1 तेबे लेवी गोत्रो रे बुजुर्गा रे कराने रे खास-खास मर्द कनान देशो रे शीलो शईरो दे आई की एलीआजार बड़ा पुरोईत ओर नूनो रे पाऊ यहोशू ओर इस्राएली गोत्रा रे कराने रे खास-खास मर्दा खे बोलणे लगे, 2 "परमेशरे मूसे रे जरिये आसा खे बसणे खे कनान देशो रे शीलो शईर ओर म्हारे डांगरा खे तिना ई शईरा रिया चराईया बी देणे री आज्ञा दित्ती थी।"* 3 तेबे इस्राएली लोके परमेशरो रे कईणे रे मुताबिक आपणे-आपणे इस्से बीचा ते लेविया खे रणे खे शईर ओर तिना रे डांगरा खे चराईया दित्तिया। 4 तेबे पईली चिट्ठी कहातिया रे कुलो रे नाओं पाँदे निकल़ी जो लेविया रे कराने रे हारूण बड़े पुरोईतो रे कुलो रा ए। तिना खे यहूदा, शिमोन ओर बिन्यामीनो रे गोत्रो रे इस्से बीचा ते कहातिया खे तेरा शईर मिले। 5 बाकी कहातिया रे कुलो खे एप्रैम ओर दान गोत्र ओर मनश्शे रे आदे गोत्रो रे इस्से बीचा ते चिट्ठी पाई-पाई की दस शईर दित्ते। 6 ओर लेवी गोत्रो रे गेर्शोनिया रे कुलो खे इस्साकार, आशेर ओर नप्तालिया रे गोत्रो रे इस्से बीचा ते ओर मनश्शे रे तेस आदे गोत्रो बीचा ते बी जो बाशानो दे था, चिट्ठी पाई-पाई की तेरा शईर दित्ते। 7 लेवी कुलो रे मुताबिक मरारिया खे रूबेन, गाद ओर जबूलूनो रे गोत्रो रे इस्से बीचा ते बारा शईर दित्ते।

8 जो आज्ञा यहोवे मूसे ते दलाई थी तिजी रे मुताबिक इस्राएली लोके लेविया खे रणे खे शईर ओर डांगरा खे चराईया समेत यो शईर चिट्ठी पाई-पाई की दित्ते। 9 लेविया खे इस्राएली लोके यहूदा ओर शिमोनो रे गोत्रो रे इस्से बीचा ते यो शईर दित्ते; 10 यो शईर लेवी गोत्रो रे कहाती कुलो बीचा ते हारूणो रे कुलो खे थे; कऊँकि पईली चिट्ठी तिना रेई नाओं पाँदे निकल़ी थी, ओर तिना शईरा रे नाओं ये ए; 11 मतलब इस्राएली लोके तिना खे यहूदा रे पाह्ड़ी इलाके रा किर्यतर्बा शईर दित्तेया ओर तेतेरे चऊँ कनारो री चराईया बी दित्तिया, जेते खे हेब्रोन बी बोलोए। जो अनाको रे बाओ अर्बा रे नाओं पाँदे ऊआ। 12 पर तेस शईरो रे डोरू ओर तेथो रे गाँवो तिने यपुन्ने रे पाऊ कालेबो खे तेसरी निज जमीन करी की देई ते। 13 तेबे तिने हारूण पुरोईतो रे कुलो खे हेब्रोन शईर तेतेरिया चराईया समेत दित्तेया ये एक एड़ा शईर था जिदे लोक गल़तिया दे ऊई दी अत्या ते बचणे खे शरण लणे री जगा बी ए। ओर लिब्ना शईर, 14 यत्तीर, एशतमो, 15 होलोन, दबीर, ऐन, 16 यूत्ता ओर बेतशेमेश शईर तिना रिया चराईया समेत तिना खे दित्ते; ईंयाँ तिना दुँईं गोत्रा मतलब यहूदा ओर शिमोनो रे इस्से बीचा ते लेविया खे नौ शईर दित्ते।

17 ओर बिन्यामीनो रे गोत्रो रे इस्से बीचा ते लेविया खे यो चार शईर तिना रिया चराईया समेत दित्ते, मतलब गिबोन, गेबा, 18 अनातोत ओर अल्मोन। 19 ईंयाँ हारूण वंशी पुरोईता खे तेरा शईर ओर तिना रिया चराईया मिलिया। 20 तेबे बाकी लेवी गोत्रो रे कहाती कुलो रे इस्से दे शईर ओर चराईया चिट्ठी पाई-पाई की एप्रैमो रे गोत्रो रे इस्से बीचा ते दित्ते। 21 मतलब इस्राएली लोके तिना खे एप्रैमो रे पाह्ड़ी इलाके दे शकेम शईर तेतेरिया चराईया समेत दित्तेया, ये एक एड़ा शईर था जिदे लोक गल़तिया दे ऊई दी अत्या ते बचणे खे शरण लणे री जगा बी ए। तेबे गेजेर शईर, 22 किबसैम ओर बेथोरोन; यो चार शईर तिना रिया चराईया समेत लेविया खे दित्ते।

