1 इजी ते बऊत बखतो बाद, जेबे प्रभुए इस्राएली लोका खे तिना रे चारो कनारले दुश्मणा ते शान्ति दित्ती ओर यहोशू स्याणा ओर बऊत उम्रा रा ऊई चुकेया, 2 तेबे यहोशू सबी इस्राएली लोका खे, मतलब बुजुर्ग, खास मर्द, न्यायी ओर परदाना खे बुलाई की बोलणे लगेया, "आऊँ तो एबे स्याणा ओर बऊत उम्रा रा ऊई गा रा; 3 ओर तुसे देखी राखेया कि यहोवा परमेशरे तुसा रिया तँईं इना सबी जातिया साथे क्या-क्या कित्तेया, कऊँकि जो तुसा रिया तरफा ते लड़दा आई रा, से तुसा रा यहोवा परमेशर ए।" 4 देखो, मैं यरदन नदिया ते लई कि पच्छमा दे महासमुद्रो तक तिना जातिया री जमीन पर्चिया पाई की तुसा रे गोत्रा बीचे बांडी ती री। मैं तिना जातिया री जमीन जो मैं जीती ली ए तुसा खे बांडी ती दी, ओर जो जमीन एबुए तक नि जीती राखी ए, से बी मैं तुसा बीचे बांडी ती दी ए। 5 तुसे जिंयाँ-जिंयाँ आगे बढ़दे जाणे तुसा रे परमेशर यहोवे सेयो तुसा रे सामणे ते निकल़ने खे मजबूर करने। ईंयाँ तुसे आपणे परमेशर यहोवे रे वादे रे मुताबिक तिना रे देशो रे अधिकारी ऊई जाणे। 6 इजी री खातर तुसे ईम्मत राखो, जो कुछ मूसे रे बिधानो रिया कताबा दे लिखी राखेया, तिजी रे ई मुताबिक काम करेया करो, तिजी खे मानणे खे कोई कमी नि करनी। 7 ये जो जातिया तुसा बीचे रयी गी रिया इना साथे कोई बी मेल-जोल नि करना ओर ना ई इना रे देवतेया री सेवा करनी, ना तिना ते प्रार्थना करनी, ओर ना तिना रे नाओं री कसम खाणी, 8 पर जिंयाँ तुसे आजके दिनो तक आपणे परमेशर यहोवे साथे वफादार बणे दे रए, तिंयाँ ई आगे बी बणे दे रणा। 9 जिंयाँ-जिंयाँ तुसे आगे बढ़दे गये। यहोवे सेयो बडिया ओर तागतबर जातिया नठणे खे मजबूर कित्तिया। कोई बी जातिया तुसा रे खलाफ खड़िया नि ऊई सकदिया। 10 तुसा बीचा ते एकी माणूंए दुश्मणा रे ह्जार माणूं नठाणे, कऊँकि तुसा रा यहोवा परमेशर आपणे वचनो रे मुताबिक तुसा रिया तरफा ते लड़ोआ। 11 इजी री खातर तुसे आपणे परमेशर यहोवे ते प्यार राखणे दे पूरी चौकसी करनी। 12 कऊँकि जे तुसे किंयाँ बी यहोवे ते फिरी की इना ओरी जातिया रे बाकी लोका साथे मिलणे लगो जो तुसा बीचे बची दिया ए ओर इना साथे ब्या-शादी करी की इना साथे रिस्ता जोड़ो, 13 तो पक्का जाणी लो कि तुसा रे परमेशर यहोवे यो जातिया तुसा रे सामणे ते बारे निकाल़ने दे तुसा री मताद नि करनी। पर यो तुसा खे जाल़ ओर खड्डे जेड़िया खतरनाक ओर तुसा रिया पीठी खे कोड़े या तुसा रिया आखी दे कांडेया जेड़िया दुख देणे वाल़िया ऊणिया। ये सब तदुए तक चलदा रणा जदुए तक तुसे एसा अच्छिया जमीना ते जो तुसा रे यहोवा परमेशरे तुसा खे देई राखी तुसा बीचा ते सब नाश नि ऊई जाओ।

14 "सुणो, मेरे मरने रा बखत तो नेड़े आईगा रा ए, पर तुसे सब आपणे-आपणे मनो दे जाणोए, कि यहोवा परमेशरे तुसा लोका ते जो-जो वादे कित्ते से सब पूरे करी राखे। तिना बीचा ते एक बी वादा बिना पूरा ऊए नि रया। 15 तो जिंयाँ तुसा रे परमेशर यहोवे रे कित्ते रे वादे तुसा रे जीवनो दे पूरे ऊए, तिंयाँ ई तेस सब मुसीबता तुसा पाँदे पुरिया करनिया, तुसे एसा अच्‍छी जमीना पाँदा ते, जो तिने तुसा खे देई राखी, सत्यानाश करी देणे। 16 जे तुसे तेसा वाचा खे, जो तुसा रे यहोवा परमेशरे तुसा खे आज्ञा देई की बानी थी, तोड़ी की पराये देवतेया री आराधना करने ओर माथा टेकणे लगो, तेबे यहोवे रा कोप तुसा पाँदे पड़कणा ओर तुसे एस अच्छे देशो ते जो तिने तुसा खे देई राखेया, चट ई नाश ऊई जाणे।"