1 जे दुँईं माणूंआ बीचे कोई चगड़ा ओ तो सेयो कचरिया रे जाओ ओर न्यायी तिना रा न्याय करो ओर जेबे सेयो तिना रा न्याय करो, तो निर्दोष माणूंए खे निर्दोष ओर दोषी माणूंए खे दोषी ठराओ। 2 जे दोषी माणूं कोड़े खाणे जोगा ठईराई राखेया तो न्यायी तेसखे लटयाल़ी कि आपू सामणे जेड़ा तेसरा दोष ओ तिजी रे मुताबिक तेसखे कोड़े गिणी की लगवाओ। 3 से तेसखे चाल़ी कोड़ेया तक लगवाई सकोआ, इजी ते जादा नि लगवाई सकदा, एड़ा नि ओ कि इजी ते बऊत जादा मार खुलाणे ते तेरे पाईए री तेरे सामणे बेज्जती नि ओ।

4 बांदे ऊए चलदे बल़दो रे मुंए दे छिकड़ी नि देणी *

5 जे परिवारो रे सारे पाई कट्ठे रओए ओर तिना बीचा ते एक पाई बिना ल्वादा ते मरी जाओ, तो तेसरी बिदुआ लाड़िया रा ब्या परिवारो ते बारले माणूंए साथे नि करना, पर तेसा रे लाड़े रा ई सका पाई तेसा गे जाई की तेसा खे आपणी लाड़ी बणाई लओ ओर तेसा साथे लाड़े रे पाईए रा तर्मो रा पालण करो।* 6 तेबे जो पईला पाऊ तेसा जवाणसा ते पैदा ओ से तेस मरे रे पाईए रे नाओं रा ठईरो, ताकि तेसरा नाओं इस्राएलो ते नि मिटो।

7 पर जे तेसा जवाणसा रे लाड़े रे पाईए खे तेसा साथे ब्या करना ठीक नि लगो, तो से जवाणस शईरो रे प्रवेश द्धारो पाँदे बुजुर्गा गे जाई की बोलो, "मेरे देऊरे इस्राएलो रे आपणे मरे रे पाईए रा वंश चलाणे ते ना करी ती। से मां साथे मेरे मरे रे लाड़े रे पाईए रा तर्म पालण नि करना चांदा।"

8 तेबे तेस शईरो रे स्याणे लोक तेसा रे देऊरो खे बुलाई की समजयाओ ओर जे से आपणी गल्ला पाँदे अड़ेया रा रओ ओर बोलो कि माखे एसा साथे ब्या करना ठीक नि लगोआ। 9 तो तेसरी पाबी तिना स्याणेया सामणे तेसगे जाई की तेसरे पैरो ते जोड़ा त्वारो ओर तेसरे मुंओ पाँदे थूकी देओ ओर बोलो, "जो मर्द आपणे मरे रे पाईए रे वंशो खे चलाणा नि चाओ तेस साथे एड़ा ई बर्ताव कित्तेया जाणा। 10 तेबे इस्राएलो रे तेस मर्दो रे कराने रा ये नाओं राखेया जाणा, जोड़ा त्वारे रे मर्दो रा कराना।"

11 जे दो मर्द आपू बीचे लड़ाई करो ओर तिना बीचा ते एकी री लाड़ी आपणे लाड़े खे मारने वाल़े रे आथो ते छुड़ाणे खे जाओ ओर आपणे आथो साथे तेसरा अण्डकोष जोरे की दबाओ, 12 तेबे तैं तेसा जवाणसा रा आथ बाडी देणा, तेसा पाँदे तरस नि खाणा।

13 तैं आपणी थैलिया रे दुँईं किस्मा रे बट्टे एक बड़ा दूजा छोटा नि राखणा। 14 तैं आपणे कअरे दुँईं किस्मा रे एक कम एक जादा नपुए नि राखणे। 15 तेरे बट्टे ओर नपुए पूरे-पूरे ओर ठीक-ठीक ऊणे चाईयो ताकि जो प्रदेश तेरा परमेशर यहोवा ताखे देओआ तिदे तेरी उम्र बढ़ो। 16 कऊँकि जो माणूं एड़े काम करोआ, नाप-तोलो दे बईमानी करोआ, से तेरे परमेशर यहोवे रिया नजरा दे नीच काम ए।

17 याद राख कि जेबे तुसे मिस्र प्रदेशो ते निकल़ी कि जाणे लगी रे थे तेबे अमालेकिये तुसा साथे बाटा रे केड़ा बर्ताव कित्तेया था, 18 तिना खे परमेशरो रा डर नि था, इजी बजअ ते तिने जेबे तुसे बाटा रे थके-आरे थे तेबे तुसा पाँदे अमला करी की जितणे लोक कमजोर ऊणे रिया बजअ ते सबी ते पीछे रईगे सेयो सारे काईते।

19 इजी री खातर जेबे तेरा परमेशर यहोवा तेते प्रदेशो रे, जो से तेरा पाअग करी की तेरे अक्को रे करी देओआ, ताखे चऊँ कनारले दुश्मणा ते राम देओ, तेबे अमालेकिया रा नाओं तरतिया पाँदे ते मिटाई देणा ओर तुसे ये गल्ल नि पूलणी।