23 ओर दानो रे गोत्रो रे इस्से बीचा ते एलतके, गिब्बतोन, 24 अय्यालोन ओर गत्रिम्मोन; यो चार शईर तिना रिया चराईया समेत लेवी गोत्रो रे कहाती कुलो खे दित्ते। 25 ओर मनश्शे रे आदे गोत्रो रे इस्से बीचा ते तानाक ओर गत्रिम्मोन; यो दो शईर तिना रिया चराईया समेत लेविया खे दित्ते। 26 ईंयाँ बाकी कहातिया रे कुलो रे सारे शईर चराईया समेत दस ठईरे।

27 तेबे लेविया रे गोत्रो बीचा ते गेर्शोनिया रे कुलो खे मनश्शे रे आदे गोत्रो रे इस्से बीचा ते बाशान इलाके रा गोलान ओर बेशतरा शईर तिना रिया चराईया समेत यो दो शईर दित्ते। गोलान ये एक एड़ा शईर था जिदे लोक गल़तिया दे ऊई दी अत्या ते बचणे खे शरण लणे री जगा बी ए। 28 ओर इस्साकारो रे गोत्रो रे इस्से बीचा ते किश्योन, दाबरत, 29 यर्मूत ओर एनगन्नीम; यो चार शईर तिना रिया चराईया समेत लेविया खे दित्ते। 30 ओर आशेरो रे गोत्रो रे इस्से बीचा ते मिशाल, अब्दोन, 31 हेल्कात ओर रहोब; यो चार शईर तिना रिया चराईया समेत लेवी गोत्रो रे गेर्शोनी कुलो खे दित्ते। 32 ओर नप्तालीए रे गोत्रो रे इस्से बीचा ते गलीलो रा केदेश, फेर हम्मोतदोर, ओर कर्तान; यो तीन शईर तिना रिया चराईया समेत गेर्शेनिया खे दित्ते। गलीलो रा केदेश शईर ये एक एड़ा शईर था जिदे लोक गल़तिया दे ऊई दी अत्या ते बचणे खे शरण लणे री जगा बी ए। 33 गेर्शोनिया रे कुलो रे मुताबिक तिना रे सारे शईर तिना रिया चराईया समेत तेरा ठईरे।

34 तेबे बाकी लेवी गोत्रो खे, मतलब मरारिया रे कुलो खे जबूलूनो रे गोत्रो रे इस्से बीचा ते योकनाम, कर्ता, 35 दिम्ना ओर नहलाल; यो चार शईर तिना रिया चराईया समेत दित्ते। 36 ओर रूबेन गोत्रो रे इस्से बीचा ते बेसेर, यहसा, 37 कदेमोत ओर मेपात; यो चार शईर तिना रिया चराईया समेत दित्ते। 38 ओर गाद गोत्रो रे इस्से बीचा ते गिलाद इलाके रा रामोत शईर जो ये एक एड़ा शईर था जिदे लोक गल़तिया दे ऊई दी अत्या ते बचणे खे शरण लणे री जगा बी ए, फेर महनैम, 39 हेशबोन ओर याजेर, जो सारे मलाई की चार शईर तिना रिया चराईया समेत तिना खे दित्ते। 40 लेवी गोत्रो रे मरारिया रे कुलो रे मुताबिक तिना रे सारे शईर यो ई ठईरे, ईंयाँ तिना खे बारा शईर चिट्ठी पाई-पाई की दित्ते। 41 इस्राएली लोका रे बाकी गोत्रा बीचे लेविया रे गोत्रो खे अठताल़ी शईर तिना रिया चराईया समेत ठईरे। 42 यो सारे शईर आपणे-आपणे चऊँ कनारलिया चराईया समेत ठईरे; इना सबी शईरा री ये ई दशा थी।

43 ईंयाँ यहोवे इस्राएली लोका खे से सारा देश दित्तेया, जो तिने तिना रे बुजुर्गा ते कसम खाई की देणे खे बोलेया था ओर सेयो तेस देशो रे मालक ऊई की तिदे बसी गे। 44 ओर यहोवे तिना खे से देश देई कि शान्ति दित्ती, जो तिने तिना रे बुजुर्गा ते कसम खाई की बोलेया था। तिना रे दुश्मणा बीचा ते कोई बी तिना खे अराई नि सके कऊँकि यहोवे सेयो सब तिना रे वशो दे करीते थे। 45 जितणी पलाईया रिया गल्ला यहोवे इस्राएलो रे कराने खे बोलिया थिया, सेयो सब गल्ला पुरिया ऊईया।