यहोशू 24

शकेम शईरो दे यहोशूए रा दित्तेया रा वादा

1 कुछ बखतो ते बाद यहोशूए इस्राएलो रे सारे गोत्रा रे लोक शकेम शईरो दे कट्ठे कित्ते ओर इस्राएलो रे स्याणे लोक, खास मर्द, न्यायी ओर सरदार तेती बुलाए ओर सेयो परमेशरो रे सामणे आजीर ऊए। 2 तेबे यहोशूए तिना सबी लोका खे बोलेया, "इस्राएलो रा यहोवा परमेशर ईंयाँ बोलोआ, पुराणे बखतो दे अब्राहम ओर नाहोरो रा पिता तेरह बगैरा, तुसा रे बुजुर्ग फरात नदिया ते दूजे कनारे रंदे ऊए दूजे देवतेया री आराधना करो थे। 3 मैं तुसा रा मूल़ मर्द अब्राहम फरात नदिया ते पारा ते ल्याई की कनान देशो रे सबी जगा दे कूमाया ओर तेसरा कुल बढ़ाया। ओर मैं से जगा तेसरे पाऊ इसहाको खे दित्ती। 4 तेबे मैं इसहाको खे याकूब ओर एसाव नाओं रे दो पाऊ दित्ते। ओर एसावो खे मैं सेईर नाओं रा पाह्ड़ी इलाका दित्तेया, ताकि से तेथो रा अक्कदार ओ, पर याकूब माठे-पोतेया समेत मिस्र देशो दे रणे खे गया। 5 तेबे कुछ बखतो ते बाद मैं मूसा ओर हारूण तेती पेजी की तिना सबी मुसीबता रे जरीये जो मैं मिस्रो दे पेजिया, तेस देशो रे लोक नाश कित्ते ओर तिजी ते बाद तुसे तेथा ते बचाई की ल्याये। 6 ओर आऊँ तुसा रे बुजुर्गा खे मिस्रो ते निकयाल़ी की ल्याया ओर तुसे समुद्रो गे पऊँचे; तेबे मिस्रो री सेने रथ ओर सवार साथे लई की लाल समुद्रो तक तुसा रा पीछा कित्तेया। 7 ओर जेबे तुसे यहोवे री दुहाई दित्ती तेबे मैं तुसा ओर मिस्रिया बीचे न्हेरा करी ता। जेबे तुसे समुद्रो ते पार बची की निकल़ी गे तेबे मैं तिना पाँदे समुद्रो रा पाणी बाह्यी की सेयो डबोई ते ओर जो कुछ मैं मिस्र देशो दे कित्तेया से तुसे आपणिया आखी साथे देखेया; तेबे तुसे बऊत दिना तक सुनसाण जगा दे रये। 8 तेबे आऊँ तुसा लोका खे तिना एमोरिया रे देशो दे ली आया, जो यरदन नदिया रे पूर्वा दे बसी रे थे; तेबे सेयो तुसा साथे लड़े ओर मैं सेयो तुसा रे वशो रे करीते ओर तुसे तिना रे देशो रे अधिकारी ऊईगे ओर मैं सेयो तुसा सामणे ते नाश करीते।"

9 फेर मोआबो रा राजा सिप्पोरो रा पाऊ बालाक उठी की इस्राएली लोका ते युद्ध करने खे खड़ा ऊआ, ओर तिने तुसा खे स्राप देणे खे बोरो रा पाऊ बिलाम बुलाया। 10 पर मैं बिलामो खे तुसा खे स्राप देणे नि दित्तेया बल्कि तेसते आशीष ई आशीष दलाई; ईंयाँ मैं तुसे बालाक राजे ते बचाए।

11 तेबे तुसे यरदन पार पच्छमा दे यरीहो शईरो गे आए ओर जेबे यरीहो शईरो रे परदान लोक, ओर एमोरी, परिज्जी, कनानी, हित्ती, गिर्गाशी, हिब्बी ओर यबूसी लोक तुसा साथे लड़े, तेबे मैं सेयो तुसा रे वशो रे करीते। 12 जिंयाँ-जिंयाँ तुसे आगे बड़े मैं तिना एमोरिया रे दोनो राजेया खे बारे निकाल़ने रिया तँईं तिना बीचे रिऊँगल़ पेजी की सेयो डराए ओर सेयो तेथा ते नठीगे। ये तुसा रिया तलवार या धनुषो रा काम नि था बल्कि मैं सेयो अराए। 13 तेबे मैं तुसा खे एड़ा देश दित्तेया, जिदे तुसे राम नि कित्तेया था ओर एड़े शईर बी दित्ते, जिदे तुसे नि बसे थे ओर तुसे तिना दे बसी रे ओर जिना अंगूरा खे ओर जैतूनो रे बगीचे रे फल तुसे खाओए, सेयो तुसे नि लगाए थे।

