1 मूसे सारे इस्राएली लोका खे बुलाई की बोलेया, "ओ इस्राएली लोको, जो-जो बिदिया ओर नियम आऊँ आज तुसा खे सुणाऊँआ तिना खे सुणो, ताकि तिना खे सीखी की मानणे रे चौकस रओ। 2 म्हारे परमेशर यहोवा तो होरेब* पाह्ड़ो पाँदे आसा साथे वाचा बानी। 3 ये वाचा परमेशरे म्हारे पितरा तेई नि, पर आसा साथे बी बानी, जो एती आजके दिने जिऊँदे ए।" 4 परमेशरे तेते पाह्ड़ो पाँदे आगी बीचा ते तुसा लोका साथे आमणे-सामणे गल्ला कित्तिया।* 5 तेस बखते आऊँ यहोवे रा वचन सुनाणे खे तुसा रे ओर यहोवे रे बीचे खड़ेया रा रया। कऊँकि तुसे आगी रे डरो रे मारे पाह्ड़ो पाँदे नि चढ़े, तेबे यहोवे बोलेया,

6 आऊँ यहोवा, तेरा परमेशर ए, जो ताखे मिस्र प्रदेशो ते गुलामिया रे कअरो ते जेती तुसे रओए थे तेथा ते निकयाल़ी की ल्याया, 7 माखे छाडी की कोई ओर परमेशर करी की नि मानणा।

8 तूँ आपू खे जो सर्गो रे ए या तरतिया पाँदे ए या तरतिया ते थाले ए या तरतिया रे पाणिए रे ए, केसी बी चीजा री मूर्ति खणी की नि बणाया। 9 तैं तिना गे माथा नि टेकणा ओर ना ई तिना री पूजा करनी; कऊँकि आऊँ तेरा परमेशर यहोवा जल़न राखणे वाल़ा ईश्वर ए ओर जो मां साथे बैर राखोए तिना रे माठेया, पोतेया ओर पड़पोतेया खे पितरा री सजा देऊँआ। 10 पर जो कोई मां साथे सदा प्यार राखोआ ओर मेरी आज्ञा खे मानोआ तिना री ह्जारा पीढ़िया पाँदे आऊँ दया करेया करूँआ।

11 तैं आपणे परमेशर यहोवे रा नाओं बेकार नि लणा; कऊँकि जो यहोवे रा नाओं बेकार लओगा सेयो यहोवे निर्दोष नि ठराणे।*

12 तूँ रामो रे दिनो खे पवित्र मानणे खे याद राखेया, जेड़ी तेरे परमेशर यहोवा ताखे आज्ञा देई राखी। 13 छे दिन तो तैं मईणत करी की आपणा सारा काम-काज करना;* 14 पर सातुआ दिन तेरे परमेशर यहोवे खे रामो रा दिन ए। तिदे ना तो तैं कोई काम-काज करना, ना तेरे पाऊ, ना तेरी मुन्नी, ना तेरे दास, ना तेरी दासी, ना तेरा बल़द, ना तेरा गह्दा, ना तेरे डांगर ओर ना कोई परदेशी जो तेरे समाजो रे ए, जेते कि तेरा दास ओर तेरी दासी बी तेरे जेड़ा केसी बी किस्मा रा काम नि करो।*

15 ये गल्ल याद राखणी कि मिस्र प्रदेशो रे तूँ आपू दास था ओर तेथो ते तेरा परमेशर यहोवा ताखे तागतबर आथ ओर बढ़ाई रिया बांयी रे जरीये निकयाल़ी की ल्याया; इजी बजअ ते तेरा परमेशर यहोवा ताखे रामो रा दिन मानणे री आज्ञा देओआ।

16 तैं आपणे माये बाओ री इज्जत करनी ताकि जो प्रदेश तेरा परमेशर यहोवा ताखे देओआ, तेते प्रदेशो रे तूँ बऊत दिना तक जिऊँदा रई सके ओर तेरा पला ओ।*

