बिधान 10

पात्थरो रिया नईया फट्टिया

1 ओ इस्राएलो रे लोको यहोवे माखे बोलेया, "पईलकिया पात्थरो रिया फटिया जेड़िया दो ओर पात्थरो रिया फटिया बणाई लो ओर तिना खे लई की मांगे पाह्ड़ो पाँदे ऊबे आईजा ओर लकड़िया रा एक सन्दूक बी बणाई लओ। 2 मां तिना फटिया पाँदे सेयो ई वचन लिखणे, जो तिना पईलकिया पात्थरो रिया फटिया पाँदे लिखी राखे थे, जो तैं तोड़ी तिया ओर तैं सेयो तेते सन्दूको रे राखणियां।"

3 तेबे मैं बबूलो रिया लकड़िया रा एक सन्दूक बणाया ओर पईलकिया फटिया जेड़िया पात्थरो रिया दो ओर फटिया बणाईया ओर तिना खे आथो रे लई की सीनै रे पाह्ड़ो पाँदे चढ़ीगा।*10:3 इब्रानी 9:4 4 ओर जो दस वचन यहोवे सभा रे दिने पाह्ड़ो पाँदे आगी बीचा ते तुसा खे बोले थे, सेयो ई तिने पईलके जेड़े तिना फटिया पाँदे लिखे ओर सेयो मांगे सम्बाल़ी तिया। 5 तेबे आऊँ सीनै रे पाह्ड़ो पाँदा ते थाले उतरी की आईगा ओर फटिया आपणे बणाए रे सन्दूको रे राखी तिया ओर यहोवे री आज्ञा रे मुताबिक सेयो तदुए ते तेथी राखी राखिया।

हारूणो रा मरना

6 इस्राएली लोक याकान वंशिया रे कुएँ ते चली की मोसेरा रिया तरफा खे आए। तेती हारूण मरीगा ओर से तेथी दबाईता ओर तेसरा पाऊ एलीआजार तेसरी जगा पाँदे पुरोईतो रा काम करने लगेया। 7 सेयो तेथा ते चली की गुदगोदा री तरफा खे गए ओर गुदगोदा ते योतबाता खे चले, जेती बऊत सारी पाणिए रिया नदिया ए। 8 मूसे इस्राएली लोका खे बोलेया, "तेस बखते यहोवे लेवी गोत्र इजी खे लग कित्तेया, ताकि सेयो यहोवे री वाचा रा सन्दूक चकेया करो ओर यहोवे री मौजुदगिया रे खड़े ऊई की यहोवे रे ठराए रे बलिदाना खे चढ़ाया करो ओर तेसरे नाओं ते आशीर्वाद देया करो, जेड़ा सेयो आज बी करोए। 9 इजी बजअ ते लेविया खे आपणे पाईया साथे कोई निज पाअग या बाओ री जायदात नि मिली; बल्कि यहोवा ई तिना रा निज पाअग ए, जेड़ा कि तुसा रे परमेशर यहोवा तिना साथे वादा कित्तेया था।"

परमेशरो रा मूसे री प्रार्थना रा जबाब देणा

10 आऊँ तो पईलके जेड़ा तेते पाह्ड़ो पाँदे चाल़ी दिन-रात ठईरेया रा रया ओर तेस बार बी यहोवे मेरी सुणी ओर ताखे नाश करने री इच्छा छाडी ती। 11 फेर यहोवे माखे बोलेया, "उठ, ओर तूँ इना लोका री अगुवाई कर, ताकि जेस प्रदेशो खे देणे खे मैं इना रे बुजुर्गा ते कसम खाई की बोलेया था तिदे सेयो जाई की तिजी खे आपणे अक्को रे करी लओ।"

परमेशरो री माँग

12 एबे ओ इस्राएल, तेरा परमेशर यहोवा इजी ते अलावा तांते ओर क्या चाओआ कि तूँ आपणे परमेशर यहोवे रा डर मानो ओर तेसरी आज्ञा रे मुताबिक चलो ओर तेसते प्यार राखो ओर आपणे पूरे मन ओर सारे प्राणो ते तेसरी सेवा करो।*10:12 लूक 10:27 13 ओर यहोवे रिया जो-जो आज्ञा ओर बिदिया आऊँ आज ताखे सुणाऊँआ तिना खे मान, जेते की तेरा पला ओ।

14 देख, सर्ग ओर जो कुछ बी तिदे अए ओर तरती ओर तिदे जो कुछ अए, से सब तेरे परमेशर यहोवे रा ईए।

15 तेबे बी यहोवे तेरे बुजुर्गा साथे प्यार राखेया ओर तिना ते बाद तुसा लोका खे जो तिना री ल्वाद ए तरतिया रे सबी लोका बीचा ते चूणी ला, जेड़ा कि आज बी ए।*10:15 1 पत 2:9 16 इजी री खातर आपणा-आपणा मन बदली लओ ओर आईंदा खे टीठ नि रओ।

17 कऊँकि तुसा रा परमेशर यहोवा सर्वशक्तिमान परमेशर ए, से महान, पराक्रमी ओर डरो जोगा परमेशर ए, जो केसी रा पक्ष नि करदा ओर ना ई से केसी ते रिश्वत लंदा।*10:17 प्रेरित 10:34, रोमी 2:11, गलाति 2:6, इफिसि 6:9, कुलु. 3:25, 1 तीमुथि 6:15, प्रकाशित 17:14, प्रकाशित 19:16

18 से अनाथ ओर बिदुआ रा न्याय चुकाओआ, ओर तुसा बीचे रणे वाल़े परदेशी माणूंआ साथे एड़ा प्यार राखोआ कि तिना खे रोटी ओर टाल्ले देओआ। 19 इजी री खातर तुसे बी परदेशी माणूंआ साथे प्यार-प्रेम राखणा, कऊँकि तुसे बी मिस्र प्रदेशो रे परदेशी थे। 20 तैं आपणे परमेशर यहोवे रा आदर करना तेसरी ई आराधना करना ओर तेस साथे ई विश्वासो रे बणे रे रणा ओर सिर्फ तेसरे ई नाओं री कसम खाणी। 21 सेई तुसा री स्तुतिया जोगा ए ओर सेई तुसा रा परमेशर ए, जिने तां साथे सेयो बड़े खास ओर डराऊणे काम कित्ते, जो तैं सेयो आपू देखी राखे। 22 जेबे तेरे बुजुर्ग मिस्रो दे गये, तेबे सेयो सिर्फ सत्तर ई माणूं थे; पर एबे तेरे परमेशर यहोवा तेरी गिणती सर्गो रे तारेया जेड़ी बऊत करी ती री।*10:22 प्रेरित 7:14, इब्रानी 11:12