यहोशू 2

यरीहो शईर रा पेत लणा

1 तेबे नूनो रे पाऊ यहोशूए दो पेतिए चोरिए जे शित्तीम जगा ते जेती सेयो रूकी रे थे पेजी ते ओर तिना खे बोलेया, "जाई की कनान देशो खे ओर खास करी की यरीहो शईरो रे बारे दे पेत लओ।" तेबे सेयो पेतिए फटाफट चली गे ओर राहाब नाओं री एकी वेश्या रे कअरे जाईकी रूकी गे। 2 तेबे किने यरीहो रे राजे गे जाई की बोलेया, "राती रे बखते कुछ इस्राएली लोक म्हारे देशो रा पेत लणे खे एती आई रे।" 3 तेबे यरीहो रे राजे आपणे सिपाईया रे जरिये राहाबा गे ये सन्देसा पेजेया, "जो मर्द तेरे कअरे आई रे तिना खे बारे लई आओ, कऊँकि सेयो म्हारे देशो रा पेत लणे खे आई रे।" 4 तेसे जवाणसे दोनो मर्द लकोई ते ओर तिना सिपाईया खे ईंयाँ बोलेया, "मांगे कुछ मर्द आए तो थे, पर आऊँ नि जाणदी सेयो केथो रे थे 5 ओर जेबे न्हेरा ऊआ ओर शईरो रा द्वार बन्द ऊणे लगेया, तेबे सेयो निकल़ी गे, आऊँ नि जाणदी कि सेयो केथो खे गये, तुसे अगर फुर्ती करी की तिना रा पीछा करो तो तिना खे पकड़ी सकोए।" 6 पर तेसे सेयो दोनो पेतिये कअरो रे छतो पाँदे चढ़ाई की सणी रे लकड़ूआ निठे लकोई ते थे जो तेसे छतो पाँदे टेर लगाई की राखी रे थे। 7 राजे रे सिपाई तो यरदन नदिया रिया बाटा दे पेतिया खे टोल़ने खे काटो तक चली गे ओर जिंयाँ ई तिना पेतिया खे टोल़ने वाल़े शईरो रे द्वार ते निकल़े, तिंयाँ ई शईरो रा द्वार बन्द करी ता।