17 तैं अत्या नि करनी।*

18 तैं व्याभिचार नि करना।*

19 तैं चोरी नि करनी।

20 तैं केसी रे खलाफ चूठी गवाई नि देणी।*

21 केसी री लाड़िया रा लाल़च नि करना, ना केसी रे कअरो रा, ना तेसरे डोरूआ रा, ना तेसरे दास-दासिया रा, ना तेसरे बल़द या गह्दे रा, ना तेसरी केसी ओरी चीजा रा लाल़च करना।

22 यो ई वचन यहोवे तेते पाह्ड़ो पाँदे आग, बादल़ ओर अन्दकूप न्हेरे रे बीचा ते तुसा री सारी मण्डल़िया खे आका पाई की बोले ओर इजी ते जादा ओर कुछ नि बोलेया। तिने सेयो दुँईं फटिया पाँदे लिखी की मांगे देईते।

23 जेबे पाह्ड़ आगी साथे बल़ने लगी रा था ओर तुसे से आवाज आगी रे न्हेरे तुएँ बीचा ते आऊँदी ऊई सुणी, तेबे तुसे ओर तुसा रे गोत्रो बीचा ते खास-खास मर्द ओर तुसा रे बुजुर्ग मांगे आए।* 24 ओर बोलणे लगे, "देखो, म्हारे परमेशर यहोवे आसा खे आपणा तेज ओर आपणा वैभव दखाया ओर आसे तेसरी आवाज आगी बीचा ते आऊँदी ऊई सुणी, आज आसे देखी ला कि हालाँकि परमेशर माणूंआ साथे गल्ला करोआ, तेबे बी माणूं जिऊँदा रओआ।* 25 एबे आसे कऊँ मरूँ? कऊँकि इतणी जादा आगी साथे आसे स्वा ऊई जाणे ओर जे आसे आपणे परमेशर यहोवे री आवाज फेर सुणुगे, तेबे तो मरी ई जाणे।* 26 कऊँकि सारे प्राणिया बीचे एड़ा कुण ए जो आसा जेड़ा जिऊँदा ओर आगी बीचा ते बोलदे ऊए परमेशरो री आवाज सुणी की जिऊँदा बचेया रा रओ?* 27 इजी री खातर तूँ नेड़े जा ओर जो कुछ म्हारा परमेशर यहोवा बोलो तिजी खे सुणी लओ, तेबे जो कुछ से बोलो से आसा गे बताणा ओर आसा से सुणना ओर मानणा।"

28 जेबे तुसे मां साथे इना गल्ला खे बोलणे लगी रे थे तेबे यहोवे तुसा रिया गल्ला सुणिया; तेबे तिने माखे बोलेया, "इने लोके जो-जो गल्ला तांगे बोलिया मैं सुणिया, इने जो कुछ बोलेया ठीक ई बोलेया। 29 पला ऊँदा कि इना रा मन सदा एड़ा ई बणेया रा रओ, ताकि सेयो मेरा डर मानदे ऊए मेरी सारिया आज्ञा पाँदे चलदे रओ, जेते कि तिना री ओर तिना रे वंशो री सदा पलाई ऊँदी रओ।" 30 इजी री खातर तूँ तिना खे जाई की बोली दे, "आपणे-आपणे डेरेया खे वापस ऊई जाओ।" 31 पर तूँ एथी मांगे खड़ेया रा रओ ओर मां सेयो सारिया आज्ञा, बिदिया ओर नियम जो ताखे इस्राएली लोका खे सिखाणे पड़ने, तांगे बोलणे ताकि सेयो तिना खे तेते प्रदेशो रे जेतेरा अक्क आऊँ तिना खे देणे वाल़ा ए, मानो।* 32 इजी री खातर तुसे आपणे परमेशर यहोवे री आज्ञा रे मुताबिक करने रे चौकसी करेयो; ओर तेसरी कोई बी आज्ञा नि तोड़नी। 33 जेते बाटा दे चलणे री आज्ञा तुसा रे परमेशर यहोवा तुसा खे देई राखी तेसा सारिया बाटा रिये चलदे रओ ताकि तुसे जिऊँदे रओ ओर तुसा रा पला ओ ओर जेते प्रदेशो रे तुसे मालक ऊणे तिदे तुसे जादा उम्रा तक बणे दे रओ।*