1 जो वाचा यहोवे इस्राएली समाजो साथे होरेब पाह्ड़ो पाँदे बानी थी तिजी ते अलावा यहोवे मूसे खे आज्ञा दित्ती कि से इस्राएली समाजो साथे मोआब प्रदेशो रे एक वाचा बानो तेतेरे यो वचन ए।

2 तेबे मूसे सबी इस्राएलिया खे बुलाई की बोलेया, "जो कुछ यहोवे मिस्र प्रदेशो रे तुसा रे देखदे फिरौन ओर तेसरे सारे काम करने वाल़ेया ओर तेसरे सारे प्रदेशो साथे कित्तेया से तुसे देखेया, 3 सेयो बड़े-बड़े परीक्षा रे काम, चिह्न ओर बड़े-बड़े चमत्कार तेरी आखी सामणे ऊए, 4 पर यहोवे आजो तक तुसा खे ना तो समजणे खे बुद्धि, ना देखणे खे आखी ओर ना सुणने खे कान देई राखे।* 5 मैं तुसा री सुनसाण जगा रे चाल़िया साला तक अगुवाई कित्ती। तेबे ना तो तुसा रे बदनो रे टाल्ले फट्टी की बदनो ते थाले पड़े ओर ना ई तेरे पैरा रे जोड़े फट्टी की पैरा ते लग ऊए। 6 तुसे रोटी नि खाई सके ओर अंगूरा रा रस ओर शराब तुसे पी नि सके, इजी री बजअ ये ए कि तुसे एसा गल्ला खे जाणी सको कि आँऊ ई यहोवा तुसा रा परमेशर ए।"

7 ओर जेबे तुसे एते जगा रे आए, तेबे हेशबोनो रा राजा सिहोन ओर बाशानो रा राजा ओग, यो दोनो आसा साथे युद्ध करने खे आए ओर आसे तिना ते जीती की तिना रा सारा प्रदेश लई ला। 8 ओर रूबेनी, गादी ओर मनश्शे रे आदे गोत्रा रे लोका खे निज पाअग करी की देईता।

9 इजी री खातर तुसे एसा वाचा रे ज्ञानो रा पालण करो ओर तिजी रे मुताबिक काम करो ताकि जो कुछ करो तिदे सफल ओ। 10 ओ इस्राएल, आज तेरे कुल़ो रे क्या स्याणे लोक, क्या सरदार, तुसा रे खास-खास मर्द, क्या गोत्र-गोत्रो रे तुसे सारे इस्राएली मर्द, 11 तुसा रे बाल-बच्चे ओर तिना रिया जवाणसा, तेरे डेरे दे रणे वाल़े परदेशी मजदूर जो तिना खे बाल़ने खे लकड़ू बाडोए ओर पाणी परोए, तुसे सब के सब परमेशर यहोवे रे सामणे इजी खे खड़ी रे, 12 ताकि जो वाचा तेरा परमेशर यहोवा आज तुसा ते बानोआ ओर जो कसम आज से तुसा खे खुल़ाओआ, तिदे तूँ शामिल ऊई जाए। 13 इजी री खातर कि तेस वचनो रे मुताबिक जो तिने ताखे दित्तेया ओर तेसा कसमा रे मुताबिक जो तिने अब्राहम, इसहाक ओर याकूब, तेरे बुजुर्गा ते खाई थी, से आज ताखे आपणी प्रजा रे लोका रे रूपो रे ठराओ ओर आपू तेरा यहोवा ठईरो।

14 फेर आऊँ एसा वाचा ओर एसा कसमा खे बस तुसा खेई नि, 15 पर तिना खे बी, जो आज आसा साथे एती म्हारे परमेशर यहोवे सामणे खड़ी रे ओर जो आज एती आसा साथे निए, साजा करूँआ।

