यहोशू 19

शिमोनो रे कुला खे जमीना रा इस्सा

1 दूजी चिट्ठी शिमोनो रे नाओं पाँदे, मतलब शिमोनिया रे कुलो रे मुताबिक तिना रे गोत्रो रे नाओं पाँदे निकल़ी ओर तिना रा इस्सा यहूदिया रे इस्से बीचे ठईरेया। 2 तिना रे इस्से दे यो शईर आए, मतलब बेर्शेबा शेबा, मोलादा, 3 हसर्शूआल, बाला, एसेम, 4 एलतोलद, बतूल, होर्मा, 5 सिकलग, बेत्मर्काबोत, इसर्शूसा, 6 बेतलबाओत ओर शारूहेन; यो तेरा शईर ओर इना रे सारे गाँवो तिना खे मिले। 7 तेबे ऐन, रिम्मोन, ऐतेर ओर आशान यो चार शईर गाँवो समेत 8 ओर बालत्बेर जेतेखे दक्खण देशो रा रामाह बी बोलोए, तेथो तक इना शईरा रे चऊँ कनारले सारे गाँवो बी तिना खे मिले। शिमोनो रे गोत्रो रा इस्सा तिना रे कुलो रे मुताबिक ये ई ठईरेया। 9 शिमोनिया रा इस्सा तो यहूदिया रे इस्से ते दित्तेया, कऊँकि यहूदिया रा इस्सा तिना खे बऊत जादा था, इजी बजा ते शिमोनिया रा इस्सा तिना रेई इस्से बीचे ठईरेया।

जबूलून गोत्रो खे जमीना रा इस्सा मिलणा

10 तीजी चिट्ठी जबूलूनिया रे कुलो रे मुताबिक तिना रे नाओं पाँदे निकल़ी ओर तिना रे इस्से रा बन्ना सारीद शईरो तक पऊँचेया। 11 तिना रा बन्ना पच्छमा रिया तरफा खे मरला शईरो खे चढ़ी की दब्बेशेत शईरो खे पऊँचेया ओर योकनाम शईरो रे सामणे रे नाल़े तक पऊँची गा; 12 तेबे सारीदो ते से पूर्बा रिया तरफा खे मुड़ी की किसलोत्ताबोर शईरो रे बन्ने तक पऊँचेया ओर तेथा ते बढ़दे-बढ़दे दाबरत शईरो रिये ऊँदे ऊए यापी शईरो रिया तरफा दे था। 13 तेथा ते से पूर्वो रिये ऊँदे ऊए गथेपेर शईर ओर इत्कासीन नगरो खे गया ओर तेस रिम्मोन शईरो दे निकल़ेया जो नेआह शईरो तक फैलेया राए; 14 तेथा ते से बन्ना तेथो रे उत्तरो रिया तरफा खे मुड़ी की हन्रातोन शईरो पाँदे पऊँचेया ओर यिप्तहेलो री काअटिया दे जाई की निकल़ेया। 15 एते बन्ने रे पीतरे यो थे: कत्तात, नहलाल, शिम्रोन, यिदला ओर बेतलेहम; यो बारा शईर तिना रे गाँवो समेत तिना रे इस्से दे ठईरेया। 16 जबूलूनिया रा इस्सा तिना रे कुलो रे मुताबिक ये ई ठईरेया ओर तिदे आपणे-आपणे गाँवो समेत यो ई शईर ए।

इस्साकार गोत्रो रे लोका खे जमीन मिलणा

17 चौथी चिट्ठी इस्साकारिया रे कुलो रे मुताबिक तिना रे नाओं पाँदे निकल़ी। 18 तिना रा बन्ना यिज्रेल शईरो ते ऊँदे ऊए, कसुल्लोत, शूनेम, 19 हपारैम, शीओन, अनाहरत, 20 रब्बीत, किश्योन, एबेस, 21 रेमेत, एनगन्नीम, एनहद्दा ओर बेत्पस्सेस शईरो तक पऊँचेया। 22 तेबे से बन्ना ताबोर शहसूमा ओर बेतशेमेश शईरो रिये ऊँदे ऊए यरदन नदिया पाँदे जाई की निकल़ेया; ईंयाँ तिना खे सोल़ा शईर आपणे-आपणे गाँवो समेत मिले। 23 इस्साकारो रे गोत्रो रा जमीना रा इस्सा तिना रे कुला रे मुताबिक शईर ओर गाँवो समेत ये ई मिलेया।

