न्यायियो 21

बिन्यामीनो रे मर्दा खे लाड़िया रा इंत्तजाम

1 फेर इस्राएली लोके मिस्पा शईरो दे कट्ठे ऊई की कसम खाई की बोलेया, "आसा आपणिया बेटिया रा ब्या बिन्यामीन गोत्रो रे लोका साथे कदी नि करना।" 2 फेर लोक बेतेल शईरो खे गये, ओर सांजा तक परमेशरो रे सामणे बैठे दे रये, ओर फूटी-फूटी की रोंदे रये 3 तिने बोलेया, "ओ इस्राएलो रे यहोवा परमेशर, एड़ा कऊँ ऊआ, बिन्यामीनो रा गोत्र इस्राएलो बीचा ते कऊँ कम ऊईगा?" 4 दूजे दिने प्यागा लोके तेती एक बेदी बणाई ओर तेते पाँदे तिने आपणी होमबलि ओर मेलबलि चढ़ाए। 5 ओर इस्राएली लोके बोलेया, "इस्राएलो रे सारे गोत्रा बीचा ते कुण यहोवे गे सभा रे नि आया?" कऊँकि तिने तो पारी कसम खाई की बोलेया था, "जो मिस्पा शईरो दे यहोवे गे नि आओगा, से पक्का काया जाणा।" 6 इस्राएली लोका खे आपणे पाई बिन्यामीनो पाँदे तरस आया ओर तिने बोलेया, "आज इस्राएलो रा एक गोत्र लगभग पूरा नाश ऊईगा। 7 आसे बिन्यामीनो रे बचे रे मर्दा खे लाड़िया केथा थे टोल़िए, कऊँकि आसे यहोवे री कसम खाई राखी ए कि आसा आपणिया बेटिया रा ब्या तिना ते नि करना?" 8 तेबे तिने ये पूछेया, "जेबे आसे मिस्पा शईरो दे यहोवे गे सभा दे कट्ठे ऊए थे, तेबे इस्राएलो रे गोत्रो बीचा ते कुण आसा साथे नि आया था?" ओर तिना खे पता लगेया कि गिलादो रे याबेश शईरो ते कोई बी सभा दे नि आया था। 9 कऊँकि जेबे तिने लोका री गिणती कित्ती, तेबे ये पता लगेया कि गिलाद प्रदेशो रे याबेश शईरो रे रणे वाल़ेया बीचा ते तेती कोई नि था। 10 इजी री खातर मण्डल़िए आपणे 12,000 तागतबर सिपाई गिलादो रे याबेश शईरो दे ये बोली की पेजे, "तुसे तेती जाई की जवाणसा ओर बाल-बच्चेया समेत सारा याबेश शईर तलवारे की खत्म करी देयो। 11 तुसे एड़ा करना कि सब मर्द ओर सब ब्याईया दिया जवाणसा नाश करी देणियां पर जो कुआँरिया छोट्टिया ओ सेयो जिऊँदिया राखी देणियां।" 12 इस्राएली सिपाईए गिलादो रे याबेश शईरो पाँदे अमला कित्तेया। तिना खे 400 जवान कुआँरिया मिलिया, सेयो तिना कुआँरिया खे कनान देशो रे शीलो शईरो दे आपणे डेरे दे लई की आए। 13 तेबे सारी इस्राएली मण्डल़िए तिना बिन्यामीनी लोका गे जो रिम्मोन नाओं री चट्टानी दे लूकी रे थे सन्देसा पेजेया ओर तिना साथे मेल-जोल करने खे बोलेया। 14 तेबे बिन्यामीनी मर्द आपणी जगा दे वापस ऊईगे, ओर इस्राएली सिपाईए जो गिलाद प्रदेशो रे याबेश शईरो ते जो 400 छोट्टिया आपू साथे ल्याये थे, तिना खे ब्या करने खे देईतिया पर तेबे बी सेयो तिना खे थोड़िया थिया। 15 इस्राएली लोका खे बिन्यामीनो रिया तँईं दु:ख ऊआ, कऊँकि यहोवे इस्राएलो रे गोत्रा दे दूरी पैदा करिती दी थी। 16 तेबे मण्डल़िया रे बुजुर्ग लोके पूछेया, "बिन्यामीनी जवाणसा जो नाश ऊईगी रिया, तो जो बचे रे मर्द ए तिना रिया खातर आसे जवाणसा किंयाँ टोल़िए?" 17 इस्राएलो रे लोके बोलेया, "जे बचे दे बिन्यामीन गोत्रो रे मर्दा रे बच्चे नि ऊए, तो इस्राएली गोत्रो बीचा ते एक इस्सा मतलब गोत्र नाश ऊई जाणा। 18 पर आसे सब इस्राएली लोक आपणी केसी बेटिया रा ब्या तिना रे केसी बी मर्दो साथे नि करी सकदे। कऊँकि आसे ये बोली की कसम खाई राखी कि से माणूं स्रापित ओ जो आपणी बेटिया रा ब्या बिन्यामीन गोत्रो रे केसी बी मर्दो साथे करवाओ।" 19 बुजुर्ग लोके सलाह् दित्ती, "सुणो, शीलो दे यहोवे रा सालो रा त्योआर छोड़ ई आऊणे वाल़ा ए। जो शीलो शईर बेतेल शईरो री उत्तर दिशा दे, लबोना शईरो रिया दक्खणा दे, ओर बेतेलो ते शकेमो बीचली बाटा रे पूर्बा दे ए।" 20 इजी री खातर तिने बिन्यामीन गोत्रो रे मर्दा खे ये आज्ञा दित्ती, "जेबे तेस त्योआरो रा बखत ऊई जाओ, तो तुसे जाई की अंगूरा रे बगीचे दे लूकी जाओ। 21 ओर त्यानो साथे देखो; जेबे शीलो रिया कुआँरिया बेटिया नाचणे खे तेती आओ, तेबे तुसे अंगूरा रे बगीचे ते निकल़ी की शीलो रिया बेटिया बीचा ते आपणी-आपणी लाड़ी बनाणे खे एक-एक बेटी पकड़ी लो ओर तिना खे बिन्यामीन प्रदेशो दे आपणे कअरे लई जाओ।" 22 ओर जेबे तिना रे बाओ या पाई आसा गे लड़ने खे आओगे, तेबे आसा तिना खे बोलणा, "दया करी की तिना खे आसा खे देई देयो, कऊँकि जेबे आसे गिलादो रा याबेश शईर नाश कित्तेया, तेबे आसे तिना सबी मर्दा खे लाड़िया नि ल्याई सके। तुसे कसम तोड़ने रे दोषी नि ऊणे कऊँकि तुसे आपू आपणी बेटिया रा ब्या तिना साथे नि कित्तेया।" 23 तेबे बाकि बिन्यामीनी मर्दे एड़ा ई कित्तेया, तिने सबी शीलो दे नाचणे वाल़िया बेटिया बीचा ते एक-एक आपणी लाड़ी चूणी ली तेबे सेयो आपणे इलाके बिन्यामीनो खे वापस चली गे, ओर फेर आपणे-आपणे इस्से रे शईर बसाए, ओर तेथी रणे लगे। 24 तेबे इस्राएली लोक गोत्रा ओर कुला रे मुताबिक आपणे-आपणे इस्से वाल़िया जगा खे आपणे-आपणे कअरो खे चलीगे। 25 तिना दिना रे इस्राएली लोका रा कोई राजा नि था; इजी खे तिना खे जो कुछ सई लगो था, से तेड़ा ई करो थे।