16 तुसे जाणोए कि आसे मिस्र प्रदेशो रे किंयाँ रऊँ थे ओर सफरो रे बखते आसे लग-लग जातिया बीचा ते किंयाँ निकल़े थे, 17 तेबे तुसे तिना रिया केड़िया-केड़िया घिनौनी चीजा, लकड़ी-पात्थर, सूईने-चाँदिए रिया केड़िया मूर्तिया देखिया। 18 इजी खे सावधान! तुसा लोका बीचे एड़ा कोई मर्द, जवाणस, कुल या गोत्रो रे लोक नि ऊणे चाईयो जिना रा दिल आज म्हारे परमेशर यहोवे ते फिरी जाओ ओर सेयो जाई की तिना जातिया रे देवतेया री पूजा करो ओर ओरी खे बी परमेशरो री आज्ञा ना मानणे री बजअ बणी जाओ।*

19 एड़ा माणूं एसा कसमा रे वचन सुणी की आपू खे आशीर्वादो जोगा नि समजो ओर ये सोचो कि चाए आऊँ आपणे दिलो खे टीठ करी की चलूँ, तेबे बी मां साथे ठीक ऊणा। एड़ा माणूं आपू साथे ओरी खे डबोई देओआ। 20 यहोवे तेसरा पाप माफ नि करना, बल्कि यहोवे रा कोप ओर तेसरी ईर्ष्या री इच्छा तेस माणूंए रे खलाफ पड़कणी ओर जितणे स्राप एते कताबा दे लिखी राखे सेयो सारे तेस पाँदे आई की पड़ी जाणे। यहोवे तेसरा नाओं-नशाण तरतिया पाँदा ते मिटाई देणा।* 21 ओर बिधानो री एसा कताबा रे जिदे वाचा रे बारे बताई राखेया, तिजी रे सारे स्रापो रे मुताबिक यहोवे से माणूं इस्राएलो रे सारे गोत्रा बीचा ते तेसरा नाश करने खे लग करना।

22 ओर आऊणे वाल़ी पीढ़िया रे तुसा रे वंशो रे लोक जो तुसा ते बाद पैदा ऊणे ओर परदेशी माणूं बी, जो दूर प्रदेशो ते आऊणे, तिना तेस प्रदेशो रिया बिपदा ओर तिदे यहोवे रे जरीये फैलाए रे रोग देखी की हैरानिया साथे ये बोलणा, 23 ओर ये बी देखी की कि एथो री सारी जमीन गन्धक ओर लूणो साथे परी गी री ओर एथो तक फूकी गी री कि इदे ना तो कुछ बायी सकदे ओर ना ई इदे कुछ जम्मी सकदा ओर ना काआ जमदा, बल्कि सदोम ओर गमोरा, अदमा ओर सबोयीमो जेड़ा ऊईगा रा, जो यहोवे आपणे कोप ओर जल़नी साथे उल्ट-पुल्ट करीते थे।

24 तेबे सबी जातिया रे लोका पूछणा, "यहोवे एस प्रदेशो साथे एड़ा कऊँ कित्तेया ओर इतणे बड़े कोपो रे पड़कणे री क्या बजअ ए?"

25 तेबे लोका ये जबाब देणा, "तिना रे बुजुर्गा रे परमेशर यहोवा जो वाचा तिना साथे मिस्र प्रदेशो ते निकयाल़दे बखते बानी थी, तिने से तोड़ी ती। 26 ओर जाई की पराये देवतेया री पूजा ओर आराधना कित्ती जिना खे सेयो पईले नि जाणो थे ओर ना ई यहोवे तिना रे इस्से रे ये देवते दित्ते थे। 27 तेबेई तो यहोवे रा कोप एते प्रदेशो पाँदे पड़केया, ताकि एते कताबा रे लिखे रे सारे स्राप एते प्रदेशो पाँदे आओ। 28 तेबे यहोवे कोप, जल़न ओर बऊत जादा गुस्से रे ऊई की सेयो तिना रे प्रदेशो ते चकी की सेयो दूजे प्रदेशो रे सेटी ते, जेड़ा कि आज सामणे ए।"

29 गुप्त गल्ला म्हारे परमेशर यहोवे रे वशो रे ए; पर जो बताई राखिया सेयो सदा आसा रे ओर आसा रे वंशो रे वशो रे रणियां, ताकि एते बिदिया रिया सारिया गल्ला पुरिया ऊई जाओ।