यहोशू 11

यहोशूए रा कनानो रे उत्तरा रे शईरा खे कब्जे दे लणा

1 इस्राएली लोका रिया जीता रा सन्देश सुणी की हासोर शईरो रे राजे याबीने*11:1 याबीने से बुद्धिमान था मादोन शईरो रे राजा योबाब ओर शिम्रोन ओर अक्षाप शईरो रे राजेया खे सन्देस पेजेया, 2 ओर जो-जो राजा उत्तरो रिया तरफा खे पाह्ड़ी इलाके रे ओर किन्नेरेतो रे दखणो रे अराबा दे, ओर मैदानी इलाके रे ओर पच्छमा रिया तरफा खे दोरो रे ऊच्चे इलाके दे रओ थे, तिना खे 3 ओर पूर्ब पश्चिम दोनो तरफा खे रणे वाल़े कनानी ओर एमोरी, हित्ती, परिज्जी, पाह्ड़ी यबूसी जातिया रे लोक ओर मिस्पा इलाके रे हेर्मोन पाह्ड़ो ते थाले रणे वाल़े हिब्बी जातिया रे लोक बी बुलाए। 4 ओर सेयो सारे राजा आपणी-आपणी सेना समेत, जिना री गिणती समुद्रो रे कनारे बालूए रिया कणियां जेड़ी बऊत थी, मिली की आए ओर तिना साथे बऊत सारे कोड़े ओर रथ बी थे। 5 तेबे यो सब राजा सला करी की कट्ठे ऊए ओर इस्राएली सेना साथे लड़ने खे मेरोम नाओं रे तालो गे डेरे लगाए। 6 तेबे यहोवे यहोशूए खे बोलेया, "तिना ते नि डर, कऊँकि काल एस ई बखते मां सेयो सारे इस्राएली सेना रे वशो दे करी की मरवाई देणे, तेबे तैं तिना रे कोड़े लंगड़े करी देणे ओर तिना रे रथ फूकी देणे।" 7 तेबे यहोशूए सबी योद्धा समेत मेरोम नाओं रे तालो गे पऊँची की अचाणक तिना पाँदे अमला कित्तेया, 8 ओर यहोवे सेयो इस्राएली लोका रे वशो रे करीते, इजी री खातर तिने सेयो बड़े शईर सिदोन ओर मिस्रपोतमैम ओर पूर्वो रिया तरफा खे मिस्पा रे मैदानो तक तिना रा पीछा कित्तेया ओर सेयो सब काईते। 9 तेबे यहोशूए सेई कित्तेया जो यहोवे तेसखे बोलेया था, मतलब तिना रे कोड़े लंगड़े करीते ओर तिना रे रथ आगी रे फूकी ते।

10 तेस ई बखते यहोशूए कूमी की हासोर शईरो खे जो पईले तिना सबी राजेया रा खास शईर था, तीजी पाँदे कब्जा करी ला ओर तेथो रा राजा तलवारी साथे काईता। 11 ओर जितणे प्राणी तिदे थे सेयो सारे तिने तलवारी साथे काई की नाश करीते ओर कोई प्राणी जिऊँदा नि छाडेया ओर हासोर शईरो खे यहोशूए आग लगवाई की फूकवाई ता।*11:11 10:32 12 ओर तिना सबी शईरा खे तिना रे सबी राजेया समेत यहोशूए लई ला ओर परमेशरो रे दास मूसे री आज्ञा रे मुताबिक सेयो तलवारी की काई की नाश करीते। 13 पर हासोर शईरो खे छाडी की, जो यहोशूए फूकाई ता था, इस्राएली सैनिके ओर कोई शईर जो पाह्ड़ा पाँदे बसी रा था, फूकेया नि। 14 ओर इना शईरा रे डांगर ओर लूट इस्राएलिये आपणियां तँईं राखी ली, पर तिने तेथो रे सारे माणूं तलवारे की काईते, तिने कोई बी माणूं जिऊँदा नि छाडेया। 15 जो आज्ञा यहोवे आपणे दास मूसे खे दित्ती थी, तिजी रेई मुताबिक मूसे यहोशूए खे आज्ञा दित्ती थी ओर ठीक तेड़ा ई यहोशूए कित्तेया बी; जो-जो आज्ञा यहोवे मूसे खे दित्ती थी यहोशूए सेयो सब पुरिया कित्तिया।

यहोशूए रा सारे कनान देशो रे शईरा खे जितणा

16 ईंयाँ यहोशूए से सारा देश, मतलब पाह्ड़ी इलाका ओर सारा दक्खणा रा इलाका, ओर सारा गोशेन, मैदानी इलाके, अराबा, इस्राएलो रे पाह्ड़ी इलाके, तेथो रे मैदानी इलाके, आपणे कब्जे दे लई ले। 17 हालाक नाओं रे पाह्ड़ो ते लई की, जो सेईर जगा री चढ़ाईया पाँदे ए, बालगाद शईरो तक, जो लबानोनो रे मैदानो रे हेर्मोन पाह्ड़ो ते थाले जितणे इलाके ए, सेयो सारे जीती ले ओर तिना इलाकेया रे सारे राजे पकड़ी की काईते। 18 तिना सबी राजेया साथे युद्ध करदे-करदे यहोशूए खे बऊत बखत लगी गा। 19 गिबोन शईरो दे रणे वाल़े हिब्बिया जातिया रे लोका खे छाडी की ओर केसी शईरो रे लोके इस्राएली लोका साथे मेल नि कित्तेया ओर सारे शईर तिने लड़ाई करी की जीती ले। 20 कऊँकि यहोवे री जो इच्छा थी कि आपणी तेसा आज्ञा रे मुताबिक जो तिने मूसे खे दित्ती थी, तिना पाँदे कोई दया नि करो, बल्कि सत्यानाश करी देयो, इजी बजा ते यहोवे तिना राजेया रे मन इतणे काठे करीते कि तिने इस्राएली लोका रा सामणा करी की तिना साथे युद्ध कित्तेया।

21 तेस बखते यहोशूए पाह्ड़ी देशो दे आई की हेब्रोन, दबीर, अनाब शईरो रे लोक, बल्कि यहूदा ओर इस्राएल दुँईं रे सारे पाह्ड़ी प्रदेशो दे रणे वाल़े अनाकी जातिया रे लोक काईते, ओर सेयो शईरो समेत नाश करीते। 22 सारे इस्राएलो दे कोई अनाक जातिया रा माणूं जिऊँदा नि रया, बस गाजा, गत ओर अशदोद शईरो दे कोई-कोई जिऊँदे रयी गे। 23 जेड़ा यहोवे मूसे खे बोलेया था, तेड़ा ई यहोशूए से सारा देश जीती ला ओर से इस्राएलो रे गोत्रा रे मुताबिक तिना खे बांडी की देईता। तेबे इस्राएली लोका खे लड़ाईया ते शान्ति मिली।