न्यायियो 1

इस्राएली लोका री कनानिया पाँदे जीत

1 यहोशूए रे मरने ते बाद इस्राएली लोके यहोवे ते पूछेया, "कनानिया रे खलाफ लड़ने खे म्हारे गोत्रा बीचा ते पईले कुण जाणा चाईयो?" 2 यहोवे इस्राएली लोका खे बोलेया, "यहूदा गोत्रो रे लोका पईले जाईकी तिना पाँदे अमला करना; सुणो, मां कनानिया खे अराणे खे तिना री मताद करनी ओर तिना रा देश तिना खे देई देणा।" 3 तेबे यहूदा रे गोत्रो रे लोके आपणे पाई शिमोनो रे गोत्रो रे लोका खे बोलेया, "आसा साथे आओ।" जो जमीन आसा खे यहोवे रिया तरफा ते चिट्ठी पाई की मिली री तिदे जो कनानी लोक ए तिना रे खलाफ लड़ने खे आसा साथे आओ। तेबे आसा बी तुसा री मताद करने खे तुसा रिया जगा दे आऊणा। तेबे शिमोनो रे लोक यहूदा रे लोका साथे गये। 4 जेबे यहूदा रे लोके अमला कित्तेया तेबे यहोवे कनानिया ओर परिज्जिया खे अराणे दे तिना री मताद कित्ती। ओर तिने बेजेक शईरो दे दस ह्जार मर्द काईते। 5 यहूदी लोके बेजेक शईरो दे अदोनी बेजेक राजा देखेया ओर सेयो तेस साथे लड़ने लगे, ओर तेती तिने कनानी ओर परिज्जी लोक काई ते। 6 पर अदोनी बेजेक राजा तेथा ते नठी गा। पर यहूदी लोके तेसरा पीछा कित्तेया ओर से पकड़ी ला। तेबे तिने तेसरे आथा ओर पैरा रे गूठे बाडी ते। 7 तेबे अदोनी बेजेक राजे बोलेया, "मैं सत्तर राजेया रे आथो ओर पैरा रे गूठे बाडी ते ओर तिना खे मेरे मेजो निठे रोटिया रे टुकड़े चकी-चकी की पेट परना पड़ो था। एबे यहोवे मां साथे तेड़ा ई कित्तेया जेड़ा मैं तिना राजेया साथे कित्तेया ओर बेजेक राजे खे यरूशलेम शईरो रे लयी गे ओर से तेती मरी गा।"

8 यहूदा गोत्रो रे लोके यरूशलेम शईरो पाँदे अमला कित्तेया ओर तेस पाँदे कब्जा करी ला। तिने तेसरे लोक तलवारी साथे काईते ओर शईरो दे आग लगाईती। 9 एते ते बाद, यहूदा रे लोक पाह्ड़ी इलाके रे दक्खणा दे रेगिस्तान ओर पच्छमा दे समुद्रो कनारे रणे वाल़े कनानिया रे खलाफ लड़ने खे थाले चली गे। 10 ओर यहूदा रे सिपाई तिना कनानिया साथे बी लड़ाई करने गये जो हेब्रोन शईरो रे रओ थे। (हेब्रोनो रा नाओं पईले किर्यत-अर्बा था); तिने तेती शेशै, अहीमन ओर तल्मै लोक काईते।

दबीर शईरो पाँदे जीत

11 सेओ तेथा ते दबीर शईरो रे रणे वाल़ेया साथे लड़ने खे गये। दबीर शईरो रा नाओं पईले किर्यत्सेपेर था। 12 तेबे कालेबे बोलेया, "जो कोई बी माणूं किर्यत्सेपेर शईरो खे अराई की लई लो तेस साथे मां आपणी बेटी अकसा रा ब्या करी देणा।" 13 तेबे कालेबो रे पाई कनजीए रे पाऊ ओत्नीएले से शईर आपणे कब्जे दे लई ला ओर कालेबे तेस साथे आपणी बेटी अकसा रा ब्या करी ता। 14 जेबे ब्या ऊणे ते कुछ दिन बाद कालेबो री बेटी तेसगे आई, तेबे ओत्नीएले से आपणे पिते ते थोड़ी जमीन लणे खे सकेल़ी, तेबे से आपणे गह्दे ते उतरी आपणे बाओ रे कअरे गई ओर कालेबे तेसा ते पूछेया, "ताखे क्या चाईयो?" 15 कालेबो री बेटिए बोलेया, "माखे आशीर्वाद दे, तैं माखे दक्खण देशो बीचा ते कुछ जमीन तो देई राखी, जो बिलकुल सुकी जमीन ए, तो एबे माखे पाणिए रिया सूबल़ा बी दे।" तेबे तिने पाँदलिया ओर थाललिया दोनों जगा रिया सूबल़ा आपणिया बेटिया खे देईतिया।

