यहोशू 20

शरण लणे रे शईर ठराणा

1 तेबे यहोवे यहोशूए खे बोलेया, 2 "इस्राएली लोका खे ये बोल कि मैं मूसे खे कुछ शरण लणे वाल़े शईरा रे बारे दे बोलेया था, तिजी रे मुताबिक तिना खे ठराई लो। 3 जेते कि जो कोई माणूं गल़तिया दे बिना जाणे केसी माणूंए खे काई देयो, तो से तिना बीचे केसी शईरो दे नठी जाओ, इजी री खातर सेयो शईर बदला लणे वाल़े ते बचणे रिया खातर शरण लणे री जगा ठईरो।" 4 से तिना शईरा बीचा ते केसी दे नठी जाओ ओर तेस शईरो रे द्वारो गे खड़ा ऊई की तेथो रे बुजुर्गा खे आपणा मुकद्दमा सुणाओ ओर सेयो तेसखे आपणे शईरो दे कुछ बखतो तक आपू गे राखी देयो, ओर तेसखे कोई जगा देयो, जिदे से तिना साथे रई सको। 5 जे खूनो रा बदला लणे वाल़ा तेसखे काणे खे तेसरे पीछे जाओ, तो सेयो बुजुर्ग ये जाणी की कि तिने से माणूं अणजाणे दे ओर पईले ते तेस साथे बिना बैर राखे काया, तेस खूनिए खे तेसरे आथो दे नि देयो। 6 ओर जदुओ तक से मण्डल़िया सामणे न्याय खे खड़ा नि ओ ओर जदुओ तक तिना दिना रा बड़ा पुरोईत नि मरी जाओ, तदुए तक से तेस ई शईरो दे रओ, तिजी ते बाद से खूनी आपणे शईरो खे वापस ऊई की जेथा ते से नठी की आया ओ, आपणे कअरे फेर रयी सकोआ।

7 ओर तिने नप्तालिया रे पाह्ड़ी इलाके रे गलीलो रे केदेश शईरो खे ओर एप्रैमो रे पाह्ड़ी इलाके रे शकेम शईरो खे ओर यहूदा रे पाह्ड़ी इलाके रे किर्यतर्बा शईरो खे जेतेखे हेब्रोन बी बोलोए शरण लणे खे पवित्र ठराए। 8 ओर यरीहो रे नेड़े यरदन नदिया रे पूर्वो रिया तरफा खे तिने रूबेनो रे गोत्रो रे इस्से रे बेसेर शईरो खे, जो रेगिस्तान जगा दे चौरस जमीना दे बसी रा ओर गादो रे गोत्रो रे इस्से दे गिलादो रे रामोत शईरो खे ओर मनश्शे रे गोत्रो रे इस्से दे बाशान इलाके रा गोलान शईर ठराया। 9 सारे इस्राएली लोका खे ओर तिना बीचे रणे वाल़े परदेशिया खे बी, जो शरण शईर एते इच्छा ते ठराए सेयो यो ईए। जो कोई केसी माणूंए खे गल़तिया ते काओ, तो से तिना बीचा ते केसी शईरो दे नठी जाओ ओर जदुओ तक न्याय खे मण्डल़िया सामणे खड़ा नि ओ, तदुओ तक खूनो रा बदला लणे वाल़ा माणूं तेसखे काई नि सको।