1 तेबे यरीहो शईरो रे सारे द्वार इस्राएली लोका रे डरो रे मारे लगातार बन्द रये ओर कोई बी बारे-पीतरे नि जाई सको था। 2 फेर यहोवे यहोशूए खे बोलेया, "सुण, आऊँ यरीहो शईरो खे तेथो रे राजा ओर तेसरी सेना समेत तेरे वशो दे करी देऊँआ। 3 तो तुसा बीचे जितणे योद्धा ए, शईरो खे केरी लो ओर तेस शईरो रे चऊँ कनारे एक बार कूमी आओ। छे दिन तक एड़ा ई करना। 4 तेबे सात पुरोईत सन्दूको ते आगे-आगे खाड्डुआ रे सींगा रे सात रड़सिंगे लई की चलो, फेर सातुए दिने तुसे शईरो रे चऊँ कनारे सात बार कूमणा ओर पुरोईत बी रड़सिंगे बजांदे ऊए चलो। 5 जेबे सेयो रड़सिंगे देरा तक बजांदे रओ, तेबे सब लोक रड़सिंगे री आवाज सुणी की जोरे की जयजयकार करो, तेबे तेसी बखते शईरो री दवाल निऊँआ ते टल़ी जाणी ओर सारे लोक आपणे-आपणे सामणे ऊबे चढ़ी जाओ।" 6 तेबे नूनो रे पाऊ यहोशूए पुरोईता खे बुलाई की बोलेया, "वादे रा सन्दूक चकी लो ओर सात पुरोईत सन्दूको ते आगे-आगे खाड्डुआ रे सींगा रे सात रड़सिंगे लई की चलो।" 7 तेबे तिने लोका खे बोलेया, "आगे जाई की शईरो रे चऊँ कनारे कूमी की आओ ओर जिना गे अथियार ए सेयो सैनिक यहोवे रे सन्दूको ते आगे-आगे चलो।"

8 ओर जेबे यहोशू लोका खे इना गल्ला बोली चुकेया, तेबे सेयो सात पुरोईत जो यहोवे रे सन्दूको ते आगे सात रड़सिंगे बजांदे ऊए चले ओर पुरोईत यहोवे रे वादे रा सन्दूक चकी की तिना पीछे-पीछे चले। 9 ओर कुछ अथियारा वाल़े सैनिक रड़सिंगे बजाणे वाल़े पुरोईता ते आगे-आगे चले ओर कुछ सैनिक सन्दूको पीछे-पीछे चले, पुरोईत रड़सिंगे बजांदे ऊए चले। 10 तेबे यहोशूए लोका खे आज्ञा दित्ती, "जदुओ तक आऊँ तुसा खे जयजयकार करने री आज्ञा नि देऊँ, तदुओ तक जयजयकार नि करनी ओर ना ई तुसा री कोई आवाज सुणने रे आओ, ना कोई गल्ल तुसा रे मुंए ते निकल़ो, आज्ञा मिलदे ई जयजयकार करनी।" 11 यहोशूए रे कईणे रे मुताबिक तिने यहोवे रा सन्दूक एक बार शईरो रे चऊँ कनारे कूमाया, तेबे सेयो डेरे रे आए ओर रात तेथी बिताई।

12 दूजे दिने प्यागा यहोशू तड़के उठेया ओर पुरोईते यहोवे रा सन्दूक चकी ला। 13 ओर तिने साते पुरोईते खाड्डुआ रे सींगा रे सात रड़सिंगे लये ओर परमेशरो रे सन्दूको ते आगे-आगे बजांदे ऊए चले ओर अथियारा वाल़े सैनिक रड़सिंगे बजाणे वाल़े पुरोईता ते आगे-आगे चले ओर पीछे वाल़े सैनिक सन्दूको पीछे-पीछे चले, पुरोईत रड़सिंगे बजांदे ऊए चले। 14 ईंयाँ सेयो दूजे दिने बी एक बार शईरो रे चऊँ कनारे कूमी की डेरे रे वापस आए ओर तिने एड़ा छे दिन तक लगातार कित्तेया।

