1 इने लोके जेबे ये सुणेया तेबे हित्ती, एमोरी, कनानी, परिज्जी, हिब्बी ओर यबूसी लोका रे जितणे राजे यरदन नदिया ते पच्छमा रिया तरफा खे पाह्ड़ी प्रदेशो रे ओर मैदानो दे ओर लबानोनो रे सामणे भूमध्य सागरो रे कनारे रओ थे। 2 सेयो एक मन ऊई की यहोशू ओर इस्राएली लोका साथे लड़ने खे कट्ठे ऊए।

3 जेबे गिबोन शईरो दे रणे वाल़ेया* सुणेया कि यहोशूए यरीहो ओर आई शईरो साथे क्या-क्या कित्तेया, 4 तेबे तिने इस्राएलो रे लोका खे तोखा दितेया, ओर राजदूता रा पेष बणाई की, आपणे गह्देया पाँदे पुराणे बोरे ओर पुराणे फटे दे ओर टाल्ली लगे दे शराबो रे पुराणे कुप्पे लादी की, 5 आपणे पैरा दे पुराणे गाठे दे जोड़े, बदनो दे पुराणे टाल्ले पईनी की ओर आपू खे खाणे खे सूकी दी ओर केअट वाल़ी रोटी लई ली। 6 तेबे सेयो गिलगालो रे डेरे दे यहोशूए गे जाई की तेसखे ओर इस्राएली परदानो खे बोलणे लगे, "आसे लोक दूर देशो ते आई रे इजी री खातर तुसे आसा साथे वाचा बानो।" 7 इस्राएलो रे लोके तिना हिब्बी लोका खे बोलेया, "क्या पता तुसे आसा बीचे ई रओए, तेबे आसे तुसा साथे वादा कऊँ करिए?" 8 तिने यहोशूए खे बोलेया, "आसे तेरे दास ए।" तेबे यहोशूए तिना खे बोलेया, "तुसे कुण ए? ओर केथा ते आई रे?" 9 तिने यहोशूए खे ज्वाब दित्तेया, "तेरे दास बऊत दूर देशो ते तेरे परमेशर यहोवे रा नाओं सुणी की आई रे, कऊँकि तेरे यहोवा परमेशरे मिस्रो दे केड़े बड़े-बड़े काम करी राखे," 10 ओर जो कुछ तिने एमोरिया रे दोनो राजेया साथे कित्तेया, जो यरदन नदिया रे पूर्बा रिया तरफा खे रओ थे, मतलब हेशबोनो रे राजा सिहोनो साथे ओर बाशानो रे राजा ओगो साथे जो अशतारोतो रे था, आसे ये सब बी सुणी राखेया। 11 इजी री खातर म्हारे स्याणेया लोके ओर म्हारे देशो रे रणे वाल़ेया सबी जणेया आसा खे बोलेया, "बाटा दे खाणे रिया चीजा लई की तिना साथे मिलणे जाओ ओर तिना ते अर्ज करो कि आसे तुसा रे दास ए, इजी री खातर तुसे एबे आसा ते वादा करो।" 12 जेस दिने आसे तुसा गे मिलणे खे निकल़े थे तेस दिने तो आसे आपणे-आपणे कअरो ते ये रोटी गर्म ओर ताजी लई थी; पर एबे देखो, ये सूकी गी री ओर इदे फफूंद लगी गी री। 13 तेबे यो जो अँगूरा रे रसो रे खल्लड़ु आसे परी ले थे, तेबे तो नये थे, पर एबे देखो यो तो फटी गे रे ओर म्हारे यो टाल्ले ओर जोड़े लाम्बी यात्रा करी की पुराणे ऊईगे रे। 14 तेबे तिने इस्राएलो रे परदाने यहोवे ते बिना सला लई की तिना रे खाणे बिचा ते कुछ खाणा खाया। 15 तेबे यहोशूए तिना साथे मेल-जोल करी की तिना ते ये वादा कित्तेया, "तुसे जिऊँदे छाडणे; ओर मण्डल़िया रे परदाने तिना ते कसम खाई ओर राजी ऊए। 16 ओर तिना गिबोनो रे लोका साथे वादा करने ते तीन दिन बाद इस्राएली लोका खे ये सन्देश मिलेया कि सेयो म्हारे साथले लाके रे रणे वाल़े लोक ए ओर आसा ई बीचे बसी रे।"

17 तेबे इस्राएली तेथा ते चली की तीजे दिने तिना रे शईरा खे जिना रे नाओं गिबोन, कपीरा, बेरोत ओर किर्यत्यारीम ए, पऊँची गे 18 ओर इस्राएलिये सेयो नि काये, कऊँकि मण्डल़िया रे परदाने तिना साथे इस्राएलो रे परमेशर यहोवे री कसम खाई थी। तेबे सारी मण्डल़िया रे लोक परदाना रे खलाफ कुड़कुड़ाणे लगे। 19 तेबे सबी परदाने सारी मण्डल़िया खे बोलेया, "आसे तिना साथे इस्राएलो रे परमेशर यहोवे री कसम खाई राखी, इजी री खातर एबे तिना रा कोई नुकसान नि ऊई सकदा। 20 आसा तिना साथे ये ई करना कि तेसा कसमा रे मुताबिक सेयो जिऊँदे छाडी देणे, नई तो म्हारी खाई री कसमा री बजा ते आसा पाँदे परमेशरो रा रोष पड़ना।" 21 तेबे परदाने इस्राएली लोका खे बोलेया, "तिना खे जिऊँदे छाडी देयो।" तेबे परदाना रे इना वचना रे मुताबिक से सारी मण्डल़िए मानेया ओर सेओ लोक इस्राएली लोका रिया तँईं लकड़ू बाडणे वाल़े ओर पाणी परने वाल़े बणे।

22 तेबे यहोशूए गिबोनी लोका खे बुलाई की बोलेया, "तुसे तो आसा रे नेड़े ई रओए, तेबे तुसे आसा साथे ये बोली की छल कऊँ कित्तेया कि आसे तुसा ते बऊत दूर देशो रे रऊँए? 23 इजी री खातर तुसे एबे स्रापित ए ओर म्हारे दास ऊणे, मतलब मेरे परमेशरो रे मन्दरो खे लकड़ू बाडणे वाल़े ओर पाणी परने वाल़े ऊणे।" 24 तिने यहोशूए खे ज्वाब दित्तेया, "आसे सुणी राखेया कि तेरे यहोवा परमेशरे आपणे दास मूसे खे आज्ञा दित्ती थी कि तुसा खे तेस सारे देशो खे देयो ओर तेथो रे सारे रणे वाल़ेया खे तुसा सामणे नाश करो। इजी बजा ते आसे डरी गे थे कि तुसा आसे काई देणे इजी बजा ते आसे चूठ बोलेया। 25 ओर एबे आसे तेसरे वशो रे ए, जेड़ा बर्ताव ताखे खरा लगो, तेड़ा ई बर्ताओ आसा साथे कर।" 26 तेबे यहोशूए तिना साथे एड़ा ई कित्तेया ओर सेयो इस्राएली लोका रे आथो ते एड़े बचाए कि सेयो तिना खे काई नि सके। 27 पर यहोशूए तेस ई दिने गिबोनी लोक मण्डल़िया खे ओर जो जगा यहोवा चूणी लो, तिदे तेसरी बेदिया खे, लकड़ू बाडणे वाल़े ओर पाणी परने वाल़े नियुक्त करीते, जेड़ा आजो तक ए।