आशेरो रे गोत्रो खे जगा-जमीन मिलणा

24 पाँजी चिट्ठी आशेरिया रे गोत्रो रे कुलो रे मुताबिक तिना रे नाओं पाँदे निकल़ी। 25 तिना रा बन्ना हेल्कात शईरो रिये ऊँदे ऊए, हली, बेतेन, अक्षाप, 26 अलाम्मेल्लेक, अमाद ओर मिशाल शईरो तक आया ओर से पच्छमा रिया तरफा खे कर्मेल पाह्ड़ो तक ओर शाहोर्लिब्नात नाल़े तक था। 27 तेबे से बन्ना पूर्वो रिया तरफा खे मुड़ी की बेतदागोन शईरो खे गया ओर जबूलूनो खे मिले दे इस्से तक ओर यिप्तहेलो री तराईया रे उत्तरो रिया तरफा खे जाई की बेतेमेक ओर नीएल शईरो तक गया ओर उतरो रिया तरफा खे जाई की काबूल शईरो पाँदे निकल़ेया, 28 ओर से बन्ना एब्रोन शईरो रिये ऊँदे ऊए, रहोब, हम्मोन ओर काना ते ऊई की बड़े सिदोन शईरो तक पऊँचेया; 29 तेथा ते से बन्ना मुड़ी की रामाह शईरो ते ऊँदे ऊए सोर नाओं रे गढ़वाल़े शईरो तक चली गा; तेबे बन्ना होसा रिया तरफा खे मुड़ी की ओर अकजीबो रे नेड़ो रे प्रदेशो गे ऊई की समुद्रो पाँदे निकल़ेया। 30 उम्मा, अपेक ओर रहोब शईर बी तिना रे इस्से दे आए; ईंयाँ बाई शईर आपणे-आपणे गाँवो समेत तिना खे मिले। 31 आशेरो रे गोत्रो रे कुला खे इस्सा तिना रे मुताबिक यो शईर तिना रे गाँवां समेत ये ई मिले।

नप्ताली गोत्रो रे लोका खे जमीन मिलणा

32 छठी चिट्ठी नप्ताली गोत्रो रे कुला रे मुताबिक तिना रे नाओं पाँदे निकल़ी। 33 तिना रा बन्ना हेलेपो ते ओर सानन्नीमो रे बड़े डाल़ो ते, अदामीनेकेब ओर यब्नेलो ते ऊई की ओर लक्कूम शईरो रिये जाई की यरदन नदिया पाँदे निकल़ेया। 34 तेथा ते से बन्ना पच्छमा रिया तरफा खे मुड़ी की अजनोत्ताबोर शईरो तक गया ओर तेथा ते हुक्कोक शईरो खे गया ओर दक्खणा दे जबूलूनो रे बन्ने तक ओर पच्छमा रिया तरफा खे आशेरो रे बन्ने तक ओर पूर्वो रिया तरफा खे यहूदा गोत्रो रे बन्ने साथली यरदन नदिया पाँदे पऊँचेया। 35 ओर तिना रे गढ़वाल़े शईर यो ए, मतलब सिद्दीम, सेर, हम्मत, रक्कत, किन्नेरेत, 36 अदामा, रामाह, हासोर, 37 केदेश, एद्रेई, एन्हासेर, 38 यिरोन, मिगदलेल, होरेम, बेतनात ओर बेतशेमेश; यो उन्नी शईर तिना रे गाँवां समेत तिना खे मिले। 39 नप्ताली गोत्रो रे कुला रे मुताबिक जमीना रा इस्सा शईर ओर तिना रे गाँवां समेत ये ई मिलेया।

दान गोत्रो रे लोका खे जगा-जमीन मिलणा

40 साती चिट्ठी कुलो रे मुताबिक दानो रे गोत्रो रे नाओं पाँदे निकल़ी। 41 ओर तिना रे इस्सा रा बन्ना सोरा शईरो ते ऊँदे ऊए, एशताओल, ईरशमेश, 42 शालब्बीन, अय्यालोन, यितला, 43 एलोन, तिम्नाह, एक्रोन, 44 एलतके, गिब्बतोन, बालात, 45 यहूद, बनेबराक, गत्रिम्मोन, 46 मेयर्कोन ओर रक्कोन शईरो तक था ओर याफा रे इलाके रे सामणे रा इस्सा बी तिना रे बन्ने दे था। 47 सेयो सब शईर ओर तिना रे नेड़े-तेड़े रे गाँवां समेत दानो रे गोत्रो खे बांडी ते थे। पर दानी लोक तेसा जमीना रे इस्से खे आपणे कब्जे दे नि लई सके। इजी खे दानी लोके लेशेम शईरो पाँदे अमला करी की तेस साथे लड़े ओर तेथो रे लोका खे कायी की से शईर आपणे कब्जे दे करी की तिदे बसी गे ओर आपणे मूल़ मर्दो रे नाओं पाँदे लेशेमो रा नाओं दान राखेया। 48 दान गोत्रो रे कुला रे मुताबिक तिना रा इस्सा शईर ओर गाँवां समेत ये ई ठईरेया।

यहोशूए खे जमीना रा इस्सा मिलणा

49 जेबे कनान देशो रा बाँडणे ते बाद तिजी दे बन्ने लगाणे रा काम निपटी गा, तेबे इस्राएलिये नूनो रे पाऊ यहोशूए खे बी आपू बीचे एक इस्सा देईता। 50 यहोवे रे कईणे रे मुताबिक तिने यहोशूए खे तेसरा मांगेया रा शईर दित्तेया, ये एप्रैमो रे पाह्ड़ी इलाके रा तिम्नत्सेरह शईर ए ओर से तेस शईरो दे रणे लगेया। 51 जो-जो इस्सा एलीआजार पुरोईत ओर नूनो रा पाऊ यहोशू ओर इस्राएली लोका रे गोत्रो रे करानेया रे खास-खास मर्दे शीलो शईरो दे, मिलणे वाल़े तम्बूए रे द्वारो पाँदे, यहोवे रिया मर्जिया ते चिट्ठी पाई-पाई की जो-जो इस्से बांडे, सेयो यो ईए। ईंयाँ तिने देश बांडणे रा काम निपटाई ता।