1 मूसे जाई की यो गल्ला सबी इस्राएली लोका खे सुणाईयां। 2 मूसे तिना खे ये बी बोलेया, "आज आऊँ 120 साला राए ओर एबे आऊँ चली-फिरी नि सकदा, कऊँकि यहोवे माखे बोलेया कि तूँ एते यरदन नदिया ते पार नि जाई सकणा।" 3 तांते आगे पार जाणे वाल़ा तेरा परमेशर यहोवा ईए, तेस सेयो जातिया तेरे सामणे ते काडी की नाश करी देणियां ताकि तूँ तिना रे प्रदेशो रा अक्कदार ऊई जाए ओर यहोवे रे वादे रे मुताबिक यहोशू तांते आगे-आगे पार जाणा।

4 ओर जिंयाँ यहोवे एमोरिया रे राजा सिहोन ओर ओग ओर तिना रा देश नाश करी ता, तिंयाँ ई तेस यरदन नदिया ते पार तिना जातिया साथे बी करना। 5 ओर जेबे यहोवे सेयो तुसा ते अरवाई देणे, तेबे तुसे तिना सारी आज्ञा रे मुताबिक तिना साथे बर्ताव करना जो मैं तुसा खे देई राखिया।

6 तूँ ईम्मत राख ओर मजबूत ओ, तिना ते नि डर, कऊँकि तां साथे चलणे वाल़ा तेरा परमेशर यहोवा ए; तेस ताखे आसरा देणा ओर तूँ छाडणा नि।*

7 तेबे मूसे यहोशूए खे बुलाई की सबी इस्राएलिया सामणे बोलेया, "तूँ ईम्मत राख ओर मजबूत ऊई जा, कऊँकि इना लोका साथे तेते प्रदेशो दे जेतेखे यहोवे इना रे बुजुर्गा ते कसम खाई की देणे खे बोलेया था, तूँ जाणा ओर तां ई यो लोक तेथो रे अधिकारी करने।* 8 ओर तांते आगे-आगे चलणे वाल़ा यहोवा ए, से तां साथे रणा ओर तेस ताखे आसरा देणा ओर ना तूँ छाडणा, इजी री खातर डर नि ओर ना नराश ओ।"*

9 तेबे मूसे येई बिधान लिखी की लेवी पुरोईता खे, जो यहोवे री वाचा रा सन्दूक चकणे वाल़े थे ओर इस्राएलो रे सबी स्याणे लोका गे सम्बाल़ी ती। 10 तेबे मूसे तिना खे आज्ञा दित्ती, "हर सातुए सालो रे आखरी दे, मतलब कर्जे रे छुटकारे रे सालो रे चूँगड़िया रे त्योआरो रे मोके पाँदे, 11 जेबे सारे इस्राएली तेरे परमेशर यहोवे री तेसा जगा दे, जो तेस चूणी लणी आई की कट्ठे ओ, तेबे ये बिदिया सबी इस्राएलिया खे पढ़ी की ईंयाँ सुनाणी कि सब तिजी खे सुणो। 12 क्या मर्द, क्या जवाणस, क्या बाल़क, क्या तुसा रे डेरे रे पीतरे रणे वाल़े परदेशी, सब लोक कट्ठे करने, ताकि सेयो सुणी की सीखो ओर तेरे परमेशर यहोवे रा डर मानी की, एते बिधानो रे सारे वचना खे मानणे खे त्यार रओ, 13 ओर तिना रे बच्चे जिने यो गल्ला नि सुणिया सेयो बी सुणी की सीखो, ताकि तुसा रे परमेशर यहोवे रा डर तेस बखतो तक मानदे रओ, जदुओ तक तुसे तेते प्रदेशो दे जिऊँदे रओ, जेतेरे मालक ऊणे खे तुसे यरदन नदिया ते पार जाणे लगी रे।"

14 फेर यहोवे मूसे खे बोलेया, "देख, तेरे मरने रा दिन नेड़े ए; तूँ यहोशूए खे बुला ओर तुसे दोनो मिलणे वाल़े तम्बूए रे आई की आजीर ओ, ताकि आऊँ तेसखे आज्ञा देऊँ।" तेबे मूसा ओर यहोशू जाई की मिलाणे वाल़े तम्बूए रे आजीर ऊए। 15 तेबे यहोवे तेते तम्बूए रे बादल़ो रे खम्बे रे ऊई की दर्शण दित्तेया ओर बादल़ो रा खम्बा तम्बूए रे द्धारो पाँदे रूकी गा।

