरांदा रणा ओर तेरी जिन्दगिया रा कोई परोसा नि रणा। 67 तेरे मनो रे जो डर बणेया रा रणा ओर तेरी आखी खे जो दिशदा रणा, तिजी बजअ ते तां प्यागा कणदे ऊए बोलणा कि साँज कदी ऊणी! ओर साँजा कणदे ऊए बोलणा कि प्याग कदी ऊणी!

68 ओर यहोवे तूँ किस्तिया पाँदे चढ़ाई की मिस्रो रे तेते बाटा ते वापस करी देणा, जेतेरे बारे दे मैं ताखे बोलेया था कि से फेर तेरे देखणे रे नि आऊणी ओर तेती तुसे आपणे दुश्मणा रे आथे दास-दासी ऊणे खे बिकाऊ तो रणे, पर तुसा खे कोई खरीदणे वाल़ा नि ऊणा।