1 यहूदिया रे गोत्रो रा इस्सा तिना रे कुलो रे मुताबिक चिट्ठी पाणे ते एदोमो रे बन्ने तक ओर दक्खणो रिया तरफा खे सीन नाओं रे रेगिस्तानो तक जो दक्खणी बन्ने तक ए। 2 तिना रे इस्से रा दक्खणी बन्ना खारे तालो रे तेस सिरे वाल़े बन्ने ते शुरू ऊआ जो दखणो रिया तरफा खे बढ़ी रा। 3 ओर से अक्रब्बीम नाओं री चढ़ाईया री दक्खणो रिया तरफा ते निकल़ी की सीन ऊँदे ऊए कादेशबर्ने रे दक्खणो रिया तरफा खे चढ़ीगा, तेबे हेस्रोन शईरो गे अद्दार शईरो रिये चढ़ी की कर्का शईरो रिया तरफा खे मुड़ी गा। 4 तेथा ते अस्मोन शईरो रिये ऊँदे ऊए से मिस्रो रे नाल़े दे निकल़ेया ओर तेस बन्ने रा अन्त समुद्र ऊआ। तिना रा दक्खणी बन्ना ये ई ऊणा।

5 तेबे पूर्वी बन्ना यरदन नदिया रे कनारे खारा समुद्र ई ठईरेया ओर उत्तर दिशा रा बन्ना यरदन नदिया रे कनारे ते खारे समुद्रो ते शुरू करी की, 6 बेथोग्ला शईरो खे चढ़दे ऊए बेतराबा रे उत्तरो रिया तरफा खे ऊई की रूबेनो रे पाऊ बोहन नाओं रे पात्थरो तक चढ़ीगा। 7 ओर से ई बन्ना आकोर नाओं री तराईया ते दबीरो रिया तरफा खे चढ़ीगा ओर उत्तर दिशा रिये ऊँदे ऊए गिलगालो रिया तरफा खे चुकेया, जो नाल़े री दक्खणा रिया तरफा री अदुम्मीमो री चढ़ाईया सामणे ए, तेथा ते से एनशेमेश नाओं री सूबल़ा गे पऊँची की एनरोगेलो पाँदे निकल़ेया। 8 तेबे से ई बन्ना हिन्नोमो रे पाऊए री तराईया ते ऊई की यबूस* तेथो रे दक्खणी कनारे ते बढ़दे ऊए तेस पाह्ड़ो रिया चूँडिया पाँदे पऊँचेया जेते खे यरूशलेम बोलोए, जो पच्छमा रिया तरफा खे हिन्नोमो रिया तराईया रे सामणे ओर रपाईमो री तराईया रे उत्तरो वाल़े सिरे पाँदे ए। 9 तेबे से ई बन्ना तेस पाह्ड़ो रिया चूँडिया ते नेप्तोह नाओं री सूबल़ा गे लगेया, ओर एप्रोन पाह्ड़ो रे शईरो दे निकल़ेया, तेबे तेथा ते बाला* शईरो दे थी। 10 तेबे से बाला ते पच्छमा रिया तरफा खे मुड़ी की सेईर पाह्ड़ो तक थी, ओर यारीम पाह्ड़* तेथो रे उत्तरी कनारे ते ऊई की बेतशेमेशो खे उतरी गा ओर तेथा ते तिम्नाह पाँदे निकल़ेया, 11 तेथा ते से बन्ना एक्रोन शईरो रे उत्तरी कनारे गे ऊँदे ऊए शिक्करोन शईरो गे थी, ओर बाला पाह्ड़ो रिये ऊई की यब्नेल शईरो पाँदे निकल़ेया ओर तेस बन्ने रा अन्त बड़े समुद्रो रा कनारा ऊआ। 12 ओर पच्छमा रा बन्ना बड़े समुद्रो रा कनारा ठईरेया। यहूदा रे गोत्रो खे जो इस्सा तिना रे कुलो रे मुताबिक मिलेया तिजी रा चऊँ कनारला बन्ना ये ई ऊआ।

13 ओर यपुन्ने रे पाऊ कालेबो खे तिने यहोवे री आज्ञा रे मुताबिक यहूदी लोका बीचे इस्सा दित्तेया, मतलब किर्यतर्बा जेतेखे हेब्रोन बी बोलोए। से अर्बा नाओं रे अनाको रा बाओ था। 14 कालेबे तेथा ते शेशै, अहीमन ओर तल्मै नाओं रे अनाको रे तीनो पाऊ निकयाल़ी ते। 15 तेबे तेथा ते से दबीर शईरो रे रणे वाल़ेया पाँदे अमला कित्तेया, पुराणे जमाने दे दबीर शईरो रा नाओं किर्यत्सेपेर था। 16 तेबे कालेबे बोलेया, "जो कोई बी माणूं किर्यत्सेपेर शईरो खे अराई की लई लो तेस साथे मां आपणी बेटी अकसा रा ब्या करी देणा।" 17 तेबे कालेबो रे पाई कनजीए रे पाऊ ओत्नीएले से शईर आपणे कब्जे दे लई ला ओर कालेबे तेस साथे आपणी बेटी अकसा रा ब्या करी ता। 18 जेबे ब्या ऊणे ते कुछ दिन बाद कालेबो री बेटी तेसगे आई, तेबे ओत्नीएले से तेसा रे बाओ ते थोड़ी जमीन लणे खे सकेल़ी, तेबे से आपणे गह्दे ते उतरी ओर आपणे बाओ रे करे गई ओर कालेबे तेसा ते पूछेया, "ताखे क्या चाईयो?" 19 तेसरी बेटिए बोलेया, "माखे आशीर्वाद दे, तैं माखे दक्खणा रे देश नेगेबो दे कुछ जमीन तो देई राखी, जो बिलकुल सुकी जमीन ए, तो एबे माखे पाणिए रिया सूबल़ा बी दे।" तेबे तिने पाँदलिया ओर थाललिया दोनो सूबल़ा आपणिया बेटिया खे देईतिया।

