यहोशू 1

परमेशरो रा यहोशूए खे आज्ञा देणा

1 जेबे परमेशरो रे दास मूसे रे मौत ऊई तेबे परमेशरे नूनो रे पाऊ यहोशूए ते जो मूसे रा सेवक था बोलेया, 2 "मेरा दास मूसा मरी गा रा, तो एबे तूँ त्यार ऊई जा ओर एसा सारी प्रजा समेत यरदन नदिया ते पार ऊई की तेते देशो खे चल, जो आऊँ तिना खे, मतलब इस्राएली लोका खे देऊँगा। 3 तेते वादे रे मुताबिक जो मैं मूसे ते कित्तेया था, मतलब हर एक जेसा जगा पाँदे तुसे पैर राखोगे, से सब मां तुसा खे ई देई देणी।" 4 मतलब दक्खणा रे रेगिस्तानो ते लई कि उत्तर दिशा दे लबानोनो री पाह्ड़िया तक ओर पुर्बो दे फरात नदिया ते लई की पच्छमा दे बड़े समुद्रो तक हित्तिया रा जो सारा देश ए से तुसा रा इस्सा ठईरना। 5 यहोशू सुण, जदो तक तुँ जिऊँदा रणा कोई बी तां सामणे ठईरी नि सकणा, जेड़ा आऊँ मूसे साथे रया तेड़ा ई तां साथे बी रऊँगा मां तूँ कदी बी कल्ला नि छाडणा। 6 इजी री खातर याओ बानी की मजबूत ऊई जा, कऊँकि जेस देशो खे देणे री कसम मैं इना रे बुजुर्गा ते खाई थी तिजी रे अधिकारी तां यो करने। 7 पर इतणा ओ कि तूँ याओ बानी की ओर बऊत मजबूत ऊई की जो बिधान मेरे दास मूसे ताखे देई राखे तिजी रे मुताबिक करने रे चौकसी करेआ ओर तिजी ते ना तो दाँणे मुड़ना ओर ना खूँजे, तेबे जेती-जेती तूँ जाणा, तेती-तेती तेरे काम सफल ऊणे। 8 बिधानो री एसा कताबा*1:8 कताबा चामड़े री चादर दे लिखी रिया इना समजा रिया गल्ला खे याद राखणा, इदे ई रात-दिन त्यान देणा, ओर जो कुछ तिदे लिखी राखेया तेतेरे मुताबिक करदे रणा, कऊँकि एड़ा ई करने ते तेरे सारे काम सफल ऊणे ओर तेरी बढ़ोतरी ऊणी। 9 याद राख कि मैं ताखे आज्ञा देई राखी, "याओ बानी की पक्का ऊई जा; इजी री खातर ना तो डरना ओर ना कबराणा, कऊँकि जेती-जेती तूँ जाणा, तेती-तेती तेरा प्रभु परमेशर तां साथे रणा।"

यहोशूए रा इस्राएली लोका खे आज्ञा देणा

10 तेबे यहोशूए इस्राएली लोका रे मुखिये खे ये आज्ञा दित्ती, 11 तिने बोलेया, "डेरेया दे ओरे-पोरे जाई की प्रजा रे लोका खे ये आज्ञा देयो कि आपू-आपू खे रोटी त्यार करी की राखो, कऊँकि तीऊँ दिना रे पीतरे तुसा लोका खे यरदन नदिया ते पार उतरी की तेस देशो खे आपणे अक्को दे लणे खे जाणा ए जेतेखे तुसा रा प्रभु परमेशर तुसा रे अक्को दे देणे वाल़ा ए।" 12 तेबे यहोशूए रूबेनी ओर गादी गोत्रा रे लोका खे ओर मनश्शे रे आदे गोत्रो रे लोका खे बोलेया, 13 "जो आज्ञा प्रभुए रे दास मूसे तुसा खे दित्ती थी तिजी खे याद राखो, कि तुसा रे प्रभु परमेशरो तुसा खे ये देश देणा जिदे तुसे एबु बसी गे रे तुसा खे शान्ति मिलणी। 14 तुसा रिया लाड़िया, बाल-बच्चे ओर डांगर तो एते देशो रे रओ जो मूसे तुसा खे एती यरदन नदिया ते वार पूर्बा रिया तरफा खे दित्तेया, पर तुसे जो शूरवीर ए अथियार बानी की आपणे बाकि इस्राएली पाईया ते आगे नदिया ते पार पच्छमा रिया तरफा खे जाओ ओर तिना री मताद करो। 15 तेबे जेबे प्रभुए तुसा रे बाकि इस्राएली पाईया खे एड़ा राम देणा जेड़ा से तुसा खे देई चुकेया रा ए ओर सेयो बी तुसा रे परमेशर यहोवे रे दित्ते रे देशो रे अधिकारी ऊई जाणे, तेबे तुसे आपणे अक्को रे देशो दे, जो परमेशरो रे दास मूसे यरदन नदिया ते वार पूर्ब दिशा रिया तरफा खे देई राखेया, वापस ऊई की एथो रे अधिकारी ऊणे।" 16 तेबे तिने लोके यहोशूए खे ज्वाब दित्तेया, "जो कुछ तैं आसा खे करने री आज्ञा देई राखी, से आसा करना ओर जेती केथी तूँ आसा खे पेजेगा, आसा तेती जाणा। 17 जिंयाँ आसे सबी गल्ला दे मूसे री मानूँ थे तिंयाँ ई तेरी बी मानेया करूँगे, इतणा ओ कि जिंयाँ तेरा प्रभु परमेशर मूसे साथे रओ था तिंयाँ ई तां साथे बी रओ। 18 चाए जो कोई बी तेरे खलाफ बगावत करो ओर जितणी आज्ञा तूँ दे तिना खे नि मानो, तो से आसा काई देणा। पर तूँ मजबूत ओ ओर याओ बानी की राख।"