1 जेबे एहूद मरी गा तेबे इस्राएलिये फेर यहोवे री नजरा दे बुरा कित्तेया। 2 इजी री खातर यहोवे सेयो हासोर शईरो दे रणे वाल़े कनानो रे राजा याबीनो रे वशो दे करीते। तेसरे सेनापतिये रा नाओं सीसरा था, जो दूजी जातिया रे हरोशेत शईरो रा रणे वाल़ा था। 3 सीसरा गे लोए रे 900 रथ थे। से इस्राएली लोका पाँदे बीइ साल तक बड़ा जुल्म करदा रया, तेबे इस्राएली लोके मतादा रिया तँईं यहोवे री दुहाई दित्ती। 4 तेस बखते लप्पीदोतो री लाड़ी दबोरा इस्राएली लोका रा न्याय करो थी। से एक नबिया थी। 5 एप्रैम पाह्ड़ी प्रदेशो रे रामाह ओर बेतेल शईरा बीचे दबोरा खजूरो रे डाल़ो निठे बैठेया करो थी ओर इस्राएली तेसा गे न्याय पाणे खे जाया करो थे। 6 एक दिन दबोरे अबीनोअमो रे पाऊ बाराको खे नप्ताली प्रदेशो रे केदेश शईरो ते आपू गे बुलाया। तेसे बाराको खे बोलेया, "क्या इस्राएलो रे यहोवा परमेशरे ताखे ये आज्ञा नि दित्ती ओर ये नि बोलेया कि तूँ जाई की नप्ताली ओर जबूलून गोत्रो रे लोका बीचा ते दस ह्जार मर्दा खे साथे लयी की ताबोर पाहड़ो पाँदे चढ़ी जा? 7 तेबे यहोवे याबीनो रा सेनापति सीसरा तेसरे रथा ओर सेना समेत कीशोन नदिया तक तेरी तरफा खे खींजी की लई आऊणा ओर से तेरे वशो दे करी देणा।" 8 बाराके तेसा खे बोलेया, "जे तूँ मां साथे चलेगी तो आऊँ जाऊँगा, नई तो मां नि जाणा।" 9 तेसे बोलेया, "कोई गल्ल नि आऊँ तां साथे चलूँगी, पर एसा लड़ाईया ते तेरा तो कोई नाओं नि ऊणा, कऊँकि यहोवे सीसरा एकी जवाणसा रे आथे काणा।" तेबे दबोरा उठी की बाराको साथे केदेश शईरो खे गयी। 10 तेबे बाराके जबूलून ओर नप्तालिया रे लोक केदेशो दे बुलाए ओर तेस पीछे 10,000 मर्द चली पड़े ओर दबोरा बी तिना साथे चली पड़ी। 11 तेती हेबेर नाओं रा एक केनी माणूं था, केनी लोक तो मूसे रे सऊरे रे कुलो रे थे, से बाकि केनिया ते लग ऊईगा था ओर तिना ते दूर केदेश शईरो गे सानन्नीम जगा रे बड़े डाल़ो गे जाई की रणे लगी रा था।

12 सीसरा खे ये सन्देश मिलेया कि अबीनोअमो रा पाऊ बाराक ताबोर पाह्ड़ो पाँदे चढ़ीगा रा ए। 13 तेबे सीसरे आपणे सारे रथ, जो लोए रे 900 रथ थे ओर आपू साथली सारी सेना बुलाई, ओर सेयो सब दूजी जातिया रे हरोशेत जगा ते कीशोन नदिया गे गये। 14 तेबे दबोरे बाराको खे बोलेया, "उठ ओर चल! कऊँकि आज से दिन ए जिदे यहोवे सीसरा तेरे वशो दे करी देणा। क्या ताखे पता नि ए कि लड़ाई करने खे यहोवा तांते आगे चली रा?" तेबे बाराक ओर 10,000 मर्द ताबोर पाह्ड़ो ते थाले उतरने लगे। 15 जेबे बाराक ओर तेसरे लोके सीसरा ओर तेसरी सेना पाँदे तलवारे की अमला कित्तेया। तेबे यहोवे सीसरा ओर तेसरी सेना बाराको रे वशो दे करिती, पर सीसरा रथो पाँदा ते उतरी की पैदल ई नठीगा। 16 बाराक ओर तेसरे लोक दूजी जातिया रे हरोशेत जगा तक तिना रे रथ ओर सेना पीछे दौड़े ओर तलवारी की सीसरा री सारी सेना नाश करी ती ओर एक बी माणूं जिऊँदा नि छाडेया। 17 पर सीसरा नठी की केनी जातिया रे हेबेरो री लाड़ी याएलो रे डेरे दे नठी गा; कऊँकि हासोरो रे राजा याबीन ओर हेबेरो रे परिवारो वाल़ेया केनिया रा आपू बीचे अच्छा रिस्ता था। 18 तेबे याएल सीसरा खे मिलणे खे आपणे डेरे ते बारे निकल़ी ओर तेसखे बोलणे लगी, "ओ मेरे स्वामी, डर नि एती पीतरे आईजा।" तेबे से तेसा रे डेरे दे पीतरे गया ओर लेटीगा ओर तेसे तेस पाँदे कांबल़ देईता। 19 तेबे सीसरे तेसा खे बोलेया, "माखे त्याये लगी री, माखे थोड़ा जा पाणी पल़्या।" तेबे तेसे दूदो री कूप्पी खोली की तेसखे दूद पल़्याया ओर तेसे फेर से कांबल़े की टखी ता। 20 तेबे सीसरे तेसा खे बोलेया, "डेरे रे द्वारो पाँदे खड़ी री रओ ओर जे कोई आयी की तांते पूछो, ‘एती कोई मर्द ए?’ तेबे बोलणा, कोई पनि ए।" 21 से तो थकेया रा था ई इजी खे गईरी नींजा दे सईगा। पर हेबेरो री लाड़ी याएले एक लकड़िया री खूँडी लयी ओर आपणे आथो दे एक थौड़ा बी लया ओर आऊल़े-आऊल़े तेसगे जाई की खूँडी तेसरे कनपटिया पाँदे एड़ी ठोकी कि खूँडी दूजे कनारिये निकल़ी की जमीना दे तसी गी, ओर से मरी गा। 22 जेबे बाराक सीसरा रा पीछा करदा ऊआ आया, तेबे याएल तेसगे मिलणे खे डेरे ते बारे निकल़ी ओर बोलेया, "ओरे आओ, जेसखे तूँ टोल़ने लगी रा तेसखे आऊँ ताखे बताऊँ ई।" तेबे तिने तेसा साथे जाई की देखेया कि सीसरा मरेया रा पड़ी रा ओर से खूँडी तेसरे कनपटिया दे कूसी री। 23 ईंयाँ परमेशरे तेस दिने इस्राएली लोका री मताद कित्ती ओर तिने कनानो रा राजा याबीन अराई ता। 24 तेस बखतो ते इस्राएली लोक कनानो रे राजा याबीनो पाँदे प्रबल ऊँदे गये, एथो तक कि तिने कनानो रा राजा याबीन नाश करी ता।