20 यहूदा रे गोत्रो रा इस्सा तिना रे कुलो रे मुताबिक जो तिना खे मिलेया, 21 यहूदा रे गोत्रो रे कनारे वाल़े शईर दक्खणा रे देशो रे बन्ने रिया तरफा खे यो ए, मतलब कबसेल, एदेर, यागूर, 22 कीना, दीमोना, अदादा, 23 केदेश, हासोर, यित्नान, 24 जीप, तेलेम, बालोत, 25 हासोर्हदत्ता, करिय्योथेस्रोन, (जेतेखे हासोर बी बोलोए) 26 ओर अमाम, शेमा, मोलादा, 27 हसर्गद्दा, हेशमोन, बेत्पेलेत, 28 हसर्शूआल, बेर्शेबा, बिज्योत्या, 29 बाला, इय्यीम, एसेम, 30 एलतोलद, कसील, होर्मा, 31 सिकलग, मदमन्ना, सनसन्ना, 32 लबाओत, शिल्हीम, ऐन ओर रिम्मो; यो सारे शईर उणत्ती ए ओर इना रे गाँवो बी ए।

33 पच्छमा रिया तरफा खे बी पाह्ड़ो रे मैदानी इलाके रे देशो दे यो ए, मतलब एशताओल, सोरा, अशना, 34 जानोह, एनगन्नीम, तप्पूह, एनाम, 35 यर्मूत, अदुल्लाम, सोको, अजेका, 36 शारैम, अदीतैम, गदेरा जेतेखे गदेरोतैम बी बोलोए, यो सारे चौदा शईर ए ओर इना रे गाँवो बी ए।

37 फेर तिना खे यो शईर बी मिले सनान, हदाशा, मिगदलगाद, 38 दिलान, मिस्पे, योक्तेल, 39 लाकीश, बोस्कत, एग्लोन, 40 कब्बोन, लहमास, कितलीश, 41 गदेरोत, बेतदागोन, नामाह ओर मक्केदा, यो सोल़ा शईर ए ओर इना रे गाँवो बी ए।

42 फेर तिना खे ये शईर बी मिले लिब्ना, ऐतेर, आशान, 43 इप्ताह, अश्नाह, नसीब, 44 कीला, अकजीब ओर मारेशा, यो नो शईर ए ओर इना रे गाँवो बी ए।

45 फेर एक्रोन शईर आपणे सबी गाँवां समेत 46 ओर एक्रोनो ते लई की महासमुद्रो तक, जो शईर अशदोदो रे कनारे पाँदे ए सेयो गाँवां समेत तिना खे मिले, 47 ओर आपणे-आपणे शईरो ओर गाँवो समेत अशदोद ओर गाजा, बल्कि मिस्रो रे नाल़े तक ओर महासमुद्रो रे कनारे तक जितणे शईर ए।

48 पाह्ड़ी प्रदेशो दे यो ए, मतलब शामीर, यत्तीर, सोको, 49 दन्ना, किर्यत्सन्ना, जेतेखे दबीर बी बोलोए 50 अनाब, अशतमो, आनीम, 51 गोशेन, होलोन ओर गीलो; यो ग्यारा शईर ए ओर इना रे गाँवो बीए।

52 तेबे अराब, दूमा, एशान, 53 यानीम, बेत्तप्पूह, अपेका, 54 हुमता, किर्यतर्बा जेतेखे हेब्रोन बी बोलोए ओर सीओर; यो नो शईर ए ओर इना रे गाँवो बी ए।

55 तेबे माओन, कर्मेल, जीप, यूत्ता, 56 यिज्रेल, योकदाम, जानोह, 57 कैन, गिबा ओर तिम्नाह; यो दस शईर ए ओर इना रे गाँवो बी ए।

58 तेबे हलहूल, बेतसूर, गदोर, 59 मरात, बेतनोत ओर एलतकोन; यो छे शईर ए ओर इना रे गाँवो बी ए।

60 तेबे किर्यतबाल जेतेखे किर्यत्यारीम बी बोलोए ओर रब्बा, यो दो शईर ए ओर इना रे गाँवो बी ए।

61 उजाड़ जगा दे यो शईर ए, मतलब बेतराबा, मिद्दीन, सकाका, 62 निबशान, लूणो वाल़ा शईर ओर एनगदी, यो छे शईर ए ओर इना रे गाँवो बी ए।

63 यरूशलेम शईरो दे रणे वाल़े यबूसी जातिया रे लोका खे यहूदी सैनिक नि निकयाल़ी सके; तेबेई तो आजके दिनो तक यबूसी लोक यहूदा रे लोका साथे यरूशलेम शईरो दे रओए।