1 इस्राएली लोका बीचा ते जितणे लोक कनानो री लड़ाईया दे शामिल नि ऊए थे, तिना खे परखणे खे यहोवे कुछ जातिया तिना बीचे रणे दित्तिया। 2 यहोवे ये सब इजी खे कित्तेया ताकि इस्राएलो रे सेयो जवान लोक जो लड़ाईया खे पईले नि जाणो थे, सेयो सीखी लो। 3 यहोवे जो जातिया इस्राएली लोका बीचे छाडी तिया थिया सेयो ये ए; पलिश्ती ओर तिना रे पाँजो सरदार, कनानी ओर सीदोनी लोक ओर हिब्बी लोक जो लबानोनो दे बालहेर्मोन नाओं रे पाह्ड़ो ते लई की हमात काट्टिया तक रओ थे। 4 यो जातिया इस्राएली लोका बीचे इजी खे रणे दित्तिया ताकि से तिना री परीक्षा लई सको। कि जो आज्ञा यहोवे मूसे रे जरीये तिना रे बुजुर्गा खे दित्तिया थिया, तिना सेयो मानणियां कि नई। 5 इजी री खातर इस्राएली लोक कनानी, हित्ती, एमोरी, परिज्जी, हिब्बी ओर यबूसी लोका बीचे बसी गे। 6 तेबे इस्राएली लोक तिना री बेटिया साथे ब्या करने लगे ओर आपणी बेटिया तिना रे माठेया साथे ब्याणे लगे ओर तिना रे देवतेया री पूजा बी करने लगे।

7 एड़ा काम करी की इस्राएली लोके यहोवे री नजरा दे बुरा कित्तेया ओर आपणे परमेशर यहोवे खे पूली की बाल देवता ओर अशेरा देविया री मूर्तिया री पूजा करने लगी गे। 8 तेबे यहोवे रा रोष इस्राएली लोका पाँदे पड़केया ओर तिने सेयो अरम्नहरैमो* रे राजा कूशन-रिश्आतइमो रे वशो दे करी ते; तेबे इस्राएली आठ साल तक कूशन रिश्आतइमो रे वशो दे रये। 9 तेबे इस्राएलिये यहोवे री दुहाई दित्ती ओर तिने इस्राएली लोका खे बचाणे रिया तँईं कालेबो रे छोटे पाई कनजीए रा पाऊ ओत्नीएल चुणेया ओर ओत्नीएले इस्राएली लोक गुलामिया ते छुड़ाए। 10 यहोवे रा आत्मा तेसखे चलाणे लगेया ओर से इस्राएली लोका रा न्यायी बणीगा ओर से अरामो रे राजा कूशन-रिश्आतइमो ते लड़ाई करने खे गया ओर यहोवे ओत्नीएलो खे तेस पाँदे जीत दलाई। 11 तेबे चाल़ी साला तक तेते जगा दे शान्ति बणी दी रयी। तेबे कनजीये रा पाऊ ओत्नीएल मरी गा।

