1 बाकि इस्राएली लोका खे पच्छमा दे देश बांडणे ते बाद यहोशूए रूबेनी, गादी गोत्रा खे ओर मनश्शे रे आदे गोत्रो रे लोक आपू गे बुलाए। 2 तिने बोलेया, "जो-जो आज्ञा यहोवे रे दास मूसे तुसा खे दित्तिया थिया सेयो सब तुसे मानी राखिया ओर जो-जो आज्ञा मैं तुसा खे देई राखिया, सेयो सब बी तुसे मानिया। 3 तुसे बऊत दिना ते आजके दिनो तक आपणे पाई कल्ले नि छाडे, पर आपणे परमेशर यहोवे री आज्ञा तुसे चौकसिया साथे मानी। 4 एबे तुसा रे यहोवा परमेशरे बाकि इस्राएली लोका खे आपणे वचनो रे मुताबिक शान्ति देई राखी; इजी री खातर तुसे आपणे-आपणे डेरे खे ओर आपणी-आपणी जमीना दे, जो परमेशरो रे दास मूसे यरदन नदिया ते पार पूर्वा दे तुसा खे देई राखी, चली जाओ। 5 बस एते गल्ला री पूरी चौकसी करना कि जो-जो आज्ञा ओर बिधान परमेशरो रे दास मूसे तुसा खे देई राखे तिना खे मानी की आपणे परमेशर यहोवे ते प्यार राखो, तेसरी बाटा दे चलो, तेसरी आज्ञा मानो, तेसरी भक्तिया रे लगे दे रओ ओर आपणे सारे मन ओर सारे प्राणो ते तेसरी सेवा करो।" 6 तेबे यहोशूए तिना खे आशीर्वाद देई की सेयो बिदा कित्ते ओर सेयो आपणे-आपणे कअरो खे चली गे।

7 मनश्शे रे आदे गोत्रो खे मूसे पूर्वा दे बाशानो दे इस्सा दित्तेया था; पर दूजे आदे गोत्रो खे यहोशूए इस्राएली लोका रे गोत्रा बीचे यरदन नदिया रे पच्छमी कनारे खे इस्सा दित्तेया। जेबे सेयो यहोशूए बिदा कित्ते कि आपणे-आपणे डेरे खे जाओ, 8 तेबे तिना खे बी आशीर्वाद देई कि बोलेया, "बऊत सारे डांगर, चाँदी, सूईना, पीतल़, लोआ, बऊत सारे टाल्ले ओर बऊत धन-सम्पत्ति लई की आपणे-आपणे डेरे खे वापस ऊई जाओ ओर आपणे दुश्मणा री लूटा री सम्पत्ति आपणे पाईया साथे बांडी लो।" 9 तेबे रूबेनी, गादी ओर मनश्शे रे आदे गोत्री बाकि इस्राएली लोका गे ते आपणे कअरो खे वापस आईगे, मतलब कनान देशो रे शीलो शईरो ते, आपणी गिलाद नाओं री जमीना दे, जो मूसे तिना खे दलाई थी, प्रभुए री आज्ञा रे मुताबिक तिना री आपणी जमीन ऊई गी थी।

10 ओर जेबे रूबेनी, गादी ओर मनश्शे रे आदे गोत्रो रे लोक पच्छमा दे यरदन नदिया री तेसा तराईया गे पऊँचे, जो कनान देशो रे ए, तेबे तिने तेती एक बड़ी बेदी बणाई। 11 ओर तेबे ये सन्देश बाकि इस्राएली लोका खे सुणने दे आया कि रूबेनी, गादी ओर मनश्शे रे आदे गोत्रो रे लोके कनान देशो सामणे यरदन नदिया री तराईया दे, मतलब तिना ते तेस पार जो पच्छमा दे इस्राएली लोका राए, एक बेदी बणाई राखी। 