8 सेयो पेतिये एबु सयी नि रये थे कि से जवाणस छतो पाँदे तिना गे गल्ला करने खे गई, 9 ओर से बोलणे लगी, "माखे तो निश्चा ए कि यहोवा परमेशर तुसा लोका खे ये देश देणे वाल़ा ए ओर तुसा रा डर आसा लोका रे मनो दे बैठी गा राए ओर एस देशो रे रणे वाल़े तुसा रिया बजा ते कबराणे लगी रे। 10 कऊँकि आसे सुणी राखेया कि यहोवा परमेशरे तुसा रे मिस्रो ते निकल़ने रे बखते तुसा सामणे लाल समुद्रो रा पाणी सुकाईता ओर तुसे सिहोन ओर ओग नाओं रे यरदन नदिया ते पार पूर्बा रिया तरफा दे रणे वाल़े एमोरिया रे दोनो राजे सत्यानाश करीते। 11 ओर आसे लोके तिना कटणा रे बारे दे सुणी राखेया ओर बऊत जादा डरीगे ओर एबे आसा बीचा ते केसी बी माणूंए दे ईम्मत नि ए कि तुसा ते लड़ी सकिये। कऊँकि तुसा रा यहोवा परमेशर ऊबे सर्गो रा ओर थाले तरतिया रा परमेशर ए। 12 एबे मैं जो तुसा पाँदे दया करी राखी, इजी री खातर मां साथे परमेशरो री कसम खाओ कि तुसा बी मेरे ओर मेरे परिवारो साथे दया करनी ओर इजी री सच्ची नशाणी माखे देयो*2:12 इब्रा. 11:31 13 कि तुसे मेरे माये-बाओ, पाई ओर बईणा खे ओर जो तिना साथे ए, तिना सबी खे बी जिऊँदा राखोगे ओर आसा सबी खे मरने ते बचाओगे।" 14 तेबे तिने पेतिये तेसा खे बोलेया, "जे तूँ म्हारी ये गल्ल केसी गे नि बताए, तो आसे तेरे ओर तेरे परिवारो खे बचाणे रिया तँईं आपणी जान देणे खे बी त्यार ए ओर जेबे परमेशर आसा खे ये अराबा देश देओगा, तेबे आसा तां पाँदे दया ओर सच्चाईया रा बर्ताओ करना।" 15 तेबे राहाब जेसा रा कअर शईरो री दवाला साथे बणी रा था ओर से तेथी रओ थी, तेसे सेयो द्वारिया ते रस्सिया रे सारे थाले उतारी की शईरो ते बारे निकयाल़ी ते।*2:15 याकू. 2:25 16 तेसे तिना पेतिया खे जाणे ते पईले बोलेया, "पाह्ड़ो पाँदे चली जाओ, एड़ा नि ओ कि टोल़ने वाल़ेया खे तुसे मिली जाओ, इजी री खातर जदुओ तक तुसा खे टोल़ने वाल़े सिपाई वापस नि आई जाओ तदुओ तक, मतलब तीऊँ दिना तक तेथी लूके दे रणा, तिजी ते बाद आपणिया बाटा रिये जाणा।" 17 तिने पेतिये जाणे ते पईले तेसा खे बोलेया, "जो कसम तैं आसा खे खुल़ाई राखी से आसा जरूर पूरी करनी, 18 पर तैं एड़ा करना कि जेबे आसे एते देशो दे आऊणे, तेबे जेसा द्वारिया ते तैं आसे थाले उतारी राखे, तिदे ये ई लाल रंगो री रस्सी बानी की राखणी ओर आपणे माये-बाओ, पाई-बईणा, ओर आपणे रिश्तेदार एस ई कअरो दे कट्ठा करी की राखणे। 19 तेबे जो कोई तेरे कअरो रे द्वारो ते बारे निकल़ो, ओर से मरी जाओ तो आसे तेतेरिया मौती रे जिम्मेबार नि ऊणे, जे तां साथे कअरे रंदे ऊए केसी बी माणूंए री अत्या ओ, तो एतेरे जिम्मेदार आसे ई ऊणे। 20 फेर जे तूँ म्हारी ये गल्ल केसी गे बताएगी, तो जो कसम तैं आसा खे खुल़ाई राखी तिजी ते आसे आजाद ऊई जाणे।" 21 राहाबे बोलेया, "जेड़ा तुसे बोलेया मां तेड़ा ई करना" तेबे तेसे सेयो तेथा ते बिदा कित्ते ओर सेयो चली गे ओर तेसे लाल रंगो री रस्सी द्वारिया दे बानी ती। 22 ओर सेयो पेतिए तेसा रे कअरो ते जाई की पाह्ड़ो पाँदे पऊँचे ओर तेती टोल़ने वाल़ेया सिपाईया रे वापस आऊणे तक, मतलब तीऊँ दिना तक तेथी रये। तिना खे टोल़ने वाल़े सारी बाटा दे टोल़दे रये पर सेयो केथी नि मिले। 23 तेबे सेयो पेतिए पाह्ड़ो पाँदा ते उतरे ओर यरदन नदिया ते पार जाई की नूनो रे पाऊ यहोशूए गे आए ओर जो कुछ तिना पाँदे बितेया था से सब कुछ बताया। 24 ओर तिने यहोशूए खे बोलेया, "बिना कोई शक परमेशरे से सारा देश आसा खे देईता रा ए, इजी ते अलावा तेथो रे सारे रणे वाल़े म्हारी बजा ते कबराणे लगी रे।"