यहोशू 17

1 तेबे यूसुफो रे जेठे पाऊ मनश्शे रे लोका रा इस्सा चिट्ठी पाणे ते ये ऊआ। मनश्शे रा जेठा पाऊ माकीर था तेसरे पाऊए ना नाओं गिलाद था, माकीरो रे कुलो रे लोक बड़े योद्धा थे, जेतेरिया बजा ते यरदन नदिया रे पूर्बा दे तेसरे कुलो खे गिलाद ओर बाशानो री जगा दित्ती। 2 ओर बाकि बचे रे मनश्शे रे आदे लोका खे पच्छमा रिया तरफा खे इस्सा तिना रे कुलो रे मुताबिक दित्तेया, मतलब अबीएजेर, हेलेक, अस्रीएल, शकेम, हेपेर ओर शमीदा; जो आपणे-आपणे कुलो रे मुताबिक यूसुफो रे पाऊ मनश्शे रे कुलो रे खास मर्दा रे थे, तिना रे लग-लग कुलो खे दित्तेया। 3 पर सलोफाद जो हेपेरो रा पाऊ था जेसरे कोई बी पाऊ नि ऊआ, सिर्फ बेटिया ई ऊईया। ये सलोफाद हेपेरो रा पाऊ था जेसरे बाओ रा नाओं गिलाद था, ये गिलाद माकीरो रा पाऊ था, ओर माकीर मनश्शे रा पाऊ था, पर सलोफादो जो बेटिया ऊईया तिना रे नाओं, महला, नोवा, होग्ला, मिल्का ओर तिर्सा ए। 4 तेबे सेयो बेटिया एलीआजार पुरोईत, नूनो रा पाऊ यहोशू ओर परदाना गे जाई की बोलणे लगिया, "परमेशरे मूसे खे आज्ञा दित्ती थी कि से आसा खे म्हारे पाईया बीचे इस्सा देयो। तेबे तिने परमेशरो री आज्ञा रे मुताबिक तिना बेटिया खे तिना रे चाचेया बीचे इस्सा दित्तेया।" 5 तेबे मनश्शे गोत्रो रे लोका खे पूर्बा दे गिलाद ओर बाशान प्रदेशो ते अलावा यरदन नदिया ते पार पच्छमा दे दस ओर इस्से मिले; 6 एड़ा इजी खे ऊआ कऊँकि मनश्शे रे गोत्रो दे पाईया बीचे सलोफादो रिया बेटिया खे तिना रे पाईया बीचे इस्सा मिलेया। ओर बाकि ओरी मनश्शे गोत्रो रे लोका खे गिलाद प्रदेश मिलेया।

7 ओर मनश्शे रा बन्ना आशेरो रे बन्ने ते लई की मिकमतातो तक पऊँचेया, जो शकेम शईरो सामणे ए; तेबे से दखणो रिया तरफा खे बढ़ी की एनतप्पूह रे रणे वाल़ेया तक पऊँचेया। 8 तप्पूह री सारी जमीन तो मनश्शे रे लोका खे मिली, पर तप्पूह शईर जो मनश्शे रे बन्ने पाँदे बसी रा, से एप्रैमिया खे मिलेया। 9 तेबे तेथा ते से बन्ना दक्खणा रिया तरफा खे कानाह शईरो रे नाल़े तक था। यो शईर तेबे बी मनश्शे रे शईरो बीचे थे, पर सेयो एप्रैमो रे ठईरे ओर मनश्शे रा बन्ना तेस नाल़े रे उत्तरो रिया तरफा खे जाई की महासमुद्रो तँईं खे था। 10 दक्खणो रिया तरफा रे देशो रा इस्सा तो एप्रैमो खे ओर उत्तरो रिया तरफा रा इस्सा मनश्शे खे मिलेया ओर तिजी रा बन्ना महासमुद्र ठईरेया ओर मनश्शे रा बन्ना उत्तरो रिया तरफा खे आशेर गोत्रो साथे ओर पूर्वो रिया तरफा खे इस्साकार गोत्रो साथे मिलेया। 11 ओर मनश्शे खे, इस्साकार ओर आशेरो रे शईर बेतशान, ओर यिबलाम तिना रे गाँवां समेत देईते, ओर दोर, एनदोर, तानाक ओर मगिद्दो शईर बी तिना रे गाँवां समेत ओर तिना दे रणे वाल़ेया समेत तिना खे देईते, ये तीनो जो ऊच्ची जगा दे बसी रे, देईते। 12 पर मनश्शे रे गोत्र तिना शईरो रे रणे वाल़ेया खे तेथा ते नि निकयाल़ी सके, इजी री खातर सेयो कनानी लोक तिना शईरा दे बसे दे रये। 13 तेबे बी जेबे इस्राएली सामर्थी ऊईगे, तेबे कनानिया ते मजदूरी तो कराणे लगे, पर तिना खे पूरी तरअ ते बारे नि निकयाल़ी सके।

14 यूसुफो री ल्वाद यहोशूए खे बोलणे लगी, "आसे तो गिणतिया दे बऊत ए, कऊँकि परमेशर यबुओ तक आसा खे आशीष देंदा आई रा, तेबे तैं म्हारे इस्से खे चिट्ठी पाई की एक ई इस्सा कऊँ दित्तेया?" 15 यहोशूए तिना खे बोलेया, "जे तुसे गिणतिया रे बऊत ए ओर एप्रैमो रा पाह्ड़ी इलाका तुसा खे छोटा ए, तो परिज्जी ओर रपाई जातिया रा इलाका, जो बणो दे ए तिदे जाई की डाल़ा खे बाडी लो ताकि से तुसा रे रणे खे ऊई जाओ।" 16 यूसुफो री ल्वादे बोलेया, "से पाह्ड़ी इलाका आसा खे छोटा ए ओर बेतशान ओर तेतेरे शईरो दे रणे वाल़े, यिज्रेलो रिया तराईया दे रणे वाल़े, जितणे कनानी थालले इलाके दे रओए, तिना सबी गे लोए रे रथ ए।" 17 तेबे यहोशूए, यूसुफो रे पाऊ एप्रैम और मनश्शे रे सारे गोत्रा रे लोका खे बोलेया, "आ, तुसे लोक तो गिणतिया रे बऊत ए ओर तुसा री सामर्थ बी बऊत ए, इजी री खातर तुसा खे बस एक ई इस्सा नि मिलणा, 18 पाह्ड़ी इलाका बी तुसा रा ई ऊई जाणा; कऊँकि से बण तो आए, पर तेथो रे डाल़ बाडी की तेती आपणे रणे खे जगा बणाई देयो, तेबे तेथो रे नेड़े-तेड़े रा इलाका बी तुसा रा ऊई जाणा; कऊँकि चाए कनानी सामर्थी ओ ओर तिना गे लोए रे रथ बी ओ, तेबे बी तुसा सेयो तेथा ते निकयाल़ी देणे।"