14 इजी री खातर एबे यहोवे रा डर मानी की तेसरी सेवा खरायी ओर सच्चाईया साथे करो ओर जिना देवतेया री पूजा तुसा रे बुजुर्ग फरात नदिया ते पार पूर्वा दे ओर मिस्रो दे करो थे, तिना खे आपू ते पूरी तरआ ते दूर करी की सिर्फ यहोवे री सेवा करो। 15 ओर जे यहोवे री सेवा करनी तुसा खे बुरी लगो, तो आज चूणी लो कि केसरी सेवा करोगे, चाए तिना देवतेया री जिना री तुसा रे बुजुर्ग फरात नदिया रिया पच्छमा रिया जगा दे करो थे ओर चाए एमोरिया रे देवतेया री सेवा करो जिना रे देशो रे तुसे रओए, पर मां आपणे टब्बरो समेत सदा यहोवे री ई सेवा करनी। 16 तेबे इस्राएली लोके ज्वाब दित्तेया, "यहोवे खे छाडी की दूजे देवतेया री सेवा आसा कदी नि करनी; 17 कऊँकि म्हारे यहोवा परमेशरे ई आसे ओर मारे बुजुर्ग मिस्र देशो रिया गुलामिया ते निकयाल़ी की ल्याये ओर आसा सामणे बऊत चमत्कार कित्ते। जेबे आसे जिना-जिना जगा रिये ऊँदे ऊए गये तेती तिने म्हारी रक्षा कित्ती। 18 ओर आसा सामणे ते एते देशो दे रणे वाल़ी एमोरी ओर सब जातिया निकयाल़ी तिया, इजी री खातर आसा बी यहोवे री सेवा करनी, कऊँकि सेई म्हारा परमेशर ए।"

19 यहोशूए लोका खे बोलेया, "कि तुसा ते यहोवे री सेवा नि ऊई सकदी; कऊँकि से पवित्र परमेशर ए; तेस तुसा रे पाप ओर तेसरे खलाफ बिद्रोह कदी बी माफ नि करने। कऊँकि से जल़न करने वाल़ा परमेशर ए। से चाओआ कि तुसे सिर्फ तेसरी ई सेवा करो।*24:19 लेवी. 19:2 20 जे तुसे परमेशरो खे छाडी की पराये देवतेया री सेवा करने लगोगे, तो तेस तुसा ते आपणा मूँ फेरी लणा। चाए से तुसा रा पला करदा आई रा, तेबे बी तेस फिरी की तुसा रा नुकशाण करना ओर तुसा रा अन्त बी करी देणा।" 21 लोके यहोशूए खे बोलेया, "ना, आसा यहोवे री ई सेवा करनी।" 22 यहोशूए लोका खे बोलेया, "तुसे आपू ई आपणे गवाह् ए कि तुसे यहोवे री सेवा करनी मानी ली री।" तिने बोलेया, "आ, आसे गवाह् ए।" 23 यहोशूए बोलेया, "आपू बीचा ते पराये देवतेया रिया मूर्तिया खे दूर करो। तुसे पक्का करी लो कि तुसा इस्राएलो रे परमेशर यहोवे री वफादारिया ते सेवा करनी ए।" 24 लोके यहोशूए खे बोलेया, "आसा तो आपणे परमेशर यहोवे री ई सेवा करनी ओर तेसरी ई आज्ञा मानणी।" 25 तेबे यहोशूए तेस ई दिने तिना लोका ते वाचा बणवाई ओर शकेम शईरो दे तिना खे बिधि ओर नियम ठराए।

26 तेबे सारी गल्ला यहोशूए यहोवे रे बिधानो री कताबा दे लिखी तिया ओर एक बड़ा पात्थर चूणी की तेस बड़े डाल़ो ते थाले खड़ा करी ता, जो यहोवे री पवित्र जगा रे था। 27 तेबे यहोशूए सबी लोका खे बोलेया, "सुणो, ये पात्थर आसा लोका रा गवाह् रणा। जितणिया गल्ला यहोवे आसा खे बोली राखिया सेयो मानो इने सुणी राखिया, इजी री खातर ये तुसा रा गवाह् रणा, एड़ा नि ओ कि तुसे आपणे यहोवे रा बरोद करो।" 28 तेबे यहोशूए लोक आपणी-आपणी जगा खे जाणे खे बिदा कित्ते। तेबे सेयो आपणे-आपणे कअरो खे चली गे।

यहोशूए रा मरना ओर दबाणा

29 ये सब ऊणे ते कुछ बखतो ते बाद प्रभुए रा दास, नूनो रा पाऊ यहोशू, 110 साला रा ऊई की मरी गा। 30 तेसखे इस्राएली लोके तेसरे आपणे इस्से री जमीना दे तिम्नत्सेरह शईरो दे माट्टी दित्ती, जो एप्रैमो रे पाह्ड़ी इलाके रे गाश नाओं रे पाह्ड़ो दे उतरी कनारे पाँदे ए। 31 ओर यहोशूए री पूरी जिन्दगी ओर जो बुजुर्ग यहोशूए रे मरने ते बाद जिऊँदे रये ओर जाणो थे कि यहोवे इस्राएलो रिया तँईं केड़े-केड़े काम कित्ते थे, सेयो बी पूरी जिन्दगी इस्राएलो रे यहोवे री सेवा करदे रये। 32 तेबे यूसुफो रिया आड्डिया जिना खे इस्राएली लोक मिस्र देशो ते ल्याये थे, सेयो शकेम शईरो री तेसा जगा दे दबाईया, जो याकूबे शकेमो रे पिते हमोरो रे पितरा ते एक सौ चाँदिए रे सिक्के देई की मोले लया था; इजी री खातर से जमीन यूसुफो री ल्वादा रा निज इस्सा ऊई गी।✝24:32 उत्प. 50:25-26 33 जेबे हारूणो रा पाऊ एलीआजार बी मरी गा तेबे इस्राएली लोके से एप्रैमो रे पाह्ड़ी इलाके दे तेसा पाह्ड़िया पाँदे दबाया, जो पाह्ड़ी एलीआजारो रे पाऊ पीनहासो री थी।