यहोशू 16

एप्रैम ओर मनश्शे रे गोत्रा खे जमीना रा इस्सा

1 तेबे यूसुफो री ल्वादा रा इस्सा चिट्ठी पाणे ते ठराया, तिना रा बन्ना यरीहो शईरो गे यरदन नदिया ते, मतलब पूर्वो रिया तरफा खे यरीहो रे पाणिए ते शुरू ऊई की तेस पाह्ड़ी प्रदेशो ते ऊँदे ऊए, जो उजाड़ जगा दे ए, बेतेल शईरो तक था; 2 तेथा ते से लूज शईरो तक था जेतेखे बेतेल बी बोलोए, ओर एरेकी जातिया रे बन्ने रिये ऊँदे ऊए अतारोत शईरो गे जाई की निकल़ेया। 3 ओर पच्छमा रिया तरफा खे यपलेती जातिया रे लोका रे बन्ने ते उतरी की फेर थालले बेथोरोनो रे बन्ने ते ऊई की गेजेर शईरो दे पऊँचेया ओर महासमुद्रो पाँदे निकल़ेया। 4 ईंयाँ मनश्शे ओर एप्रैम नाओं रे यूसुफो रे दोनो पाऊआ री ल्वादे ये जमीना रा इस्सा आपणे कब्जे दे लया।

एप्रैमी लोका रा इस्सा

5 एप्रैमी लोका रा बन्ना तिना रे कुलो रे मुताबिक ये ठईरेया; मतलब तिना रे इस्से रा बन्ना पूर्वो ते शुरू ऊई की अत्रोतदारो ते ऊँदे ऊए पाँदले बेथोरोनो तक पऊँचेया। 6 ओर उत्तरी बन्ना पश्चिमा रिया तरफा खे मिकमतात शईरो ते शुरू ऊई की पूर्वो रिया तरफा खे मुड़ी की तानतशीलो शईरो खे पऊँचेया ओर तेथा ते ऊँदे ऊए यानोह शईरो तक पऊँचेया; 7 तेबे यानोह ते से अतारोत ओर नारा शईरो खे उतरदा ऊआ यरीहो शईरो गे ऊई की यरदन नदिया गे निकल़ेया। 8 तेबे से ई बन्ना तप्पूह ते निकल़ी की ओर पच्छमा रिया तरफा खे जाई की, कानाह रे नाल़े तक ऊई की महासमुद्रो दे निकल़ेया। एप्रैमो रे लोका रा इस्सा तिना रे कुलो रे मुताबिक ये ई ऊआ। 9 ओर मनश्शे रे लोका रे इस्से बीचे बी कई एक शईर आपणे-आपणे गाँवो समेत एप्रैमी लोका खे लग कित्ते। 10 पर जो कनानी लोक गेजेर शईरो दे बसी रे थे सेयो एप्रैमी लोके तेथा ते नि निकयाल़े, तेबेई तो सेयो कनानी लोक तिना बीचे आजो तक बसे रे ए ओर बदले दे दास बणी की सेवा रे काम करोए।