1 जे कोई मर्द केसी जवाणसा खे ब्याई लओ ओर तिजी ते बाद तेसा रे कोई शर्मनाक गल्ल देखी की तेसा ते दु:खी ऊई जाओ, तो से तेसा खे फारगती लिखी की ओर तेसा रे आथो रे देई की तेसा खे आपणे कअरो ते पेजी देओ।* 2 जेबे से जवाणस तेसरे कअरो ते चली जाओ, तेबे दूजे मर्दो री ऊई सकोई। 3 पर जे से दूजा मर्द बी तेसा ते नफरत करो ओर से तेसा खे फारगती लिखी की तेसा जवाणसा रे आथो दे देई की आपणे कअरो ते पेजी देओ या एस दूजे मर्दो री जिने से आपणी लाड़ी बणाई ती ओ मौत ऊई जाओ, 4 तो तेसा रा पईला लाड़ा जिने से आपणे कअरो ते पेजी ती थी, तेसा रे अशुद्ध ऊणे ते बाद तेसा खे आपणी लाड़ी नि बणाओ, कऊँकि ये परमेशर यहोवे री नजरा दे नफरता रा काम ए। ईंयाँ तैं से देश जेतेखे तेरा परमेशर यहोवा तेरा इस्सा करी की ताखे देओआ पापी नि बनाणा।

5 जे किने मर्दे नवां-नवां ब्या करी राखेया ओ, तो से नवां ब्याया रा मर्द सेना साथे युद्धो रे नि जाओ ओर ना ई सेना रे केसी बी किस्मा रे कामो री जिम्मेबारी तेस पाँदे पाई जाओ। से एकी सालो तक आपणे कअरे आजादिया साथे रई की आपणी ब्यायी री लाड़िया साथे खुशी मनांदा रओ।

6 कर्ज देणे वाल़ा कर्जदारो ते रईनो दे चाक्की या चाक्किया रा पूड़ नि राखो, कऊँकि एड़ा करना मानो तेसरे प्राण ई रईन राखणे जेड़ा ए।

7 जे कोई माणूं आपणे केसी इस्राएली पाईए खे दास बनाणे या बेचणे री इच्छा ते चुरांदा ऊआ पकड़ेया जाओ, तो एड़ा चोर काई देणा, ईंयाँ तैं एड़ी बुराई आपणे लोका बीचा ते दूर करनी।*

8 कोढ़ो री ब्यादा रे बारे दे चौकस रणा ओर जो कुछ लेवी पुरोईत ताखे सिखाओ तिजी रेई मुताबिक काम करने रे चौकसी करना, जेड़ी आज्ञा मैं लेवी पुरोईतो खे देई राखी तेड़ा ई करने रे चौकसी करना। 9 जेबे तुसे मिस्र प्रदेशो ते निकल़ी की आऊणे लगी रे थे, तेबे बाटा रे जो बर्ताव मरियमा साथे तेरे परमेशर यहोवा कित्तेया था, तिजी खे याद राखेया।

10 जेबे तूँ आपणे इस्राएली पाईए खे रईनो रे बदले कुछ त्वार देओ, तेबे तेसते रईन राखी री चीज लणे खे तेसरे कअरे नि जाणा। 11 तैं कअरो ते बारे खड़े रे रणा ओर जेसखे तूँ त्वार दे सेई रईनो री चीज तांगे बारे ल्याओ। 12 पर जे से माणूं गरीब ओ, तो तैं रईनो रे आपू गे राखी री तेसरी चादर लई की नि सऊणा, 13 जेबे त्याड़ा छिपणे लगो तेबे तैं तेसरी चादर जरूर वापस करी देणी, ताकि से आपणी चादर टखी की सुती सको ओर ताखे आशीर्वाद देओ ओर ये तेरे परमेशर यहोवे री नजरा रे तार्मिकता रा काम मानेया जाणा।

14 तैं दीन ओर गरीब मजदूरो पाँदे अन्देर नि करना, चाए से तेरे इस्राएली पाईया बीचा ते ओ, चाए तेरे देशो रे शईरो ते पीतरे रणे वाल़ा परदेशिया बीचा ते ओ। 15 तैं सूरज डूबणे ते पईले तेसरी मजदूरी देई देया करनी कऊँकि से माणूं गरीब आ ओर तेसरा त्यान आपणी कमाई री मजदूरिया पाँदे लगेया रा रणा, एड़ा नि ओ कि से तेरे खलाफ यहोवे री दुहाई देओ ओर तां पाँदे पापो रा दोष नि रओ।*

16 पाऊए रे पापो रिया बजअ ते बाओ खे मौता री सजा नि देणी ओर ना ई बाओ रे पापो रिया बजअ ते पाऊ काणा, जिने पाप करी राखेया ओ, सेई तेस पापो रिया बजअ ते काया जाओ।

17 तैं केसी परदेशी माणूंए रा या अनाथो रा न्याय नि बिगाड़ना ओर ना ई केसी बिदुआ रे कर्जे रे बदले तेसा रे टाल्ले रईन राखणे। 18 ये याद राखणा कि तूँ मिस्रो रे गुलाम था ओर तेरा परमेशर यहोवा ताखे तेथा ते छुड़ाई की ल्याया, इजी बजअ ते आज आऊँ ताखे ये आज्ञा देऊँआ।

19 जेबे तूँ आपणी जमीना दे पाक्की री फसल बाडे ओर डोरूए रे एक पूल़ा पूली की रई जाओ, तो तिजी खे लणे वापस नि जाणा, से परदेशी, अनाथ ओर बिदुआ खे छाडी देणा; तेबे तेरे परमेशर यहोवे तेरे सबी कामा दे ताखे आशीष देणी।

20 जेबे तूँ आपणे जैतूनो रे डाल़ा रे फल़ चाड़े, तेबे एकी बार चाड़ी लणे ते बाद तिजी री पाँगटिया दूजी बार नि चाड़निया, तिना रे फल़ परदेशी, अनाथ ओर बिदुआ खे राखी देणे। 21 जेबे तूँ आपणे अंगूरा रे बगीचे रे फल तोड़े, तो तेतेरा दाणा-दाणा नि तोड़ना, से परदेशी, अनाथ ओर बिदुआ खे रई जाओ। 22 ये याद राखणा कि तूँ मिस्रो रे गुलाम था, इजी खे ये काम करने खे आज आऊँ ताखे ये आज्ञा देऊँआ।