1 इस्राएलो रे सब लोक शीलो नाओं री जगा दे कट्ठे ऊए ओर तेती तिने मिलणे वाल़ा तम्बू खड़ा कित्तेया; इस्राएलो रे लोक तेस कनान देशो पाँदे राज करो थे। कऊँकि तिने तेस देशो रे सारे दुश्मण अराईते थे। 2 ओर इस्राएली लोका बीचा ते साता गोत्रा रे लोक आपणा-आपणा इस्सा बिना मिले रई गे थे। 3 तेबे यहोशूए इस्राएली लोका खे बोलेया, "जो देश तुसा रे बुजुर्गा रे यहोवा परमेशरे तुसा खे देई राखेया, तेस आपणे कब्जे दे करने खे तुसे आगे कऊँ नि बढ़दे? 4 एबे हर एक गोत्रो पीछे तीन माणूं ठराई लो ओर मां सेयो इजी खे पेजणे ताकि सेयो चली की देशो खे कूमी-फिरी की देखो ओर आपणे-आपणे गोत्रो रे इस्से रे मतलबो रे मुताबिक तेथो रा आल लिखी की मांगे आट्टी की आओ। 5 ओर सेयो बाकी बचे रे देशो रे सात इस्से करी लो, यहूदी गोत्रो रे लोक तो दक्खणा रिया तरफा खे आपणे इस्से दे, ओर यूसुफो रे कराने रे लोक उत्तरो रिया तरफा खे आपणे इस्से दे रओ। 6 ओर तुसे देशो रे सात इस्से लिखी की मांगे ली आओ ओर मां एती तुसा रिया तँईं आपणे परमेशर यहोवे सामणे चिट्ठी पाई की जमीन देणी। 7 पर लेवी गोत्रो रा तुसा बीचे जमीना रा कोई इस्सा नि मिलणा, कऊँकि सेयो पुरोईत ए, ओर तिना रा काम ई यहोवे री सेवा करना ए। गाद, रूबेन ओर मनश्शे रे आदे गोत्रो रे लोक यरदन नदिया रे पूर्वो रिया तरफा खे यहोवे रे दास मूसे रा दित्तेया रा आपणा-आपणा इस्सा पाई चूकी रे।"

8 तेबे सेयो चूणे दे माणूं उठी की तेस देशो रा आल लिखणे खे चलणे लगे तेबे तिना खे यहोशूए ये आज्ञा दित्ती, "जाई की देशो खे देखो ओर तेथो रा आल लिखी की मांगे आट्टी की आओ ओर मां एती शीलो शईरो दे यहोवे सामणे तुसा रिया तँईं चिट्ठी पाई की जमीन देणी।" 9 तेबे सेयो मर्द चली गे ओर तेस बचे दे देशो दे कूमे ओर तेथो रे शईरा रे सात इस्से करी की तिना रा आल कताबा दे लिखी की शीलो रे डेरे दे यहोशूए गे आए। 10 तेबे यहोशूए शीलो दे यहोवे रे सामणे तिना रिया तँईं पर्चिया पाईया ओर तेथी यहोशूए इस्राएली लोका खे तिना रे इस्से रे मुताबिक देश बांडी ता।

11 सबी ते पईले बिन्यामीनिया रे गोत्रो री चिट्ठी तिना रे कुलो रे मुताबिक निकल़ी ओर तिना रा इस्सा यहूदा ओर यूसुफो रे कराने रे इस्से बीचे मिलेया। 12 तेबे तिना रा उत्तरी बन्ना यरदन नदिया ते शुरू ऊआ ओर उत्तर कनारे ते चढ़दे ऊए पच्छमा रिया तरफा खे पाह्ड़ी इलाके रिये ऊई की बेतावेनो रे उजाड़ जगा दे था। 13 तेथा ते से बन्ना लूज शईरो तक पऊँचेया जेतेखे बेतेल बी बोलोए, ओर लूजो रे दक्खणा रे कनारे ते ऊई की थाले बेथोरोनो री दक्खणो रिया तरफा रे पाह्ड़ो रे ऊई की अत्रोतदारो तँईं खे था। 14 तेबे पच्छमा रा बन्ना मुड़ी की बेथोरोनो रे सामणे ओर तेसरी दक्खणा रिया तरफा खे पाह्ड़ो ते ऊँदे ऊए किर्यतबाल नाओं रे यहूदिया रे एक शईरो पाँदे निकल़ेया (जेतेखे किर्यत्यारीम बी बोलोए), पच्छमा रा बन्ना ये ई ठईरेया। 15 तेबे दक्खणा रे कनारे रा बन्ना पच्छमा ते शुरू ऊई की किर्यत्यारीमो रे सिरे ते निकल़ी की नेप्तोह जगा री सूबल़ा पाँदे पऊँचेया, 16 ओर आगे से बन्ना तेस पाह्ड़ो रे सिरे पाँदे उतरेया, जो हिन्नोमो रे पाऊए रिया तराईया सामणे ओर रपाईम नाओं री तराईया रे उत्तरो रिया तरफा खे ए; तेथा ते से हिन्नोमो रिया तराईया दे, मतलब यबूसो रे दक्खणा रे कनारे ऊई की एनरोगेलो खे उतरेया; 17 तेथा ते से बन्ना उत्तरो रिया तरफा खे मुड़ी की एनशेमेशो खे निकल़ी की तेस गलीगोतो रिया तरफा खे गया, जो अदुम्मीमो री चढ़ाईया रे सामणे ए, तेबे तेथा ते से रूबेनो रे पाऊ बोहनो रे पात्थरो तक उतरेया। 18 तेथा ते से उत्तरो रिया तरफा खे जाई की अराबा रे सामणे रे पाह्ड़ो रे कनारे ऊई की अराबा खे उतरेया; 19 तेथा ते से बन्ना बेथोग्ला रे उत्तरो कनारे जाई की खारे तालो रे उत्तरो रिया तरफा खे खारे समुद्रो दे यरदन नदिया रे मुरे पाँदे निकल़ेया, दक्खणा रा बन्ना ये ई ठईरेया। 20 ओर पूर्वो रिया तरफा रा बन्ना यरदन नदी ई ठईरेया। बिन्यामीनिया रा इस्सा तिना रे कुलो रे मुताबिक चारो तरफा रे बन्ने इतना ई ठईरेया।

21 बिन्यामीनिया रे गोत्रा खे तिना रे कुलो रे मुताबिक यो शईर मिले, मतलब यरीहो, बेथोग्ला, एमेक्कसीस, 22 बेतराबा, समारैम, बेतेल 23 अव्वीम, पारा, ओप्रा, 24 कपरम्मोनी, ओफनी ओर गेबा, यो बारा शईर ओर इना रे गाँवो मिले। 25 तेबे गिबोन, रामाह, बेरोत, 26 मिस्पे, कपीरा, मोसा, 27 रेकेम, यिर्पेल, तरला, 28 सेला एलेप, यबूस जेतेखे यरूशलेम बी बोलोए, गिबा ओर किर्यत; यो चौदा शईर ओर इना रे गाँवो तिना खे मिले। बिन्यामीनिया रा इस्सा तिना रे कुलो रे मुताबिक ये ई ठईरेया।