यहूदा ओर बिन्यामीन कुला री जीत

16 केनी जातिया रे लोक मूसे रे साल़े रे परिवारो ते थे। केनी लोक यहूदा रे लोका साथे खजूरो वाल़े शईरो*1:16 खजूरो वाल़े शईरो यरीहो ते यहूदा री रेगिस्तान जगा दे गये, जो अराद शईरो रे नेड़े दक्खणा रे रेगिस्तान प्रदेशो दे ए। सेओ यहूदा रे लोका साथे रणे लगे। 17 तेबे यहूदा रे लोके आपणे पाई शिमोनो रे लोके साथे जाई की सपत शईरो दे रणे वाल़े कनानी लोक अराईते ओर तिना रा शईर नाश करी ता। इजी री खातर तेस शईरो रा नाओं होर्मा*1:17 होर्मा एतेरी आवाज एड़ी जेतेरा मतलब हिब्रु. दे पुरिया तरआ नाश ए पड़ेया। 18 यहूदा रे लोके गाजा, अश्कलोन ओर एक्रोन शईर ओर इना रे चऊँ कनारली जमीन बी आपणे कब्जे दे लयी ली। 19 यहोवा यहूदा रे लोका साथे था। तेबेई तो तिने सारे पाह्ड़ी देशो पाँदे आपणा अक्क करी ला। सेओ मैदानो रे रणे वाल़ेया खे नि निकयाल़ी सके; कऊँकि तिना गे लोए रे रथ थे। 20 इस्राएली लोके हेब्रोन शईर कालेबो खे देईता जेड़ा मूसे बोलेया था। कालेबे अनाको रे तीनो पाऊ तेसा जगा ते निकयाल़ी ते। 21 बिन्यामीनी लोक यरूशलेम शईरो दे रणे वाल़े यबूसी लोका खे नि निकयाल़ी सके; इजी री खातर यबूसी आजो तक यरूशलेम शईरो दे बिन्यामीनिया साथे रओए।

22 तेबे यूसुफो रे कराने एप्रैम ओर मनश्शे रे लोक बेतेल शईरो दे तेथो रे लोका पाँदे अमला करने खे गये ओर यहोवा तिना साथे था। 23 अमले ते पईले यूसुफो रे कराने रे लोके बेतेल शईरो रा पेत लणे खे कुछ पेतिये पेजे थे। एते बेतेल शईरो रा नाओं पईले लूज था। 24 ओर तिने पेतिये एक माणूं तेस शईरो ते बारे निकल़दे ऊए देखेया। ओर तिने तेसखे बोलेया, "आसा खे शईरो दे जाणे री बाट दस ओर तेबे आसा तां पाँदे दया करनी।" 25 तेबे तिने मर्दे तिना खे शईरो दे जाणे री बाट दसी, तेबे एप्रैम ओर मनश्शे रे लोके तेस शईरो रे लोक तलवारी साथे काईते, पर तेस मर्दो ओर तेसरे सारे कराने खे बचाई ला। 26 तिने माणूंए हित्तिया रे देशो रे जाई की एक नवां शईर बसाया ओर तीजी रा नाओं बी लूज राखेया; ओर आजो तक से लूज शईर बणेया दा ए। 27 मनश्शे गोत्रो रे लोके इना शईरा ओर इना रे नेड़े-तेड़े रे गाँवो दे रणे वाल़े बेतशान, तानाक, दोर यिबलाम ओर मगिद्दो रे लोका खे नि निकयाल़ी सके;। ईंयाँ कनानी तेस शईरा ओर गाँवां दे बसे देई रये। 28 पर जेबे इस्राएली सामर्थी ऊए, तेबे तिने कनानी लोक आपू गे काम करने खे मजबूर कित्ते पर सेयो पुरिया तरअ ते बारे नि निकयाल़े। 29 एप्रैमी लोके गेजेर शईरो दे रणे वाल़े कनानी लोक नि निकयाल़े, ईंयाँ कनानी तिना बीचे रओ थे। 30 जबूलूनी लोके कित्रोन ओर नहलोल शईरो दे रणे वाल़े कनानी नि निकयाल़े, ईंयाँ कनानी तिना बीचे बसे दे रये ओर तिना रे वशो दे ऊईगे। 31 आशेर गोत्रो रे लोके बी इना अक्को, सिदोन, अहलाब, अकजीब, हेलबाह, अपीक ओर रहोब शईरा रे लोका खे बारे नि काडेया था। 32 इजी री खातर आशेर गोत्रो रे लोक कनानी लोका खे निकयाल़ी नि सके ओर सेयो तिना रे प्रदेशो दे तिना बीचे बसी गे। 33 नप्ताली गोत्रो रे लोके बी बेतशेमेश ओर बेतनात शईरो रे रणे वाल़े कनानी लोक नि निकयाल़े, पर तेती प्रदेशो दे रणे वाल़े कनानिया बीचे बसी गे, तेबे बी बेतशेमेश ओर बेतनात शईरो रे लोक तिना रे गुलाम ऊईगे। 34 एमोरी लोके दान गोत्रो रे लोक पाह्ड़ी प्रदेशो खे नठाईते ओर तिने सेयो मैदानो दे थाले उतरने नि दित्ते। 35 ओर एमोरी लोक हेरेस नाओं रे पाह्ड़, अय्यालोन ओर शाल्बीम शईरो दे बसे देई रये, पर जेबे यूसुफो रा कराना एथो तक तागतबर ऊई गा तेबे तिने एमोरी लोक आपणे गुलाम बणाईते। 36 एमोरी लोका रिया जमीना रा बन्ना अक्रब्बीम*1:36 अक्रब्बीम बिच्छु दर्रा नाओं रे पाह्ड़ो री चढ़ाईया ते शुरू ऊई की से सेला शईरो ते निकल़ी की पाँदली तरफा खे निकल़ेया।