1 तैं आपणे परमेशर यहोवे खे एड़ा कोई बल़द या पेड-बाकरी बलि करने, जिना रे शरीर ठीक-ठाक ओ ओर तिना दे कोई नुक्स नि ओ; कऊँकि एड़ा करना तेरे परमेशर यहोवे री नजरा दे नीच काम ए।

2 जिना शईरा खे तेरा परमेशर यहोवा ताखे रणे खे देओआ, अगर तिना बीचे कोई जवाणस या मर्द एड़ा मिलो, जिने तेरे परमेशर यहोवे री वाचा तोड़ी की एड़ा काम करी राखेया ओ, जो तेसरी नजरा रे बुरा ए, 3 मतलब मेरी आज्ञा नि मानी की, पराये देवतेया री या सूरज, चाँद या सर्गो रे गणो बीचा ते केसी री पूजा कित्ती ओ या तिना गे माथा तेकेया ओ 4 ओर ये गल्ला तांगे बताई जाओ या तेरे सुणने रे आओ; तेबे ठीक-टंगो दे पूछताछ करनी ओर जे ये गल्ल सच्च निकल़ो कि इस्राएली समाजो दे एड़ा नीच काम करी राखेया, 5 तो जिने जवाणसे या मर्दे से काम करी राखेया ओ, तेसखे आपणे शईरो रे प्रवेश द्धारो पाँदे लई जाई की एड़े पात्थर बाणे कि से मरी जाओ। 6 एड़ा माणूं जो मौता री सजा जोगा ठईरो से एकी गवा री गवाईया ते काया नि जाओ, पर दो या तीन माणूंआ री गवाईया ते काया जाओ।* 7 तेसखे काणे खे सबी ते पईले गवाओ रे आथ उठो ओर तिना ते बाद ओरी सबी लोका रे आथ उठो। ईंयाँ तैं एड़ी बुराई आपू बीचा ते दूर करनी।*

8 जे तेरे शईरो ते पीतरे कोई लड़ाईया री गल्ल ओ, मतलब आपू बीचे खून, बईस या कुठणे रा कोई मकद्दमा उठो ओर तेतेरा न्याय करना ताखे कठण लगो, तो तेते जगा रे जाई की जो तेरे परमेशर यहोवा छाँटणी; 9 लेवी पुरोईता गे ओर तिना दिना रे न्यायिया गे जाई की, पूछताछ करनी, ताकि सेयो तुसा खे न्याय रा फैंसला बताओ। 10 न्याय री जेड़ी फैंसले री गल्ल तेते जगा रे लोक जो यहोवा छाँटी लओगा, तांगे बताओ, तेतेरे ई मुताबिक करना ओर जो व्यवस्था सेयो ताखे देओ तेतेरे ई मुताबिक पूरा करने रे चौकसी करनी; 11 व्यवस्था री जो गल्ल सेयो तांगे बताओ ओर न्याय री जो गल्ल सेयो ताखे बोलो, तेतेरे ई मुताबिक करना, तिजी खे किंयाँ बी बदल़ने री कोशिश नि करनी। 12 जो माणूं कमण्ड करी की तेस पुरोईतो री, जो तेती तेरे परमेशर यहोवे री सेवा-टईल करने खे रणा, मानो नि या तेस न्यायियो री नि सुणो, तो से माणूं काई देणा, ईंयाँ तां इस्राएली समाजो ते एड़ी बुराई दूर करी देणी। 13 ये सुणी की सारे लोक डरी जाणे ओर फेर कमण्ड नि करना।

14 जेबे तूँ तेते प्रदेशो रे पऊँचे जेतेखे तेरा परमेशर यहोवा ताखे देओआ ओर तेतेरा अक्कदार ऊई जाए ओर तेती बसी की बोलणे लगे कि चारो तरफा रिया सब जातिया जेड़ा मां बी आपू पाँदे राजा ठराणा। 15 तेबे जेसखे तेरा परमेशर यहोवा चूणी लओ जरूर सेई राजा बनाणा। आपणे पाईया बीचा तेई कोई आपू पाँदे राजा ठराणा, कोई गैर इस्राएली जो तेरा पाई नि ओ तूँ तेसखे आपू पाँदे राजा नि ठराई सकदा।

16 ओर से बऊत कोड़े नि राखो ओर ना एड़ी इच्छा ते आपणी प्रजा रे लोका खे मिस्र प्रदेशो दे पेजो कि तेसगे बऊत कोड़े ऊई जाओ, कऊँकि यहोवे तुसा खे बोली राखेया कि तुसे तेते बाटा रे फेर कदी वापस नि आऊणा। 17 राजा बऊत जादा लाड़िया पनि राखो, एड़ा नि ओ कि तेसरा मन यहोवे रिया तरफा ते पटकी जाओ ओर ना से आपणा सूईना चाँदी बऊत बढ़ाओ।

18 जेबे से राजगद्दिया पाँदे बैठो, तेबे एते बिधानो री कताब, जो लेवी पुरोईता गे रणी, तिजी री एक नकल आपणियां तँईं लिखी की लई लओ। 19 से तिजी खे आपू गे राखो ओर आपणी पूरी जिन्दगी तिजी खे पढ़ेया करो, जेते कि से आपणे परमेशर यहोवे रा डर मानो ओर एसा व्यवस्था ओर इना बिदिया री सारी गल्ला मानणे रे चौकसी करना सीखो। 20 जेते कि से आपणे मनो रे कमण्ड करी की आपणे पाईया खे तुच्छ नि जाणो ओर इना आज्ञा खे पुरिया तरअ ते मानो जेते कि से ओर तेसरे वंशो रे लोक इस्राएलिया बीचे बऊत साला तक राज करदे रओ।