1 जेबे यरदन नदिया रे पच्छमा रिया तरफा खे रणे वाल़े एमोरिया रे सबी राजेया ओर समुद्रो रे नेड़े रणे वाल़े कनानिया रे सबी राजेया ये सुणेया कि परमेशरे इस्राएली लोका रे पार ऊणे तक तिना रे सामणे ते यरदन नदिया रा पाणी टाई की सुकाई राखेया, तेबे इस्राएली लोका रे डरो रे मारे तिना रा मन कबराईगा ओर तिना रे लड़ने री ईमम्त नि रई।

2 तेस बखते परमेशरे यहोशूए खे बोलेया, "चकमक पात्थरो रिया छुरिया बणाई की दूजी पीढ़िया रे इस्राएली लोका रा खतना कराई दे जिना रा पईले नि ऊई रा ओ।" 3 तेबे यहोशूए चकमक पात्थरो रिया छुरिया बणाई की खलड़िया नाओं रे टीले* पाँदे इस्राएली मर्दा रा खतना कराया। 4 ओर यहोशूए जो खतना कराया, इजी री बजा ये, कि जितणे युद्ध करने जोगे मर्द मिस्रो ते निकल़े थे सेयो सारे मिस्रो ते निकल़दे ऊए जंगल़ो रिया बाटा दे मरी गे थे। 5 जो मर्द मिस्रो ते निकल़े थे तिना सबी रा खतना ऊई चुकेया था, पर जितणे तिना रे मिस्रो ते निकल़ने ते बाद जंगल़ो रे बाटा रे पैदा ऊए, तिना बीचा ते केसी रा बी खतना नि ऊई रा था। 6 कऊँकि इस्राएली तो चाल़िया साला तक जंगल़ो दे फिरदे रये, जदुओ तक इस्राएली जातिया रे लोक, मतलब जितणे युद्ध करने जोगे लोक मिस्रो ते निकल़े थे, सेयो पूरे नाश ऊई चुके थे, कऊँकि तिने परमेशरो री नि मानी थी। तेबे परमेशरे कसम खाई की तिना खे बोलेया था कि जो देश मैं तुसा रे बुजुर्गा ते कसम खाई की तुसा खे देणे खे बोलेया था ओर जिदे सयीत ओर दूदो रिया तारा बह्ओईया, से देश मां तुसा खे नि दखाणा। 7 तेबे इस्राएली लोका रे पाऊ जो परमेशरे तिना रिया जगा दे पैदा कित्ते थे, तिना रा खतना यहोशूए ते करवाया, कऊँकि बाटा रे तिना रा खतना ना ऊणे रिया बजा ते सेयो बिना खतने रे थे। 8 ओर जेबे सारे इस्राएली लोका रा खतना ऊई चुकेया, तेबे सेयो ठीक ऊणे तक आपणी-आपणी जगा दे डेरे दे रये। 9 तेबे यहोवे यहोशूए खे बोलेया, "आज मैं मिस्र देशो दे तुसा रे गुलाम ऊणे री बेज्जती तां पाँदा ते दूर करिती। इजी बजा ते तेसा जगा रा नाओं आजो तक गिलगाल पड़ी रा।" 10 तेबे इस्राएली लोक गिलगालो दे डेरे लगाई की रये ओर तिने यरीहो शईरो रे नेड़े मैदानो दे पूर्णमासिया दे साँजके बखते फसह मनाया। 11 ओर फसह रे दूजे दिने सेयो तेस देशो री उपजा बीचा ते बिना सजेड़े री रोटी ओर तेस ई दिने पूजेया रा जौ रा दाणा बी खाणे लगे। 12 ओर जेस दिने सेयो तेस देशो री उपजा बीचा ते खाणे लगे, तेस बखतो ते से खाणा जो स्वर्गो ते आओ था बन्द ऊई गा ओर इस्राएली लोका खे बादो ते कदी मन्ना नि मिलेया, पर तेस साल तिने कनान देशो री उपजा बीचा ते खाया।

13 एक दिन जेबे यहोशू यरीहो शईरो गे था, तेबे तिने देखेया कि आथो दे नांगी तलवार लई की एक मर्द सामणे खड़ी रा ओर यहोशूए तेसगे जाई की पूछेया, "क्या तूँ आसा रिया तरफा राए या म्हारे बैरिया रिया तरफा राए?" 14 तिने ज्वाब दित्तेया, "ना, आऊँ परमेशरो री सेना रा परदान ऊई की यबु आई रा।" तेबे यहोशूए जमीना दे मुंए रे पारे रूड़ी की तेसगे माथा टेकेया ओर तेसखे बोलेया, "आपणे दासो खे मेरे प्रभु परमेशरो री क्या आज्ञा ए?" 15 परमेशरो री सेना रे परदाने यहोशूए खे बोलेया, "आपणा जोड़ा पैरो ते खोल, कऊँकि जेते जगा रे तूँ खड़ी रा से पवित्र ए।" तेबे यहोशूए तेड़ा ई कित्तेया।