16 तेबे यहोवे मूसे खे बोलेया, "देख, तूँ तो आपणे मरे रे बुजुर्गा साथे सऊणे वाल़ा ए। पर यो इस्राएली लोक उठी की तेते प्रदेशो रे पराये देवतेया पीछे जिना बीचे जाई की सेयो रणे, व्याभिचारी ऊई जाणे ओर माखे छाडी की से वाचा जो मैं तिना साथे बानी थी, तोड़ी देणी। 17 तेस बखते मेरा कोप इना रे खलाफ पड़कणा ओर मां बी यो छाडी देणे ओर आपणा मूँ इना ते लकोई देणा ओर बऊत सारिया बिपदा ओर क्ल़ेश इना पाँदे आऊणे, एथो तक कि इना तेस बखते बोलणा, ‘क्या यो बिपदा आसा पाँदे इजी खे तो नि आईया, कऊँकि म्हारा परमेशर आसा बीचे निए?’ 18 तेस बखते मां तिना सबी बुराईया रिया बजअ ते जो इना पराये देवतेया रिया तरफा खे फिरी की करनिया, मां तिना ते जरूर आपणा मूँ लकोई देणा।"

19 इजी री खातर तुसे एबे ये गीत लिखी लो ओर तैं ये इस्राएलिया खे सिखाई की याद करवाई देणा, ताकि ये गीत तिना रे खलाफ तेरा गवाह् ठईरो। 20 जेबे आऊँ इना खे तेते प्रदेशो रे पऊँचाऊँ गा जेतेखे देणे री मैं इना रे बुजुर्गा ते कसम खाई थी ओर जिदे दूद ओर सईतो रिया तारा बह्ओईया ओर खाई-खाई की इना रा पेट परी जाओ ओर ये तगड़े ऊई जाणे; तेबे इना पराये देवतेया री तरफा खे फिरी की तिना री आराधना करने लगणी ओर मेरा बेज्जती करी की मेरी वाचा तोड़ी देणी। 21 बल्कि एबु बी जेबे आऊँ इना खे तेते प्रदेशो रे जेतेरे बारे दे मैं कसम खाई राखी, पऊँचाई नि चुकेया, माखे पता ए यो क्या-क्या सोचणे लगी रे, इजी खे जेबे बऊत सारिया बिपदा ओर क्ल़ेश इना पाँदे आऊणे, तेबे एस गीतो इना पाँदे गवाई देणी, कऊँकि इना री पीढ़िया ये कदी नि पूलणा।

22 तेबे मूसे तेस ई दिने ये गीत लिखी की इस्राएलिया खे सिखाया।

23 ओर यहोवे नूनो रे पाऊ यहोशूए खे ये आज्ञा दित्ती, "ईम्मत राख ओर मजबूत ओ, कऊँकि इस्राएलिया खे तेते प्रदेशो दे जेतेखे इना खे देणे री मैं तिना ते कसम खाई थी, तां पऊँचाणे ओर मां आपू तां साथे रणा।"

24 जेबे मूसा एते बिधानो रे वचनो खे शुरूओ ते लई की अन्तो तक कताबा दे लिखी चुकेया, 25 तेबे मूसे यहोवे रा सन्दूक चकणे वाल़े लेविया खे ये आज्ञा दित्ती, 26 "बिधानो री एसा कताबा खे लई की आपणे परमेशर यहोवे रे वाचा रे सन्दूको गे राखी देओ, इजी खे तेथी रणे देणा ताकि ये तेती तुसा रे खलाफ गवाई देंदी रओ।* 27 कऊँकि आऊँ जाणूंआ तुसे छल करने वाल़े ओर टीठ लोक ए; देखो, मेरे जिऊँदा ओर साथे रंदे ऊए बी तुसे यहोवे साथे छल करदे आई रे, फेर मेरे मरने ते बाद कऊँ नि करना!"

28 जाओ, तुसे आपणे गोत्रो रे सारे बुजुर्गा खे ओर आपणे सरदारा खे मांगे कट्ठा करो, ताकि आऊँ तिना खे ये वचन सुणाई की तिना रे खलाफ सर्ग ओर तरती दुँईं खे गवाह् बणाऊँ। 29 कऊँकि माखे पता ए कि मेरी मौता ते बाद तुसे बिल्कुल बिगड़ी जाणे ओर जेते बाटा रे चलणे री आज्ञा मैं तुसा खे देई राखी, से बी तुसा छाडी देणी ओर आऊणे वाल़े दिना रे जेबे तुसे तिना कामा खे करी की जो यहोवे री नजरा रे बुरा ए, आपणी बणाई रिया चीजा री पूजा करी की से चिढ़ाणा, तेबे तुसा पाँदे बिपदा आऊणी।

30 तेबे मूसे इस्राएलो री सारी सभा खे एते गीतो रे वचन शुरूओ ते आखरी तक सुणाए,