15 तेबे सातुए दिने सेयो प्यागा तड़के उठी की तिंयाँ ई शईरो रे सात बार कूमी की आए, बस तेस ई दिने सेयो सात बार कूमे। 16 तेबे जेबे साती बार पुरोईत रड़सिंगे बजाणे लगे, तेबे यहोशूए लोका खे बोलेया, "जयजयकार करो; कऊँकि यहोवा ये शईर तुसा खे देणे वाल़ा ए। 17 शईर ओर जो कुछ तिदे ए, तेस सबी खे नाश करी देयो कऊँकि ये सब यहोवे खे अर्पण कित्ती रिया चीजा ए, बस राहाब वेश्या ओर जितणे तेसा रे कअरे ओ, सेयो जिऊँदे छाडणे, कऊँकि तेसे म्हारे पेजे रे पेतिया री मताद कित्ती थी तेसे सेयो पेतिये आपणे कअरे लकोई राखे थे।* 18 ओर तुसे नाश करने वाल़िया चीजा ते दूर रओ, लाल़च करी की तिना बीचा ते कुछ नि लणा। एड़ा नि ओ कि अर्पण कित्ती रिया चीजा बीचा ते ई कुछ लई लो ओर ईंयाँ तुसे सबी इस्राएली लोका खे बी मुसीबता रे पाई की प्रष्ट करी देयो। 19 सारा सूईना, चाँदी ओर जो चीजा पीतल़ ओर लोए रिया ए, सेयो सब यहोवे रिया तँईं पवित्र ए ओर सेयो सब यहोवे रे ई पण्डारो दे राखे जाओ।" 20 जेबे लोके रड़सिंगे री आवाज सुणी, तेबे तिने जोरे की जयजयकार कित्ती, तेबे यरीहो शईरो री दवाल निऊँआ ते टल़ीगी ओर इस्राएली लोक आपणे-आपणे सामणे तेते शईरो दे कूसी गे ओर शईर आपणे कब्जे दे लई ला।* 21 ओर क्या मर्द, क्या जवाणसा, क्या जवान, क्या स्याणे, बल्कि बल़द, पेडा-बाकरिया, गह्दे ओर जितणे लोक शईरो दे थे, सेयो सारे तलवारी साथे नाश करीते।

22 तेबे यहोशूए पईले ते ई तिना पेतिया ते जो तेस देशो रा पेत लणे खे गये थे बोलेया, "आपणी कसमा रे मुताबिक तेसा वेश्या रे कअरे जाई की तेसा खे ओर जो तेसा रे कअरे ए तिना सबी खे बारे निकयाल़ी की लई आओ।" 23 तेबे सेयो पेतिए पीतरे जाई की राहाब ओर तेसा रे माये-बाओ, पाई ओर तेसा रे सारे टब्बरो खे बारे निकयाल़ी की लई आए ओर इस्राएली लोका रे डेरे ते बारे बठयाल़ी ते। 24 तेबे तिने शईर ओर जो कुछ तिदे था, सब आग लगाई की फूकी ता, बस चाँदी, सूईना ओर जो चीजा पीतल़ी ओर लोए रिया थिया, सेयो तिने परमेशरो रे पण्डारो दे राखी ते। 25 ओर यहोशूए राहाब वेश्या ओर तेसा रे सारे परिवारो खे, बल्कि तेसा रे सारे लोक जिऊँदे छाडी ते ओर आजो तक तिना रा कुल इस्राएली लोका बीचे रओआ, कऊँकि जो पेतिये यहोशूए यरीहो रा पेत लणे खे पेजे थे तेसे सेयो लकोए थे।

26 तेबे तेस ई बखते यहोशूए इस्राएली लोका सामणे कसम खाई की बोलेया, "जो माणूं एस शईर यरीहो खे फेर बणाओ से यहोवे रिया तरफा ते स्रापित ओ। जेबे तेस तिजी री निऊँ पाणी, तो तेसरा जेठा पाऊ मरी जाणा ओर जेबे तेस तिजी रे बड़े द्वार लगवाणे तेबे तेसरा छोटा पाऊ मरी जाणा।" 27 ओर यहोवा यहोशूए साथे रया ओर यहोशूए रा बोल-बाला तेस सारे देशो रे फैलीगा।