12 जेबे तिने इस्राएलिये ये सुणेया, तेबे तिना री सारी मण्डल़ी तिना पूर्बो रे लोका साथे लड़ने खे शीलो दे कट्ठी ऊई। 13 तेबे इस्राएलिये एलीआजार पुरोईतो रे पाऊ पीनहासो खे रूबेनी, गादी ओर मनश्शे रे आदे गोत्रो रे लोका गे गिलाद प्रदेशो दे पेजेया। 14 तेस साथे दस परदान, मतलब बाकि इस्राएलो रे एक-एक गोत्रो बीचा ते बुजुर्गा रे कराने रा एक-एक परदान पेजेया जो आपणे-आपणे कुलो रा खास मर्द था। 15 सेयो बाकि इस्राएली परदान गिलाद प्रदेशो दे रूबेनी, गादी ओर मनश्शे रे आदे गोत्रो गे गये ओर बोलेया, 16 "यहोवे री सारी मण्डल़िया रिया तरफा ते आसे ये बोलणा चाऊँए कि तुसे इस्राएलो रे परमेशर यहोवे साथे एड़ा विश्वासघात कऊँ करी राखेया; ओर यहोवे पीछे चलणा कऊँ छाडीता? आज तुसे ये बेदी बणाई की तेसरे खलाफ कऊँ बलवा कित्तेया?* 17 सुणो, पोर शईरो दे आसा रा पाप क्या कम था, तेबे बी परमेशरो री मण्डल़िया खे पारी दण्ड मिलेया ओर आसे एबुए तक तेते पापो ते शुद्ध नि ऊइरे तो क्या से तुसा री नजरा दे एक छोटी गल्ल ए* 18 कि आज तुसे यहोवे खे छाडी की तेस पीछे चलणा छाडी देओए? जे तुसे आज यहोवे रे खलाफ जाओगे तो काल से इस्राएलो री सारी मण्डल़िया ते बऊत रोषे ऊणा। 19 पर जे तुसा री पूर्बा दे जमीन यहोवे रिया आराधना खे अशुद्ध ए, तो पच्छमा दे आसा रिया तरफा खे आई की यहोवे री निज जमीना दे, जेती यहोवे रा वास रओआ, आसा लोका बीचे आपणी-आपणी निज जमीन लई लो; पर म्हारे परमेशर यहोवे री बेदिया खे छाडी की कोई बेदी बणाई की ना तो यहोवे ते बगावत करो ओर ना आसा साथे। 20 देखो, जो जेरह रे पाऊ आकाने अर्पण कित्ती रिया चीजा रे बारे दे विश्वासघात कित्तेया, तेबे क्या परमेशरो रा कोप इस्राएलो री सारी मण्डल़िया पाँदे नि पड़केया? ओर तेस मर्दो रे पापो रा दण्ड कल्ले तेसखे ई नि मिलेया।"

21 तेबे रूबेनी, गादी ओर मनश्शे रे आदे गोत्रो रे लोके इस्राएली लोका रे कुलो रे खास मर्दा खे ये ज्वाब दित्तेया, 22 "यहोवा जो सर्वशक्तिमान परमेशर ए, से सर्वशक्तिमान परमेशर यहोवा ये जाणोआ ओर तुसा इस्राएली लोका बी ये जाणी लणा कि जे यहोवे ते फिरी की या तेस साथे विश्वासघात करी की आसे ये काम करी राखेया ओ, तो तूँ आज आसा खे काईदे, 23 जे आजके दिने आसे बेदी इजी खे बणाई राखी ओ कि यहोवे पीछे चलणा छाडी देईए या इजी खे कि आसे तिजी पाँदे होमबलि, मेलबलि या नज्जो री बलि चढ़ाईये, तो यहोवा आपू इजी रा बदला आसा ते लओ। 