1 फेर जेबे तूँ तेते प्रदेशो रे पऊँची जाए, जेतेखे तेरा परमेशर यहोवा तेरा निज पाअग करी की ताखे देओआ ओर तेथो रा मालक ऊई की तिदे बसी जाए, 2 तेबे जो प्रदेश तेरा परमेशर यहोवा ताखे देओआ तेथो री जमीना री हर किस्मा री पईली फसल जेबे तूँ आपणे कअरे ल्याए, तेबे तेते बीचा ते कुछ टोकरिया दे लई की तेते जगा दे जाणा, जेतेखे तेरा परमेशर यहोवा आपणे रणे रिया जगा खे चूणी लओ। 3 ओर तिना दिना दे पुरोईता गे जाई की ये बोलणा, "आऊँ आज आपणे परमेशर यहोवे रे सामणे ये मानूँआ कि यहोवे आसा लोका खे जेस प्रदेशो खे देणे री म्हारे बुजुर्गा ते कसम खाई थी, तिदे आऊँ आईगा रा।" 4 तेबे पुरोईत तेरे आथो ते तेसा टोकरिया खे लई की तेरे परमेशर यहोवे री बेदिया रे सामणे राखी देओ।

5 तेसी बखते तेबे तैं आपणे परमेशर यहोवे खे ईंयाँ बोलणा,

"मेरा मूल़ मर्द एक

अरामी माणूं था

जो मरने वाल़ा था ओर

से आपणे छोटे जे परिवारो समेत

मिस्रो खे गया ओर

तेती परदेशी ऊई की रया ओर

तेती तेसते एक बड़ी,

ओर सामर्थी ओर बऊत माणूंआ साथे

परी री जाति पैदा ऊई।

6 मिस्रिए आसा साथे

बुरा बर्ताव कित्तेया,

ओर आसा री बेज्जती कित्ती

ओर आसा ते कठण काम कराए।

7 पर आसे आपणे बुजुर्गा रे

परमेशर यहोवे री

दुहाई दित्ती ओर

यहोवे म्हारी पुकार सुणी की

म्हारे दु:ख, म्हारी मजदूरी ओर

आसा पाँदा कित्तेया रा अन्देर देखेया।

8 ओर यहोवे तागतबर

आथ ओर बढ़ाई रिया

बांयी साथे बऊत

डराऊणे चिह्न ओर चमत्कार

दखाई की आसे

मिस्रो ते छुड़ाई की ल्याये

9 तिने आसे एते

जगा रे पऊँचाई की ओर

ये प्रदेश जो सच्चो खेई बऊत ई

पजणे वाल़ा ए

आसा खे देईता।

10 एबे ओ यहोवा,

देख, जो जमीन तैं

माखे देई राखी

तेतेरी पईली फसल

आऊँ तांगे ल्याई राखेया।"

तेबे तैं से आपणे परमेशर यहोवे री मौजुदगिया रे राखणी ओर यहोवे री आराधना करनी।

11 तेबे जितणिया अच्छी चीजा तेरा परमेशर यहोवा ताखे ओर तेरे कराने खे देओ, तिना रिया बजअ ते तैं लेवी ओर आपू बीचे रणे वाल़े परदेशिया समेत खुशी मनाणी।

12 तीजे साले जो दसुआ इस्सा देणे रा साल ठईरी रा, जेबे तूँ आपणी सबी प्रकारा री बढ़तिया रे दसुआ इस्सा निकयाल़ी चुको, तेबे से लेवी, परदेशी, अनाथ ओर बिदुआ खे देणा, ताकि सेयो तेरे शईरो रे पीतरे खाई की रज्जो;

13 तेबे तैं आपणे परमेशर यहोवे खे बोलणा, "मैं तेरी सारी आज्ञा रे मुताबिक पवित्र ठराई रिया चीजा आपणे कअरो ते निकयाल़िया ओर लेवी, परदेशी, अनाथ ओर बिदुआ खे देईतिया, तेरी कोई आज्ञा ना तो मैं टाल़ी ओर ना पूलेया। 14 तिना चीजा बीचा ते मैं शोग मनाणे रे बखते पनि खाया ओर ना ई तिना बीचा ते कोई चीज अशुद्धता री दशा रे कअरो ते निकयाल़ी ओर ना ई कुछ शोग करने वाल़ेया खे दित्तेया, मैं आपणे परमेशर यहोवे री सुणी, मैं तेरी सारी आज्ञा रे मुताबिक कित्तेया। 15 तूँ स्वर्गो ते जो तेरा पवित्र धाम ए नजर करी की आपणे निज लोक इस्राएलिया खे आशीष दे ओर एस प्रदेशो खे जो सच्चो खेई बऊत ई पजणे वाल़ा ए आशीष दे, जो तैं म्हारे बुजुर्गा ते कित्ते रे वादे रे मुताबिक आसा खे देई राखेया।"

16 ओ इस्राएल! आजके दिने तेरा परमेशर यहोवा ताखे इना बिदिया ओर नियम मानणे री आज्ञा देओआ, इजी री खातर आपणे सारे मन ओर सारे प्राणो ते इना खे मानणे रे चौकसी करना। 17 तैं तो आज यहोवे खे आपणा परमेशर मानी की ये वचन देई राखेया कि मां तेरिया बताई रिया बाटा रे चलणा ओर तेरी बिदिया, आज्ञा ओर नियम मानेया करूँगा ओर तेरी सुणेया करूँगा।

18 ओर यहोवे बी आज ताखे आपणे वादे रे मुताबिक आपणी प्रजा रूपी निज धन सम्पत्ति मानी राखेया, ताकि तूँ तेसरी सबी आज्ञा खे मानेया करो 19 ओर से आपणी बणाई रिया सबी जातिया ते जादा तारीफ, नाओं ओर शोभा रे बारे दे ताखे सम्मानित करो ओर तूँ तेसरे वादे रे मुताबिक आपणे परमेशर यहोवे री पवित्र प्रजा बणेया रा रओ।