12 इजी ते बाद इस्राएलिये फेर यहोवे री नजरा दे बुरा कित्तेया जेतेरिया बजा ते यहोवे इस्राएली मोआबो रे राजा एग्लोनो रे वशो दे करीते, कऊँकि तिने यहोवे रे खलाफ बुरा कित्तेया था। 13 इजी री खातर एग्लोन राजे अम्मोनी ओर अमालेकी लोका साथे मिली की इस्राएली लोका साथे लड़ाई कित्ती ओर सेयो लोक अराईते ओर खजूरो वाल़ा शईर आपणे कब्जे दे करी ता। 14 तेबे इस्राएली ठारा साला तक मोआबो रे राजा एग्लोनो रे वशो दे रये। 15 फेर इस्राएलिये यहोवे री दुहाई दित्ती ओर तिने बिन्यामीन गोत्रो रे गेरा रा पाऊ एहूद तिना खे छुड़ाणे खे पेजेया; से खूँजाठा था। इस्राएलिये तेसरे ई आथो ते मोआबो रे राजा एग्लोनो खे कुछ पेंट पेजी। 16 एहूदे लगभग आथ पर लाम्बी एक दो तार वाल़ी तलवार बणवाई थी, ओर तिने से आपणे टाल्लेया निठे दाँणी खुटिया पाँदे लटकाई ती। 17 तेबे से तेसा पेंटा खे मोआबो रे राजा एग्लोनो गे जो बऊत मोटा था लयी गा। 18 जेबे एहूद तेसा पेंटा खे देई चुकेया, तेबे तिने पेंटा खे ल्याऊणे वाल़े इस्राएली लोक वापस कअरो खे पेजी ते। 19 पर से आपू गिलगालो रे नेड़े बणाई रिया पात्थरा रिया मूर्तिया गे ते वापस राजा एग्लोनो गे आया ओर तेसखे बोलेया, "ओ राजा, मां तांगे पेतो री एक गल्ल बताणी।" तेबे राजे आपणे लोका खे जो तेती तेसगे पीतरे थे तिना खे बारे जाणे खे बोलेया ओर सेयो सब बारे चली गे। 20 तेबे राजा आपणे उबले कमरे दे अव्वादार जगा दे कल्ला बैठी रा था। तेबे एहूदे तेसरे नेड़े जाईकी बोलेया, "परमेशरो रिया तरफा ते मां तांगे एक गल्ल बताणी।" जिंयाँ ई राजा गद्दिया पाँदा ते उठी की खड़ा ऊआ। 21 तदुओ खे एहूदे आपणा खूँजा आथ बढ़ाई की आपणी दाँणी खुटिया ते तलवार खींजी की तेसरे पेटो दे कूसायी ती। 22 तलवारा साथे मूठ बी तेसरे पेटो दे पीतरे चली गी ओर तलवार चर्बिया दे तसी दी रई, इजी री खातर तिने तलवार तेसरे पेटो ते नि निकयाल़ी ओर तेसरे गन्द बी निकल़ी गा। 23 तेबे एहूद छाज्जे ते निकल़ी की बारे गया ओर अटारिया रा दरवाजा बन्द करी ता ओर तिदे ताल़ा लगाई ता। 24 एहूदो रे निकल़दे ई राजे रे दास आए, तो क्या देखोए कि अटारिया रे दरवाजे दे ताल़ा लगी रा; इजी बजअ ते सेयो बोलणे लगे, "पक्का से अव्वादार कमरे दे टट्टी-पशाब करने जाई रा ऊणा।" 25 सेयो न्याल़दे-न्याल़दे थकी गे; तेबे ये देखी की से अटारिया रा दरवाजा नि खोलणे लगी रा, तिने चाबी लयी की दरवाजा खोलेया तो क्या देखेया कि तिना रा स्वामी जमीना दे मरेया रा पड़ी रा। 26 जदुओ तक सेयो सोचणे लगी रे थे तदुओ खे एहूद नठी गा ओर पात्थरा रिया बणाई रिया मूर्तिया री पोरलिया तरफा ते ऊई की सेईरे जगा दे जाई की शरण लई। 27 तेती पऊँची की तिने एप्रैम प्रदेशो री पाह्ड़िया पाँदे रड़सिंगा बजाया; तेबे लड़ाई करने खे इस्राएली लोक तेस साथे ऊई की पाह्ड़ी इलाके ते तेस पीछे-पीछे थाले गये। 28 तेबे एहूदे तिना खे बोलेया, "मां पीछे-पीछे आओ; कऊँकि यहोवे तुसा रे मोआब देशो रे दुश्मण तुसा रे वशो दे करी ते रे।" तेबे सेयो तेस पीछे-पीछे जाई की यरदन नदिया रे काटो तक गये जो मोआब देशो रिया तरफा खे ए से आपणे कब्जे दे लयी ले ओर कोई बी मोआबी लोक नदिया ते पार जाणे नि दित्ते। 29 तेस बखते तिने तकरीबन 10,000 मोआब देशो रे लोक काईते। सेयो सारे के सारे अट्टे-कट्टे ओर शूरवीर थे, पर तिना बीचा ते जिऊँदा कोई पनि बचेया। 30 ईंयाँ तेस बखते मोआब देशो रे लोक इस्राएली लोके अराईते। तेबे अस्सी साला तक तेते जगा दे शान्ति बणी दी रयी।

31 एहूदो ते बाद अनातो रा पाऊ शमगर ऊआ, एक बार तिने 600 पलिश्ती मर्द बल़दा खे खेदणे वाल़ी परैंठी* की काईते; ईंयाँ से बी इस्राएलो खे छुड़ाणे वाल़ा ऊआ।