24 पर आसे ये सोची की ओर एड़ी इच्छा ते ये करी राखेया कि कालो खे तुसा री ल्वाद म्हारी ल्वादा ते ये नि बोलणे लगो कि तुसा खे इस्राएलो रे परमेशर यहोवे ते कोई लेणा-देणा नि ए, 25 तुसा री ल्वाद ये नि बोलो कि ओ रूबेनियो, ओ गादियो, यहोवे जो तुसा ओर आसा बीचे यरदन नदी बन्ना ठराईती री, इजी री खातर यहोवे साथे तुसा रा कोई बी लेणा-देणा नि ए। ईंयाँ तुसा री ल्वादा म्हारी ल्वादा ते परमेशरो रा डर दूर करी देणा। 26 येई बजा ए कि आसे बलि देणे खे एक बेदी बणाई ली, से होमबलि या मेलबलिया खे नि, 27 पर इजी खे कि म्हारे ओर तुसा रे ओर आसा ते बाद म्हारे ओर तुसा रे कुलो बीचे गवाईया रा काम देयो, ताकि आसे होमबलि, मेलबलि ओर बलिदान चढ़ाई की यहोवे सामणे तेसरी आराधना करुँ ओर कालो खे तुसा री ल्वाद म्हारी ल्वादा खे ये नि बोली सको कि यहोवे री सेवा दे तुसा रा कोई बी लेणा-देणा नि ए। 28 इजी री खातर आसे बोलेया कि जेबे सेयो लोक कालो खे आसा ते या म्हारे कुलो खे ईंयाँ बोलणे लगो, तेबे आसा तिना खे बोलणा कि प्रभुए री बेदिया रे नमूने पाँदे बणी री एसा बलिया रिया बेदिया खे देखो, जो म्हारे बुजुर्गे होमबलि या मेलबलिया खे नि बणाई, पर इजी खे बणाई थी कि आसा ओर तुसा बीचे गवाईया रा काम देयो। 29 एड़ा कदी ना ओ कि आसे यहोवे रे बिधानो खे मानणा छाडी की तेसरे खलाफ जाईए ओर आपणे परमेशर यहोवे री तेसा बेदिया खे छाडी की जो तेसरे तम्बूए रे सामणे ए होमबलि ओर मेलबलि ओर नज्जो री बलिया खे दूजी बेदी बणाईए।" 30 रूबेनी, गादी ओर मनश्शे रे आदे गोत्रो रे लोका री इना गल्ला खे सुणी की पीनहास पुरोईत ओर तेस साथले मण्डल़िया रे परदान, जो इस्राएली लोका रे कुलो रे खास मर्द थे, सेयो बऊत खुश ऊए। 31 ओर एलीआजार पुरोईतो रे पाऊ पीनहासे रूबेनिया, गादिया ओर मनश्शे रे आदे गोत्रो रे लोका ते बोलेया, "तुसे यहोवे खे तोखा नि देई राखेया, इजी ते आज आसे ये जाणी ला कि यहोवा आसा साथे ए ओर तुसे लोके इस्राएली लोक यहोवे रे रोषो ते बचाई राखे।" 32 तेबे एलीआजार पुरोईतो रा पाऊ पीनहास परदाना समेत रूबेनिया ओर गादिया रे नेड़े ते गिलाद प्रदेशो ते कनान देशो दे इस्राएली लोका गे वापस ऊईगे ओर यो सारी गल्ला तिना गे सुणाईयां। 33 तेबे इस्राएली लोक खुश ऊए ओर परमेशरो खे तन्य बोलेया ओर रूबेनी ओर गादिया साथे लड़ने ओर तिना रे रणे री जगा उजाड़ने खे अमला करने री गल्ल फेर नि कित्ती। 34 रूबेनी ओर गादिये ये बोली की कि ये बेदी आसा ओर तिना बीचे एते गल्ला री गवा ठईरी री, कि यहोवा ई परमेशर ए; तेसा बेदिया रा नाओं एद राखेया।